Jeremías 41 - Biblia en Guaraní - ?anderuete ?e’? Por? 2015

1Ha ojehu ningo pe jasy jere 7-hápe ou Ismael, Netanías ra’y, Elisama ra’yre, peteĩ tetã ruvicha ñemoñare, ha’e voi avei peteĩ mburuvichakue ha hendive ou 10 kuimba’e Gedalías, Ahicam ra’y rendápe, oĩva Mizpápe; ha ho’u hikuái oñondive pan.

2Ha opu’ã Ismael, Netanías ra’y, ha umi 10 kuimba’e hendive oĩva, ha oikutu kyse pukúpe Gedalías, Ahicam ra’y, Safan ra’yrépe, péicha ojuka pe Babilónia retãruvicha omoĩmava’ekuépe tetã sãmbyhyhára ramo.

3Uperire Ismael ojukapa avei umi Judaygua oĩva’ekue Gedalías ndive Mizpápe, ha avei umi soldádo Caldeayguápe upépe oĩva guive.

4Ha ojehu avei ambue árape, ha ne’ĩra gueteri avave oikuaa ojejuka hague Gedaliáspe,

5og̃uahẽ 80 kuimba’e, Siquem, Silo ha Samáriagui hendyva perõmbyréva ha ijaokuéra soropyre reheve, ha hetekuéra oñekarãimbambyre, ha ogueru hikuái ipopekuéra jopói ha mba’e ryakuã porã ogueraha hag̃ua Ñanderuete rogaguasúpe.

6Ha Ismael, Netanías ra’y, osẽ jahe’opópe ojohu ichupekuéra Mizpápe. Ha ojohúvo ichupekuéra, he’i: Peju Gedalías, Ahicam ra’y rendápe.

7Ha og̃uahẽvo tavapýpe, Ismael, Netanías ra’y, ojuka avei ichupekuéra, ha oity hetekuéra peteĩ pozokuépe, péicha ojapo ha’e umi kuimba’e ojohúva rehe.

8Umíva apytépe katu oĩ 10 kuimba’e he’imava’ekue Ismaélpe: Anína orejukátei; roñongatu ningo ore kokuépe trígo, cebáda, acéite ha eíra. Ha ndojukái ichupekuéra ipehẽnguekuéra apytépe.

9Ha upe pózo Ismael oity haguépe umi kuimba’e retekue, tetã ruvicha Asa ojapova’ekue, ku oñorãirõ ramoguare Israel retã ruvicha Baasa ndive; ha Ismael, Netanías ra’y, omyenyhẽ he’õnguekuéragui.

10Upérõ Ismael ogueraha jepokuapýpe opaite tetãygua Mizpápe hembyva’ekuépe, ijapytépe oĩ avei tetã ruvicha rajykuéra, umía Nabuzaradan ohejava’ekue, Gedalías, Ahicam ra’y poguýpe. Umíape Ismael, Netanías ra’y, ko’ág̃a oguerahapa jepokuapýpe, ha oho umi Amon ñemoñare retã gotýo.

11Johanan, Carea ra’y, ha umi soldádo ruvicha oĩva gueteri hendive ohendúvo umi mba’evaiete Ismael, Netanías ra’y, ojapova’ekue,

12ojapyhy hikuái opaite soldádo ha oho hikuái ojeity hag̃ua Ismael, Netanías ra’y ári, ha ojohu ichupe pe pózo guasuete oĩva Gabaon ypýpe.

13Ha umi jepokuapýpe Ismael ogueraháva ohechávo Johanan, Carea ra’ýpe, ha isoldádo ruvichakuéra, ovy’a joa hikuái.

14Ha umi tetãygua Ismael ogueruva’ekue jepokuapýpe Mizpágui ojere ha ohopa hikuái Johanan, Carea ra’y ndive.

15Ha Ismael, Netanías ra’y, okañy Johanan renondégui 8 kuimba’e ndive, ha oho umi Amon ñemoñare retãme.

16Ha Johanan, Carea ra’y, ha umi soldádo ruvicha oĩva hendive ojapyhy umi tetãygua hembyva’ekue ha oipe’a jevyva’ekue hikuái Ismael, Netanías ra’y poguýgui, ha’e oguerahamava’ekue Mizpágui ojuka rire Gedalías, Ahicam ra’ýpe; péicha Johanan ogueraha jevy umi soldádope, kuñakuérape, mitã ha tetã ruvicha rembiguaiguasúpe, Gabaónpe.

17Ha Gabaóngui oho hikuái Gerut-quimámpe, opytáva Belen ypýpe, ikatu hag̃uáicha upégui ova hikuái Egípto retãme,

18okyhyjégui umi Caldeayguágui, Ismael ojuka Gedalías, Ahicam ra’ýpe, Babilónia retã ruvicha ohejamava’ekuépe oisãmbyhy hag̃ua Juda retãme.