Isaías 36 - Biblia en Guaraní - ?anderuete ?e’? Por? 2015

Senaquerib oike oñemomba’e hag̃ua Juda retã rehe

1Ojehu ningo Ezequías oisãmbyhývo 14 áño, Senaquerib, Asíria retã ruvicha, ou ojeity hag̃ua opaite Juda tavakuéra ári ha omoĩ ipoguýpe (Jerusalen’ỹre).

2Ha pe Asíria retã ruvicha ombou Rabsacéspe, hembiguaiguasúva peteĩ soldádo aty ndetuicháva reheve, Láquis guive Jerusalénpe ojeity hag̃ua avei Ezequías ári; ha ou opyta pe yrenda yvateoygua ypýpe, pe tape ohóva umi ao joheihára kokuépe.

3Ha osẽ hendápe Eliaquim, Hilcías ra’y, tetã ruvicha mba’erepy ñangarekohára, ha Sebna, pe kuatia haihára, ha Joa, Asaf ra’y, pe ohekombo’éva tetã ruvichaguasúpe ha oisãmbyhýva heta mba’e Judápe,

4ha Rabsaces he’i ichupekuéra: Peje ko’ág̃a Ezequíaspe, Asíria retã ruvicha, pe mburuvichaguasuete, péicha he’iuka ichupe: Mávarehe piko rejeroviareína gueteri.

5Reimo’ã piko ñe’ẽ rei ha tekombo’e porã rupi nde orembopoguytaha. Mávarehe piko rejeroviareína, mávapa nepytyvõkuaáne.

6Ema’ẽ porãke, rejerovia ningo Egípto pegua takuapi opẽ rei reíva rehe, upe ojejokoséva itakuapi rehe ojekutúta, oikepáta ipo rehe ohasapa peve. Péicha ningo ojehu upe ojeroviáva faraon, Egípto retã ruvicha rehe.

7Ha nde ere ramo chéve: Jahve, ore Jára rehénte rojerovia, Ezequías nombyaiukái piko raka’e umi yvy yvate ha ndoityukái piko ikuave’ẽmby rendakuéra, ha upéi he’i Juda ha Jerusalenguakuérape oikuave’ẽ ha omomba’eguasu hag̃ua Jerusalénpe yvága atykuéra Jára añopénte.

8Ko’ág̃a katu aparase nendive: Asíria retã ruvicha, che jára, ome’ẽta ndéve 2.000 kavaju rejohu ramo gueteri umi oikokuaáva hi’ári.

9Mba’éicha piko upémaramo, reñemoĩse gueteri Asíria retã ruvicha rehe, che jára ombou ramo ne rendápe hembiguái michĩvévape. Nde rejerovia katu Egípto rehe, icarrokuéra ha ikavaju arigua aty rehe.

10Nde piko reimo’ã che ajúnte aipotágui, ndaupéichai, ore roju porohundi hag̃ua pende Jára voi oipotágui. Pende Jára he’íma chéve: Tereho ha ehundi pe tetã pévape.

11Upémaramo Eliaquim, Sebna ha Joa he’i Rabsacéspe: Rojerure ndéve reñe’ẽ hag̃ua ne rembiguaikuérape Siriaygua ñe’ẽme, ore ningo roñe’ẽ avei Siriaygua ñe’ẽme; ha anína reñe’ẽtei oréve Juda ñe’ẽme, ohendupágui ore rapichakuéra oĩva pe korapyjere ári.

12Ha Rabsaces he’i: Che jára chembou añe’ẽ hag̃ua ko’ã mba’e peẽme ha opaite Judayguakuéra renondépe, og̃uahẽta pe ára peẽ voi pe’u jevy hag̃ua pende repoti ha pe’u jevýta avei pende ty.

13Upéi Rabsaces oñembo’y ha hatã osapukái Juda ñe’ẽme, he’ívo: Pehendúke, Asíria retã ruvicha ñe’ẽ:

14Pe tetã ruvichaguasu péicha he’iuka peẽme: Aníke Ezequías penembotavýtei, ndaikatumo’ãigui peneguenohẽ ko jejopy vaígui.

15Ha aníke Ezequías penembojerovia pende Jára rehe, he’ívo: Añetehápe Ñanderuete ñanepytyvõta; ha ko táva kóva ndo’amo’ãi Asíria retã ruvicha pópe.

16Aníke pehendútei Ezequíaspe, péicha he’ígui Asíria retã ruvichaguasu: Peike katu peteĩ jekupytýpe chendive, ha pesẽ che rendápe; ha pe’u jevýta pende parral’a pende higo’a ha pey’úta avei pende ykuágui,

17aju jevy peve pogueraha hag̃ua che retãme, oĩháme avei heta kóga ra’ỹi ha víno, pan ha parraltyeta, oĩ háicha pene retãme.

18Pema’ẽ porãke, ani Ezequías penembotavýtei, he’i ramojepe: Ñanderuete ñanepytyvõta. Umi ambue tetã jára piko oguenohẽ hetãnguérape Asíria retã ruvicha pógui.

19Moõ piko oime Hamat ha Arfad jarakuéra. Mamo piko oime Sefarvaim. Oguenohẽ piko ra’e Samáriape che pógui.

20Máva piko pe jára umi tetã umíva apytégui, osalvamava’ekue hetãnguérape che pógui, ha mba’érehe piko upérõ peẽ pejeroviase gueteri pende Jára rehe.

21Eliaquim, Sebna ha Joa katu okirirĩ, ha nombohovái ichupe mba’evete; péicha he’i voi ichupekuéra tetã ruvicha Ezequías: Aníke pembohovái ichupe mba’evetépe.

22Upémaramo Eliaquim, Hilcías ra’y, mba’erepy ñangarekohára, Sebna, pe kuatia haihára, ha Joa, Asaf ra’y, ohekombo’éva pe tetã ruvichápe, omondoropa ijao ha oho Ezequías rendápe, omombe’upa hag̃ua ichupe Rabsaces ñe’ẽngue.