1Peẽ Israelgua, pehendúke Ñanderuete ñe’ẽ, Ha’e he’iva’ekue penderehe.
2Péicha he’i Ñanderuete: Aníke pemoinge pene akãme tetãnguéra rape, ha ani pekyhyjétei umi techaukapy ára rehe pehecháva, ambue tetã okyhyje háicha, (2 Réyes 23,5).
3Umi tetã jepokuaa mba’e výro rei meme; oikytỹ yvyra ka’aguy pegua, ha umi ikatupyrýva hácha rembiapópe ojapo ichugui ijára ra’ãnga.
4 Óro ha óro morotĩgui ojejapo clávo, ha martíllope omoinge ani hag̃ua oku’e.
5Ojogua ningo ku yvyarigua ra’ãngápe oñemoĩva kokuépe omondýi hag̃ua umi guyra, iñe’ẽngúgui voi ningo, ha ojeguerahava’erã ojepotahápe, ndoguatakuaáigui. Ani pekyhyje ichuguikuéra, ndojapokuaáigui mba’evai ni mba’eporã.
6Ore Ruete, Ndeichagua ndaipóri; mba’eguasuete ningo Nde, ha mba’eguasuete nde réra ipu’akapáva.
7Mávapa ndokyhyjeichéne ndehegui, Nde voi ha’égui tetãnguéra ruvichaguasu. Ndehegui añoiténte ojekyhyjeva’erã; Ndeichagua ndaipóri mayma iñarandúva térã tetã ruvichakuéra apytépe.
8Mayma oikóva guive ko yvy apére itavy ha iñarandu ivýro rei. Ijarakuéra arandu ojogua yvyra pehẽnguépe, ivýro rei.
9Ogueru hikuái óro morotĩ ñemopererĩmbyre Társisgui ha pe óro, umi ikatupyrýva ombohykúva, oñu’ã hag̃ua ijára gua’u ra’ãngápe ha upéi omonde ao hovy ha pytãvape.
10Ñanderuete katu yvyariguakuéra Jára añeteteguáva; ha’énte pe Jára oikovéva ha Tetã ruvichaguasu ijapyra’ỹva; Ha’e ipochy vove oryrýi ko yvy, ha umi tetã ndogueropu’akái ipochy.
11Upévagui peẽ Israelgua pejéta ambue tetãnguérape: Umi jára ndaha’éiva yvagakuéra ha yvy apohare opa reíta ko yvy ape árigui ha yvagaguýgui.
12Ñanderuete, ipu’aka rupi, ojapova’ekue ko yvy, ha iñarandu rupi omohenda porãmba ko yvy apére oĩva guive, ha omyasãi umi yvága iñakã porãite rupi.
13Iñe’ẽ sunu rupi omokororõ pe y ára pegua, ha omopu’ã araikuéra yvy apýra paha guive; ojapo aratiri ama ndive, ha ogueru pe yvytu iñeñongatuhágui.
14Mayma yvyarigua itavy ha ndoikuaái mba’eve Ñanderuete renondépe; umi ombohykúva ijára ra’ãngakuéra otĩmbáta. Umi ojapóva ijára ra’ãnga oñembotavypáta, ipype ningo ndaipóri voi pytu porã.
15Umía mba’e výro reiete, hembiapokue mba’e výro rei; ijehaviraha árape oñehundipava’erã.
16Ndaupéichai Jacóbo Jára, Ha’e ningo opaite mba’e Apohare, ha Israel imba’etee; Ñanderuete réra: Yvága Atykuéra Jára.
Juda retã oñembotaperéta17Embyaty ne mba’ekuéra, oñemongorapámagui nde táva.
18Péicha he’ígui pende Ruete: Peikuaa porãke, Che amosarambíta Judápe opaite tetã rupi ha ohasa asy jave opáyta ha imandu’a jevýta cherehe.
19Angái, angái ko jekutu hasyete chéve ha ndokueraséi. Ha che ha’e jevy: Añetehápe kóa ningo che mba’asy, ha agueropu’akamanteva’erã.
20Che róga tymba pirekueguigua oñembyaipa, ha isãnguéra osopa; che membykuéra cherejapa ha omanombáma hikuái; ndaiporivéima omopu’ãkuaava’erã chéve che róga tymba pirekueguiguáva, ha omosãingokuaava’erã umi aosãingo pererĩ.
21Umi ovecha rerekua itavypa ha ndohekái ñande Ruetépe; upévarehe noñemopu’ãmo’ãi hikuái, ha hymbakuéra isarambipa.
22Cháke, ouhína ñe’ẽguyguy, tyapuguasu oñehendútama pe tetã yvatéogui, ombotapere hag̃ua opaite Juda tavakuéra, ha hendaguépe oiko hag̃ua jagua saitekuéra.
23Che Ruete, aikuaa porã, kuimba’e ha kuñakuéra ndaha’eiha hape ni hekove jára, ha’e ndaikatúi oiporavo umi mba’e ojehútava henonderãme.
24Che Ruete chehavira, nde justícia rupi, ha anítei nde pochy rupi, ỹrõ che añehundietéta.
25Eñohẽ nde pochy umi tetã ndekuaa’ỹva ári, ha umi tetã ári ohenoi’ỹva nde réra, ha’ekuéra ombyai haguére Jacóbope oñehundi ha omonandi peve ijyvy.
Who We AreWhat We EelieveWhat We Do
2025 by iamachristian.org,Inc All rights reserved.
