1 Samuel 16 - Biblia en Guaraní - ?anderuete ?e’? Por? 2015

1Ñanderuete he’i Samuélpe: Araka’e pevépa rejahe’óta Saul rehe. Che voi amboykékuri ichupe anive hag̃ua oiko Israel ruvicha ramo. Emyenyhẽ peteĩ tymba ratĩngue acéitegui, ha tereho, Che romondóta Isai rendápe oikóva Belénpe, ita’yrakuéra apytégui aiporavóma Israel retã ruvicharã.

2Ha Samuel he’i: Mba’éichapa aháta. Saul oikuaa ramo péva chejukáta. Ha Ñanderuete he’i jevy: Ejapyhy vaka apytégui peteĩ tóro ra’y, ha ere: Aju aikuave’ẽ hag̃ua kóva Ñanderuetépe g̃uarã.

3Ha ehenói Isaípe pe kuave’ẽmbyhápe, ha Che rohekombo’éta rejapova’erãva rehe ha reiporavóta chéve upe Che ha’étavape ndéve remona hag̃ua acéitepe.

4Samuel ojapopa Ñanderuete he’i háicha, ha og̃uahẽvo Belénpe, umi karai anciáno osẽ ohuvaitĩvo ichupe kyhyjepópe, ha he’i hikuái: Py’aguapýpepa reju.

5Ha’e ombohovái: Añete, aju aikuave’ẽ hag̃ua Ñanderuetépe. Peñemboheko potĩ ha peju chendive pe kuave’ẽmbyhápe, Samuel ohenói avei Isai ha ita’yrakuérape kuave’ẽmbyhápe ha he’iuka avei ichupekuéra oñemboheko potĩ hag̃ua.

6Ha ojehu oupáma ramo hikuái, ha Samuel ohechávo Elíabpe, he’i: Añetehápe kóvape Ñanderuete oiporavomava’ekue.

7Ñanderuete katu he’i Samuélpe: Ani rema’ẽ hova rehe térã ijyvatekue rehe, pévape Che amboykéma; pende Ruete noma’ẽ yvyariguakuéra oma’ẽ háicha, yvyariguakuéra oma’ẽ hesakuéra ohechávarente, pende Ruete katu oma’ẽ ipy’apýre (iñe’ãre, ikorasõre).

8Upéi Isai ohenói Abinadábpe, ha ombohasa Samuel renonde rupi, ha Ñanderuete he’i jevy kóvape ndaiporavói avei.

9Upéi Isai ombohasa Samápe. Ha Ñanderuete he’i: Kóvape ndaiporavói avei.

10Ha Isai ombohasa 7 ita’yrakuéra Samuel renonde rupi; ha Samuel he’i Isaípe: Ñanderuete ndoiporavói ko’ãvape.

11Upémaramo Samuel he’i Isaípe: Ko’ãvantepa opaite nde ra’ykuéra, ha ha’e ombohovái ichupe: Hemby gueteri pe ipahague, oñangarekovahína che ovechakuéra rehe. Ha Samuel he’i Isaípe: Egueruka ichupe, ndajaguapymo’ãi mesápe ha’e ou mboyve.

12Omondo ipiarigua, ha ogueru ichupe; ha ipire pytãũ (moréno), ha hesa porã ha hete iporã avei. Upévo Ñanderuete he’i: Epu’ã, emona hese acéite, pévape Che aiporavóma.

13Ha Samuel ojapyhy pe acéite oĩva hymba ratĩnguépe ha omona hese acéitepe ityke’yrakuéra apytépe; ha pe ára guive tenonderã gotýo Ñanderuete Pytu Porãitéva ou David ári. Uperire Samuel opu’ã ha oho jevy Ramápe.

David ombopu árpa Saúlpe g̃uarã

14Ñanderuete Pytu Porãitéva ojei Saúlgui, ha Ñanderuete omondo peteĩ pytu ñaña ombotarova hag̃ua Saúlpe.

15Ha Saul rembiguaikuéra he’i ichupe: Eikuaa porãke, Ñanderuete voi omondo peteĩ pytu ñaña nembohasa asy hag̃ua.

16Nde reipota ramo, ore jára, ore rohekáta ndéve g̃uarã peteĩ árpa mbopuhára, ikatu hag̃uáicha pe pytu ñaña oĩ jave ndeári, ha ha’e ombopúvo ipópe pe árpa taneánga pytu’u jevy.

17Ha Saul he’i hembiguaikuérape: Pehekána chéve peteĩ ombopu porãva árpa ha pegueru che rendápe.

18Upévo peteĩ hembiguái he’i: Che ahechákuri peteĩ Isai ra’y, peteĩ Belengua, ha’e ombopu porã pe árpa, ha ipy’aguasu, ikatupyry ñorãirõ rembiapópe, oñe’ẽkuaa, hete porã, ijuky ha Ñanderuete oĩ hendive.

19Ha Saul omondo ñe’ẽ rerahaukahára Isai rendápe, he’ívo: Embou che rendápe nde ra’y David, pe ovecha rerekua.

20Ha Isai oiporavo peteĩ búrro, ha hi’ári oguerahauka ita’ýra David rupi: Pankuéra, peteĩ víno ryru ha peteĩ kavara ra’y Saúlpe g̃uarã.

21Ha David ou Saul rendápe, ha oiko henonde rupi; ha Saul ohayhueterei ichupe, ha omoĩ ichupe iñorãirõ rembiporu rerojahára ramo.

22Ha Saul he’iuka Isaípe: Ajerure ndéve David opyta hag̃ua chendive, ha’e ho’a porãite che renondépe.

23Ha pe pytu ñaña ou ramo Saul ári, David ombopu hi’árpa, ha Saul ánga opytu’u ha oñeñandu porãve, ha pe pytu ñaña oñemboyke ichugui.