1Epáy, epáy, nde Sion, ha eñemombarete nde Jerusalen, pe táva Ñanderuete oiporavóva; emonde ndejehe nde ao iporãvéva, araka’eve ndoumo’ãvéigui tetã ambueygua ha ipotĩ’ỹva nde táva ryepýpe.
2Ejetyvyro pe yvy timbógui, nde Jerusalen, epu’ã ha eñembo’y. Nde Sion rajy eikytĩ pe sã oñeñapytĩva nde ajúra rehe.
3Péicha he’i pende Ruete: Ha’ekuéra pendererahava’ekue reiete, nome’ẽiva’ekue pirapire penderehe; reieténte oñeñemu, upévare reiete opoi jevyva’erã avei pendehegui.
4Péicha he’i Ñanderuete, Ñandejára: Ñepyrũme che retã oguejy Egíptope oiko hag̃ua upépe mbohupa ramo ha upéi Asiriayguakuéra ogueraha ichupekuéra hembiguái ramo hetãme.
5Ha ko’ág̃a mba’éiko ojehuhína, he’i pende Ruete, che retã ojegueraha reiete. Ha umi oñembojárava hesekuéra, sapukaipópe ombopoguy ichupekuéra, he’i pende Ruete, ha tapiaite oñembohory che réra rehe.
6Upévare, che retã upe ára upévape oikuaa porãta che réra; ha ohechakuaáta Che voi añe’ẽ hague: Ápe Che aĩ.
7Iporãite umi ñe’ẽ rerahahára omyasãi ko ñe’ẽ kóva: Py’aguapy, salvacion; ha he’i Siónpe: Nde Jára oikóma mburuvicha guasuete ramo ko yvy apére.
8Pejapysaka porãke umi tahachíre, oñangarekóva ha oma’ẽva táva kora yvatégui umi ñúre, oĩva táva jerekuévo. Ha’ekuéra vy’apópe osapukái oñondivepa ohechágui hesatee rupi Ñanderuete ou jevymaha Siónpe.
9Jerusalen taperekuéra pepurahéi, pemomba’eguasu ichupe ha pevy’a joaitéke; Ñanderuete omoangapyhy jevýma hetãme, ha’e omosãsóma Jerusalénpe.
10Ñanderuete omopu’ã ijyva heko porãvape g̃uarã mayma tetãnguéra resa renondépe, ha umi yvy apýra guive ohecháta Ñanderuete pu’aka ha isalvacion.
11Pemboyke mboyke umi mba’e iky’áva, ani pepokótei umía rehe, pepoiete katu umívagui ha peẽ peguerojáva Ñanderuete rembiporukuéra peñemopotĩke mba’evaígui.
12Natekotevẽi pekañy pya’e ha sarambikuépe Babilónia retãgui, Ñanderuete ohótagui pene renonderãme, ha Israel Jára ohóta avei penderapykuéri.
Ñanderuete rembiguái Hesu Crísto jehasa asy13Pema’ẽ porãke che rembiguái rehe, opaite mba’e osẽ porãmbáta, oñemomba’eguasúta ha oñemboyvatéta ichupe, ha ipahápe ojehupíta ichupe.
14Heta oñemondýitava ohechávo ichupe, ndojoguavéigui yvyariguápe, hete oñemoambuéta ha oñemomombyryete yvyarigua retégui.
15Upévare Ha’e omopy’andýita heta tetãme; henondépe umi tetã ruvicha omboty joáta ijuru, ohechátagui upe araka’eve noñemombe’úiva ichupekuéra, ha oikuaa porãta upe ne’ĩrava gueteri ohendu hikuái.
Who We AreWhat We EelieveWhat We Do
2025 by iamachristian.org,Inc All rights reserved.
