1 Tesalonicayguakuérape 5 - Biblia en Guaraní - ?anderuete ?e’? Por? 2015

1Upe ára rehe ha araka’etépa Ha’e ouva’erã, che hermanokuéra, natekotevẽi che ahai peẽme,

2peẽ ningo peikuaa porã voi pe ára Hesu Crísto og̃uahẽ jevytaha, oúta ku mondaháicha oúva pyharekuépe.

3Yvyarigua he’i jave: Jaiko porã (segúro) ha py’aguapýpe, upeichahágui ho’áta sapy’aitépe hi’arikuéra iñehundirã, ojehu háicha pe kuñáme og̃uahẽ ramo sapy’a pe hóra imemby hag̃ua, upéicha ojehúta avei ichupekuéra, ha ndaikatumo’ãi okañy mamove.

4Peẽ katu, che hermanokuéra, napeiméi pytũ guýpe, upéicha upe ára upéva natekotevẽi penembopy’andýi ojehu háicha pe mondaha og̃uahẽ ramo.

5Peẽ ningo ára ha tesape ra’ykuéra ha rajykuéra. Ñande ndaha’éi pyhare térã pytũ ra’ykuéra ha rajykuéra.

6Upévare anítei jake ambuekuéraicha, japáy uvei ha jaiko hekópe.

7Umi okéva ningo oke pyharekuépe, ha umi oka’úva ningo oka’u avei pyharekuépe.

8Ñande katu ára peguáva, upévare jaiko jaka’u’ỹre avei, ha ñamonde pe jerovia ha mborayhu añeteguáva, pe soldádo omonde háicha ipyti’a mo’ãha, ha jaiporu pe esperánza, pe soldádo oiporu háicha iñakã mo’ãha.

9Ñanderuete nañanerenóiri ñandereity hag̃ua aña retãme ipochyha árape, jahupity hag̃ua uvei pe salvacion Hesu Crísto rupi.

10Ha’e omanógui ñanderehehápe, ñande jaikove ramo (yvy apére) térã ñamano ramojepe, ñande jaikove jevyva’erã Ha’érupi ha hendive g̃uarã.

11Upévare peñomoangapyhy ha peñomokyre’ỹ, pejapo háicha voi.

Páblo ohekombo’e iñermanokuérape

12Rojerure ningo peẽme, ore hermanokuéra, pehechakuaa hag̃ua umi omba’apóva ha omoakãva pe iglésia rembiapo (ancianokuéra) pende apytépe ha umi penerekombo’évape.

13Ha pehechakuaa mba’eguasúrõ hembiapokuéra ha pehayhu ichupekuéra. Peiko py’aguapýpe oñondive.

14Ore hermanokuéra, ore poavisase: Pehekombo’e porã umi oiko reívape, pemoangapyhy umi ipy’aguapy’ỹvape, pemokyre’ỹ umi ikangývape, tapenepaciéncia opavave ndive.

15Pema’ẽke anítei avave omyengovia mba’evai mba’evai rehe, hendaguépe pejapo uvei iporãva ojupe ha opavavépe.

16Pevy’a tapiákena.

17Ani pepoi pene ñembo’égui ni peẽ pendekangy, peñembo’e pehóvo uvei (Ñanderuete ome’ẽ meve pejeruréva térã Ha’e ombotove peve), (Lúcas 18,1-7; 2 Corintoyguakuérape 2,7-10).

18 Peagradece opaite mba’e rehe, kóva ningo Ñanderuete rembipota ojeroviáva guivépe g̃uarã Hesu Crístore.

19Ani pembogue pe Pytu Porãmbáva (rembiapo pendepype).

20Ani pemboyke umi proféta ñe’ẽ.

21Peikuaa (peestudia) porã raẽ opaite mba’e, ha upéi pejapyhy pe iporãvante.

22Peñemboyke opaichagua pytu vai retégui, (póragui térã anguégui), (1 Corintoyguakuérape 12,10).

23Ñanderuete ningo pe py’aguapy Jára, Ha’e tapenemboheko porã pehóvo opaite mba’épe: Pende pytu porãme, pene ángape ha pende retépe, ha peñangareko pende rekove rehe, Hesu Crísto oúrõ g̃uarã, upévare anítei peñemongy’a.

24Ñanderuete nomoambuemo’ãi iñe’ẽ, ha opaite ñe’ẽ Ha’e oprometemava’ekue katuete oikóta avei pende rekovépe, Ha’e voi penerenóigui.

Ñemomaitei ipaha pegua

25Ore hermanokuéra, peñembo’ékena avei orerehe.

26Pemomaitei opaite hermanokuérape ñehetũ (béso) potĩme.

27Ajerure asy peẽme pemoñe’ẽ hag̃ua ko kuatiañe’ẽ kóva opaite ñane hermanokuérape.

28Ñandejára Hesu Crísto poriahuvereko toĩ penendive.