Números 15 - Biblia en Guaraní - ?anderuete ?e’? Por? 2015

Tembiapoukapy kuave’ẽmbynguéra rehegua

1Ñanderuete oñe’ẽ Moiséspe, ha he’i:

2Eñe’ẽ Israel ñemoñarenguérape ha ere ichupekuéra: Peike vove pe yvy Che ame’ẽtava peẽme peiko hag̃uáme,

3ha upépe peikuaave’ẽva’erã kuave’ẽmby ojehapypáva pende Ruetépe g̃uarã, peikuave’ẽségui térã peprometégui, térã pende areteguasu jave mba’e ryakuã porã pende Ruetépe, upérõ peikuave’ẽ pende tóro, pende ovecha térã kavara reheve;

4avei 2,2 lítro trígo ku’i porã, oñembojehe’apyréva 0,9 lítro acéite reheve.

5Pekuave’ẽva’erã avei 0,9 lítro víno oimeraẽ ovecha ra’yrusu reheve ojehapypáva kuave’ẽmby ramo.

6Peikuave’ẽ ramo ovecha mácho peikuave’ẽta avei 4,4 lítro trígo ku’i porã oñembojehe’apyréva 1,2 lítro acéite reheve.

7Hi’ári 1,2 lítro víno peikuave’ẽva’erã mba’e ryakuã porãva ramo pende Ruetépe g̃uarã.

8Peikuave’ẽ ramo peteĩ tóro ra’yrusu kuave’ẽmby ojehapypáva ramo peme’ẽ haguére pene ñe’ẽ térã kuave’ẽmby py’aguapy reheguáva ramo pende Ruetépe,

9peikuave’ẽta hendive 6,6 lítro trígo ku’i porã oñembojehe’apyréva 1,8 lítro acéite reheve;

10ha 1,8 lítro víno peñohẽta kuave’ẽmby hendypáva ári hyakuã porã hag̃ua pende Ruetépe g̃uarã.

11Péicha ojejapova’erã peteĩteĩ umi tóro ra’yrusu rehe, ovecha mácho ra’yrusu rehe, ovecha ra’yrusu rehe térã kavara ra’yrusu rehe.

12Peikuave’ẽvéta ramo pene rymba, peikuave’ẽ avei hekópe pe trígo ku’i ha víno heta háicha pene rymba.

13Peteĩteĩva oikuave’ẽva guive oikuave’ẽta hekópe ikuave’ẽmby hendypáva hyakuã asy hag̃ua pende Ruetépe g̃uarã.

14Ha oiko ramo penendive térã pene ñemoñarenguéra apytépe peteĩ tetã ambueygua, ha’e oikuave’ẽta avei peẽ peikuave’ẽ háicha.

15Peteĩ tembiapoukapýnte oĩ Israelgua ha tetã ambueyguápe g̃uarã, oikóva guive pende apytépe; pe oikuave’ẽva pende Ruetépe g̃uarã peteĩcha oikóta avei henondépe.

16Peteĩ mbo’epy ha peteĩ tembiapoukapýnte peguerekóta, peẽ ha tetã ambueygua oikóva pende apytépe.

17Ñanderuete oñe’ẽ Moiséspe, ha he’i:

18Eñe’ẽ Israel ñemoñarenguérape ha ere ichupekuéra: Ág̃a peike vove pe yvy mamo che poguerahahápe,

19peñepyrũ guive pe’u pan Canaan yvy peguare, peikuave’ẽva’erã avei ichugui pende Ruetépe g̃uarã.

20Pe pan peteĩha pembojýtava pende trígo pyahuetégui peikuave’ẽta chéve g̃uarã, peikuave’ẽ háicha avei pe trígo ra’ỹi hi’aju tenondeguáva.

21Peẽ ha pene ñemoñarenguéra peikuave’ẽta chéve g̃uarã pe pan tenondeguáva peẽ pembojýva pende trígo pyahueteguiguaréva.

22Peẽ pejavy ramo térã penderesarái ramo peteĩ che ñe’ẽ ha’eva’ekuégui Moiséspe,

23opaite ñe’ẽ apytégui Che ha’eva’ekue guive Moiséspe peẽ pejapo hag̃ua, añe’ẽha ára guive Israel ñemoñare renonderãre,

24upérõ Israel retã oikuave’ẽva’erã peteĩ tóro ra’yrusu kuave’ẽmby ojehapypáva ramo mba’e ryakuã asýva pende Ruetépe, trígo ku’i ha víno reheve ha peteĩ kavara mácho kuave’ẽmby angaipa reheguáva ramo.

25Ha pe pa’i ojapova’erã kuave’ẽmby angaipa reheguáva mayma Israel ñemoñare aty rehe; ha oñeperdonáta ichupekuéra ojavýva guive, upévare ha’ekuéra ogueruva’erã ikuave’ẽmby hendýva ha hi’angaipa reheguáva pende Ruetépe g̃uarã.

26Ha oñeperdonáta mayma Israel ñemoñarenguéra, ha avei tetã ambueygua oikóva pende apytépe, opaite ijejavýgui.

27Peteĩ tapicha oñemoangaipa ramo noñemoangaipaséi ramojepe, oikuave’ẽvaerã peteĩ kavara oguerekóva peteĩ áño kuave’ẽmby angaipa reheguáva ramo.

28Ha pe pa’i oikuave’ẽva’erã kuave’ẽmby angaipa reheguáva pe tapicha oñemoangaipáva rehe; ha’e oñemoangaipa ramo oipota’ỹre pende Ruete renondépe, oñemoĩ porã jevýta ichupe ha oñeperdonáta avei ichupe.

29Israel ñemoñare ha pe tetã ambueyguápe g̃uarã oikóva ijapytepekuéra, peteĩ tembiapoukapýnte oĩva’erã oñemoangaipa ramo oikuaa’ỹre.

30Ha pe tapicha ojapóva oimeraẽ mba’evai oipotágui, taha’e Israelgua térã tetã ambueyguáva, upéva oñemoĩma pende Ruete rehe ha pe tapicha pévape ojejukava’erã hetãyguakuéra apytégui.

31Pe tapicha nomomba’éiva pende Ruete ñe’ẽ ha oñemboykéva hembipotágui ojejukava’erã; iñaña reko ho’ava’erã hi’ári.

Peteĩ omboarete’ỹva pe jepytu’uha ára ojejukava’erã itápe

32Israel ñemoñarenguéra oiko aja desiértope ojohu hikuái peteĩ kuimba’e ombyatýva jepe’a jepytu’uha árape.

33Ha umi ojohuva’ekue ichupe jepe’a ombyatyhápe, ogueru ichupe Moises ha Aaron rendápe;

34ha omoĩ hikuái ichupe cárcelpe, ndojekuaa porãigui mba’épa ojejapova’erã hese.

35Upérõ Ñanderuete he’i Moiséspe: Katuete omanova’erã pe kuimba’e péva; mayma atygua togueraha ichupe pende rekohágui oka gotýo ha tojapi hikuái itápe omano meve.

36Upémaramo umi atypegua oguenohẽ ichupe pe atyha rendágui, ha ojapi ichupe itápe omano meve, Ñanderuete he’i haguéicha Moiséspe.

Jeguaka aokuéra rehegua

37Ñanderuete oñe’ẽ Moiséspe, ha he’i:

38Eñe’ẽ Israel ñemoñarenguérape ha ere ichupekuéra tomoĩ jeguaka ipóncho apýra rehe, péicha Israelgua ñemoñarenguéra oñemondeva’erã opaite árape umi jeguaka toñembovyvy inimbo hovýpe ipóncho rehe.

39Ha pehechávo umi jeguaka penemandu’ava’erã opaite pende Ruete rembiapoukapy rehe, ha pejapopa hag̃ua hekoitépe; ani hag̃ua pejapo pene ánga térã pende rete rembipota vai térã pende resa oipotávante.

40Péicha pejapóta penemandu’a ha pejapo hag̃ua che rembipota, ha peñemboheko porã hag̃ua pende Járape g̃uarã.

41Che Jahve, pende Ruete, poguenohẽva’ekue Egípto retãgui, aiko hag̃ua pende Ruete ramo. Che ningo Jahve, pende Ruete.