Isaías 59 - Biblia en Guaraní - ?anderuete ?e’? Por? 2015

Israel omombe’u hembiapo vai

1Pema’ẽ porãke, pende Ruete po naikangýi oporopytyvõ hag̃ua, ni ijapysa ohendu hag̃ua.

2Pene rembiapo vai rupi peñemomombyry pende Ruetégui ha pene angaipágui oñomi pende Ruete rova ani hag̃ua Ha’e ojapysaka penderehe.

3Pende po henyhẽ tuguýgui, ha pene kuã tembiapo vaígui; pene rembekuéra he’i japu, ha pene kũ omombe’u mba’evai.

4Ombotavy ha ijapu hag̃uánte ogueraha hapichápe mbojovakehára rendápe. Oñe’ẽ ha ojerovia hikuái mba’e rei rehe, ñaña rekógui hyeguasu ha imemby hikuái ñehundi.

5Omboja hikuái mbói rupi’akuéra, ha oipyaha hikuái ñandu renimbo; upe ho’úva hupi’akuégui omanova’erã ha ojoka rire umía osẽ peteĩ mbói.

6Iñandu renimbógui ndojejapokuaái ao ha noñemondekuaái katu hembiapópe, hembiapokue aña rehegua ha umía rupi ojopyse voínte hapichápe.

7Ipykuéra ningo oñani hembiapo vai rekávo, pya’e pya’e oiko oñohẽ hag̃ua heko potĩva ruguy; ipy’apýpe ojejohu aña rembiapo; ñehundi ha jejopy vai oĩ hapépe.

8Ha’ekuéra ndoikuaái pe py’aguapy rape ha justícia ndojohúi hapekuérape. Ikarẽmba voi ningo hapekuéra ha oimeraẽ oguatáva hapére ndojohumo’ãi py’aguapy añeteguáva.

9Ko’ã mba’e ko’ãva rupi oñemomombyry ñandehegui pe justícia ha nañanderupitýi pe teko hekoite peguáva; ñaha’ãrõkuri pe tesape ha péina ápe og̃uahẽ ára iñypytũha tesape rendaguépe, upévagui jaguatava’erã pytũ guýpe ko’ã mba’evai apopy rupi.

10Ku hesatũváicha jajepovyvy pe óga tápia rehe, ha jaiko jepovyvyhápe ku hesa’ỹva ramoguáicha; ñañepysãnga asaje pytépe ku pyharekue ramoguáicha; jaiko iñypytũháme umi omanomava’ekuéicha.

11Ñande ñangururu joa ku ósoicha ha ñanepyahẽ asy ku pykasúicha; ñaha’ãrõ pe justícia og̃uahẽ hag̃ua ha ndoúi katu, ha pe ñepytyvõ oñemomombyry avei ñandehegui.

12Ore roñemoĩ nderehe ha ore rembiapo vaikue oñe’ẽvai orerehe, ore roikuaa porã voi roñemoĩ hague nderehe ha oremandu’a porã ore rembiapo vai rehe.

13Ore roñembotuichánte ha ropia ore Ruete rapégui, ndoroguatavéi ore Jára rapykuéri ha romboyke voi ningo ichupe; ore rohayhu ñe’ẽ japu ha roporojopy asy; ha ñembotavy heñói ore py’apýpe.

14Péicha roñemboyke pe justíciagui ha roñemomombyry avei pe heko peguávagui, pe añetegua oñepysãnga pe plázape, ha pe justícia oñemomombyry.

15Pe añetegua ndojejohuvéi ha umi oñemomombyrýva, mba’evaígui ojeitýma cárcelpe, Ñanderuete katu ohechapa ha ipochy.

16Ha Ñanderuete oñemondýi ohecha ramo ndaiporiha peteĩnte jepe oipytyvõséva umi ojeitývape cárcelpe, upévare Ha’e voi ijyva mbaretépe omopu’ã jevy ichupekuéra.

17Ha’e oñemonde heko potĩme ku ipyti’a mo’ãha ramoguáicha ha iñakã rehe omoĩ salvacion iñakã mo’ãha ramoguáicha; oñemonde oporomyengoviáva aópe ku hete mo’ãha ramoguáicha, ha ipy’arasýpe ijahoja ramoguáicha.

18Ñanderuete omyengoviáta peteĩteĩme hembiapokue oiko haguéicha ha ohechaukáta ipochy hese ija’e’ỹvape ha ohaviráta umi oñemoĩvape hese, ha umi tetãme oikóva yguasu rembe’ýpe omyengoviapáta avei.

19Umi oikóva kuarahyreike gotýo okyhyjéta Ñanderuete réragui, ha pe kuarahyresẽ gotýo oñemondýita heko jajaipágui, Ñanderuete Pytu Porãite ojeitýta hi’arikuéra ku ysyrýicha oky tuichaiterei rire.

20Ñanderuete katu oúta Siónpe osalva hag̃ua oimeraẽ oñembyasývape guive ojapo vai haguére, péicha he’i Israel Jára.

21Ko ñe’ẽ Che ame’ẽmava’ekue oikóta katuete, he’i pende Ruete: Che Pytu Porãite oĩhína ndeári, ha umi che ñe’ẽ amoĩva’ekue nde jurúpe, oĩva’erã nde juru ha nde ra’ykuéra jurúpe, he’i pende Ruete, ko ára kóva guive ha opaite ára peve.