Jeremías 29 - Biblia en Guaraní - ?anderuete ?e’? Por? 2015

Jeremías kuatiañe’ẽ ojegueraha umi jepokuapýpe oĩva

1Péicha pe proféta Jeremías ohaiuka umi Judaygua ojeguerahava’ekue jepokuapýpe Jerusaléngui, umi karai anciáno hembývape, umi pa’i ha profetakuérape, ha opaite tetãygua Nabucodonosor oguerahava’ekue jepokuapýpe Jerusaléngui Babilónia peve.

2Pe tetã ruvicha Jeconías ojegueraha rire, isy ndive, umi oikova’ekue hogaguasukuérape, umi Juda ha Jerusalen ancianokuéra ha umi ikatupyrýva ha omba’apo porãitéva hiérro rehe.

3Juda retã ruvicha omondo Elasa, Safan ra’y ha Gemarías, Hilcías ra’y, ogueraha hag̃ua pe kuatiañe’ẽ, Nabucodonosor, Babilónia retã ruvicha rendápe, ha he’iuka ichupe:

4Péicha he’i Yvága Atykuéra Jára, Israel Jára, mayma umi oikóva jepokuapýpe Babilónia retãme ha ojeguerahaukava’ekue Jerusaléngui:

5Pemopu’ãke pende rogarã, ha peiko ipype; peñemitỹke ha pe’u hi’akuéra.

6Pemenda joaitéke, ha pemoñemoña ta’ýra ha tajyrakuéra; peme’ẽ pende ra’ykuérape hembirekorã, ha pende rajykuérape imenarã, ikatu hag̃uáicha oñembota’ýra ha oñembotajýra hikuái; ha peñembohetáke upépe, ani hag̃ua peñemombovýtei.

7Ha peñeha’ãke toĩ py’aguapy upe táva mamo Che poguerahauka haguépe, ha peñembo’e pende Ruetépe pe táva rehe ha péva oñemopu’ã porã ramo peẽ voi pevy’aitéta ipype.

8Upévarehe Yvága Atykuéra Jára, Israel Jára he’i: Anivéke pende proféta japu ha pe imba’ekuaáva oikóva pende apytépe penembotavyvétei, ha aníke pejerovia umi mba’e pende képe pehecháva rehe.

9Japu omomarandu hikuái peẽme che rérape; Che ndajokuáiri ichupekuéra, he’i pende Ruete.

10Péicha he’ígui pende Ruete: Ág̃a oñemboty vove 70 áño Babilóniape, Che aháta po’andúvo, ha ajapopáta ha’emava’ekue guive ha pogueru jevýta pene retãteépe.

11Che aikuaa porã pe pensamiénto aguerekóva che py’apýpe penderehe, he’i pende Ruete, che akãme aguereko py’aguapy, ha ndaha’éi py’aro, ame’ẽ jevy hag̃ua peẽme umi mba’e peha’ãrõva ha peiko hag̃ua py’aguapýpe pene retãteépe.

12Upéramo peẽ cherenóita, ha pejuva’erã peñembo’évo chéve, ha che pohendúta;

13peẽ chereka ramo pende py’aite guive, peẽ chejohuva’erã katuete.

14Peẽ chejohúta, he’i pende Ruete, aguerupa jevýta umi ojeguerahamava’ekue ha pombyatýta mayma tetãnguéragui pomosarambi haguérupi, he’i pende Ruete; ha poguerupa jevýta pene retãteépe.

15Peẽ katu peimo’ã: Ñanderuete omopu’ã avei peẽme proféta Babilónia retãme.

16Pende Ruete katu péicha he’i pe tetã ruvicha oguapyvahína David guapyhaguasúpe, ha opaite tetãyguápe oikóva guive ko táva kóvape, pene pehẽnguekuéra ndohoiva’ekue penendive jepokuapýpe;

17péicha he’i Yvága Atykuéra Jára hesekuéra: Péina ápe Che amondo hi’arikuéra kyse puku, ñembyahýi ha mba’asy iñasãiva, ha ajapóta ichuguikuéra umi higo’a ivaietévaicha, ivaietereígui ndaikatúi oje’u.

18Amuñáta ichupekuéra kyse puku rupi, ñembyahýi ha mba’asy iñasãiva rupi, ha amoĩta ichupekuéra ñemondýi ramo mayma tetãnguéra yvy ape ári oikóva guive, maldicion ha poromongyhyjeha ramo, ñembohoryha ha mba’e ñemotĩha ramo mayma tetãnguérape g̃uarã mamo Che amombo haguérupi ichupekuéra;

19nohendúi haguére che ñe’ẽ, he’i pende Ruete, ha’eukamava’ekue ichupekuéra opaite árape che rembiguái profetatee rupi, ha napehendúira’e umíape.

20Peẽ katu, opaite Che aguerahaukava’ekue Jerusaléngui Babilóniape, pehendu che ñe’ẽ.

21Upévare Yvága Atykuéra Jára, Israel Jára, he’i Acab, Colaías ra’y rehe, ha Sedequías, Maasías ra’y rehe, oikovahína omomarandu japu che rérape peẽme: Péina ápe, Che amoĩta ichupekuéra Nabucodonosor, Babilónia retã ruvicha pópe, ha ha’e ojukaukáta ichupekuéra pende resa renondépe.

22Ha mayma umi Judaygua ojeguerahava’ekue Babilóniape oguerekóta ichupekuéra maldicion ramo, he’ívo: Ñanderuete tande’apo ku Sedequías ha Acábicha, Babilónia retã ruvicha ohesyva’ekue ichupekuéra tatápe.

23Umi mba’e ningo ojehu ichupekuéra iñaña haguére Israel retãme, ha oikógui hikuái hapicha rembireko ndive, ha omomarandu japu che rérape, ha omombe’u umi mba’e Che nda’eiva’ekue ichupekuéra; Che ningo ahecha ha aikuaapa voi, he’i pende Ruete.

24Ha reñe’ẽta Semaías, pe Nehelamguápe, ha eréta:

25Péicha oñe’ẽ Yvága Atykuéra Jára, Israel Jára, ha he’iuka ndéve: Nde rérape reguerahauka kuatiañe’ẽ mayma Jerusalenguápe, pa’i Sofonías, Maasías ra’ýpe, ha mayma pa’ikuérape, ha ere:

26Ñanderuete nemoĩ pa’i ramo, pa’i Joiáda rendaguépe, opyta hag̃ua nde poguýpe mayma kuimba’e tarova oikóva omomarandu Ñanderuete rógape, reñapytĩ hag̃ua ichupekuéra cárcelpe.

27Mba’éguipa nde nereñemoĩvéi Jeremías rehe, pe Anatotgua, omomarandúva pende apytépe.

28Ha’e ningo he’iuka oréve roikóva Babilónia retãme: Hi’areitereíma ore jepokuapyha arakuéra; upévagui pemopu’ãke pende róga ha peiko ipype, peñemitỹ ha pe’u hi’a porãngue.

29Ha pe pa’i Sofonías omoñe’ẽ ko kuatiañe’ẽ kóva proféta Jeremías apysápe.

30Ha ou Ñanderuete ñe’ẽ Jeremíaspe ha he’i ichupe:

31Ereuka mayma umi oikóva guive jepokuapýpe: Péicha pende Ruete he’i Semaías, Nehelam pegua rehe, ha’e oprofetiza haguére peẽme Che namondói ramojepe ichupe, ha ha’e penembojerovia haguére ijapu rehe;

32upévare pende Ruete he’iuka: Peikuaa porãke, Che ahaviráta Semaías, Nehelam peguápe, ha iñemoñarenguérape; ndoguerekomo’ãi kuimba’e oikova’erãva ko tetã kóva apytépe, ha ndohechamo’ãi mba’e porã ajapótava che retãygua rehe, he’i pende Ruete, oñemoĩ haguére cherehe iñe’ẽtee rupi.