Salmokuéra 147 - Biblia en Guaraní - ?anderuete ?e’? Por? 2015

Ñamomba’eguasu Ñanderuetépe Ha’e ningo ipy’a porã, ipu’akapa ha iñaranduete

1Pemomba’eguasu Ñanderuetépe, iporãitégui Ha’e, japurahéi sálmo Ñanderuetépe, ipy’a porãgui Ha’e ñamomba’eguasu ichupe.

2Ñanderuete omopu’ã Jerusalénpe, hetã Israel oñemosarambiva’ekue opaite tetãnguéra rupi, Ha’e ombyatypa jevýta Israel retãme.

3Ha’e omonguera umi ipy’a ojekávape, ha ojokua jevy ipire oñekytĩ haguépe.

4Ha’e ningo oipapa opaite mbyjakuéra, ha peteĩteĩ ohenói heratee rupi.

5Ituichaite ningo Ñanderuete ha ipu’akapa, ha iñarandu ndaijapýrai.

6Ñanderuete omopu’ã umi oñemomirĩvape, ha omomirĩ umi oñembotuichávape.

7Puraheipópe pemomba’eguasu Ñanderuetépe, árpa púpe pepurahéi Ñanderuetépe.

8Pe ára Ha’e omo’ãva heta arai reheve, Ha’e ombosako’i ama yvýpe g̃uarã ha omoheñói kapi’i cerrokuéra rehe.

9Ha’e ome’ẽ mymbakuérape hembi’urã ha omongaru yryvu ra’ykuérape ochiã jave.

10Ñanderuete ndoguerohorýi kavaju mbaretekue, ni yvyarigua pu’aka.

11Ñanderuete oguerohory umi ichugui okyhyjévape, ha umi ojeroviávape imborayhu rehe.

12Jerusalen, Jerusalen emomba’eguasu Ñanderuetépe, emboete nde Járape.

13Ha’e omboty porã nde táva rokẽnguéra, ha ohovasa mitãkuérape nde apytépe oikóvape.

14Ha’e ombopy’aguapy ne retãme ha nemohygg̃uatã trígo iporãitévape.

15Ha’e omondo iñe’ẽ ko yvy apére, pya’ete oñemosarambi hag̃ua.

16Ome’ẽ ama rayvi rypy’a (niéve) ku ovecha raguekuéicha, ha oñohẽ pe ysapy rypy’a tanimbúicha.

17Ha’e oity amandáu ku itáicha ha mávapa ikatúne oaguanta pe ro’y Ha’e omboúva.

18Iñe’ẽ rupi ombohykupa jevy, oipeju vove ijyvytu hi’y osyrypa jevy.

19Ha’e ombohasa Jacóbope hembipota; hembiapoukapy ha ijustícia ome’ẽ Israélpe.

20Péicha Ha’e ndojapói ambue tetãnguéra ndive, ndoikuaáigui hembiapoukapy. Alelúia, pemomba’eguasu Ñanderuetépe.