1Che hermanokuéra, che ndaikatuiva’ekue añe’ẽ peẽme, peikórõ guáicha Pytu Porãmbáva poguýpe, añe’ẽva’erã uvei peẽme kuimba’e oikóva ramo gueteri ijyvyarigua rete rembipota poguýpeicha, Hesu Crísto pende pype mitãkuerarõguáicha.
2Kamby ha’uka peẽme, ndape’ukuaáigui gueteri kakuaáva rembi’u, ha ko’ág̃a peve ne’ĩra peropu’aka gueteri,
3peẽ peikógui gueteri pende yvyarigua rete rembipota vai poguýpe. Oĩgui pende apytépe py’a rasy (célo) ha ñorãirõ, ha ko’ã mba’e ohechauka porã peẽ peikoha gueteri yvyarigua rete rembipota vai poguýpe, péicha ningo oikohína umi ojerovia’ỹva Hesu Crísto rehe.
4Oimérõ he’íva pende apytépe: Che, Páblo aty reheguáva; ambue katu: Che, Apólos aty reheguáva; péicharamo ndapeikói piko gueteri pende yvyarigua rete rembipota vai poguýpe.
5Mba’e piko Páblo. Mba’e piko Apólos. Hesu Crísto rembiguáinte ningo hikuái, ha’ekuéra rupi peẽ pejeroviava’ekue Hesu Crísto rehe. Hesu Crísto katu ome’ẽ peteĩteĩme ime’ẽmby Ha’e oipota haichaite.
6Che añotỹva’ekue, Apólos omyakỹ ýpe (orega), Ñanderuete katu omongakuaapa.
7Upéicharamo ningo naimba’éi pe oñotỹva ni pe omyakỹva, Ñanderuete uvei upe omongakuaapáva.
8Pe oñotỹva ha pe ohypýiva ningo peteĩchánte, peteĩteĩme oñeme’ẽva’erã hembiapo repyteéva.
9Ore, Ñanderuete rembiguáinte, ha peẽ, Ñanderuete kokue, peẽ ningo Ñanderuete iglésia.
10Ñanderuete iporiahuvereko rupi Ha’e cheporavo aiko hag̃ua mba’apohára iñarandúvaicha, amoĩ hag̃ua pe óga pyendag̃ua, ambue katu omopu’ã hi’ári; peteĩteĩva katu toma’ẽ porã mba’eichaitépa omopu’ã ohóvo hi’ári.
11Avave ndikatuvéima omoĩ ambue óga pyenda oñemoĩmava’ekuégui, kóva ningo Hesu Crísto voi.
12Pe óga pyenda ári oñemopu’ãkuaa óro, pláta, ita vera, yvyra, kapi’i, yvyra rogue piru,
13pe tata rupi katu ojekuaáta oimeraẽ kuimba’e ha kuña rembiapokue, katuete og̃uahẽva’erã pe ára pe tata oha’ãmbataha (omedíta) opavavéva rembiapokue.
14Kuimba’e ha kuña rembiapokue ipu’akapa ramo tata rehe, ichupe oñeme’ẽva’erã hembiapokue repy.
15Hembiapokue okaipárõ katu, ijára opytáta nandi vera ha ojehavirava’erã, ha’e katu ojesalváta osẽ ramoguáicha tatágui.
16Ndapeikuaái piko peẽ Ñanderuete rogaha (ijiglesiaha), ha Ñanderuete Pytu Porãite oikoha pendepype.
17Oimeraẽ ombyaíva Ñanderuete róga, upévape Ñanderuete voi ohundíta; Ñanderuete róga oñemboykémagui ichupe g̃uarãnte.
18Ani avave oñembotavy ojupe; upe oimo’ãva ha’e iñaranduha ko yvy ape ári, toiko itavýva ramoguáicha oñemoarandu hag̃ua.
19Yvyariguakuéra arandu výro rei Ñanderuetépe g̃uarã. Ikuatiañe’ẽme he’i voi Ñanderuete oity iñarandúvape, iñarandúpe voi (Job 5,13).
20Ha he’ive: Ñanderuete oikuaa umi iñarandúva pensamiénto mba’e reiha, (Salmokuéra 94,11).
21Upévare ani avave ombotuicha hapichápe, opaite mba’e ningo pene mba’e voi (Ñanderuete ra’ykuéra mba’e);
22taha’e Páblo, taha’e Apólos, taha’e Pédro, taha’e yvagakuéra térã ko yvy, taha’e tekove térã ñemano, taha’e mba’e ag̃aguáva térã ouva’erãva, opaite mba’e pene mba’e voi,
23peẽ katu Hesu Crísto mba’e, ha Hesu Crísto Ñanderuete mba’e.
Who We AreWhat We EelieveWhat We Do
2025 by iamachristian.org,Inc All rights reserved.
