1Ko’ãva hína Israel tríbu réra: Israel retã rembe’y yvateogua guive, Hetlon rape ykére oguejýva Hamat ha Hasar-enon peve oja peve Damásco yvýre, upépe Dan oguerekóta ijyvyrã kuarahyresẽ yke gotýo guive pe kuarahyreike yguasu rembe’y peve.
2Dan yvy rembe’y pukukuévo, kuarahyresẽ rembe’y guive pe yguasu rembe’y peve opytáta Asérpe g̃uarã, ijyvyrã ramo.
3Aser yvy rembe’y pukukuévo, kuarahyresẽ rembe’y guive pe yguasu rembe’y peve opytáta Neftalípe g̃uarã, ijyvyrã ramo.
4Neftali yvy rembe’y pukukuévo, kuarahyresẽ rembe’y guive yguasu peve opytáta Manaséspe g̃uarã, ijyvyrã ramo.
5Manases yvy rembe’y pukukuévo, kuarahyresẽ rembe’y guive pe yguasu peve opytáta Efraínpe g̃uarã, ijyvyrã ramo.
6Efrain yvy rembe’y pukukuévo, kuarahyresẽ rembe’y guive yguasu peve opytáta Rubénpe g̃uarã, ijyvyrã ramo.
7Ruben yvy rembe’y pukukuévo, kuarahyresẽ rembe’y guive pe yguasu peve opytáta Judápe g̃uarã, ijyvyrã ramo.
8Juda yvy rembe’y pukukuévo, kuarahy resẽ rembe’y guive pe yguasu peve pemboykéta peteĩ yvy pehẽngueguasuetéva oguerekótava 76,75 kilómetro ipuku ha 30,70 kilómetro ipekue; hembe’y kuarahyresẽha guive pe kuarahyreike yvy rembe’y peve ha ipukukue ojogua ambue yvy pehẽngue pukukuépe; ha Ñanderuete rogaguasu opytava’erã imbytetépe.
9Pe yvy pehẽnguetéva pemboykétava pende Ruetépe g̃uarã ipukúta 76,75 kilómetro ha ipéta 30,70 kilómetro.
10Ko yvy pehẽngue kóva oñemboykeva’erã Ñanderuetépe g̃uarã ha oñeme’ẽta pa’ikuérape g̃uarã. 76,75 kilómetro ipuku yvatéo ha 30,70 kilómetro ipekuévo kuarahy resẽha gotýo, ha 30,70 kilómetro avei kuarahyreikeha gotýo ha ipukuva’erã yvy gotýo 76,75 kilómetro ha Ñanderuete rogaguasu opytáta imbytetepekuéra.
11Ha umi pa’i oñemboykéva Ñanderuetépe g̃uarã, Sadoc ra’ykuéra, noñemongy’aiva’ekue ha ndopoiriva’ekue pende Ruete rapégui, umi Leviguakuéra katu omoirũva’ekue hetãyguakuérape omomba’eguasu hag̃ua ambue jára gua’úpe.
12Ichupekuéra g̃uarã oñeme’ẽta pe yvy pehẽngue opytáva umi Leviguakuéra yvy rembe’ýre ipukukuévo.
13Ha umi Levigua yvyrã opytáta umi pa’i yvy rembe’y pukukue rehe oĩta 76,75 kilómetro, ha ipekuévo 30,7 kilómetro; ipukukuévo (mokõivéva ykére) oñeme’ẽva’erã 76,75 kilómetro ha ipekuévo (mokõivéva ykére) oñeme’ẽva’erã 30,7 kilómetro.
14Noñemuiva’erã ijyvy rehe ha noñemyengoviamo’ãi mba’evére ha noñembohasa jevyiva’erã avavépe, oñemboykégui pende Ruetépe g̃uarã.
15Ha pe yvy hembýva gueteri pe yvy pehẽngueguasúgui ipe 15,35 kilómetro ha ipuku 76,75 kilómetro opytava’erã pe tavaguasu rendag̃ua oiko hag̃ua ipype umi tetãygua hymbakuéra reheve, pe táva katu opytava’erã imbytépe.
16Peicha ituichava’erã: yvate gotýo 13,81 kilómetro, yvy gotýo 13,81 kilómetro, kuarahyresẽ gotýo 13,81 kilómetro ha kuarahyreike gotýo 13,81 kilómetro.
17Pe tavaguasu jerekuévo umi irundyve ykére, hemby gueteri 767,5 métro nórte gotýo, 767,5 métro kuarahyresẽ gotýo, 767,5 métro sur gotýo ha 767,5 métro kuarahyreike gotýo ha ko yvy kóva opytava’erã umi tavaygua rymbakuéra okaru hag̃ua.
18Ha umi mokõi yvy pehẽngue hembýva (mokõi táva ykére) peteĩ opytáta kuarahyresẽ gotýo ipuku 30,7 kilómetro ha ambue kuarahyreike gotýo ipuku 30,7 kilómetro, ko yvy kóva umi omba’apótava táva ryepýpe oiporúta oñotỹ hag̃ua hikuái ikogakuéra.
19Ha umi omba’apóva táva ryepýpe oñangarekóta avei ko yvýre. Opaite Israel tríbugui oúta omba’apo hag̃ua ko táva kóvape.
20Opaite yvy oñemboykepyréva ohupity 76,75 kilómetro irundyve ijyke gotýo, ha opyta pa’ikuérape g̃uarã, Leviguakuérape g̃uarã ha tavayguakuérape g̃uarã.
21Ha pe yvy pehẽngue hembýva gueteri, opytáta tetã ruvichápe g̃uarã. Levigua, pa’ikuéra ha táva pegua yvy yke rembe’ýre opytáta tetã ruvichápe g̃uarã; ko yvy pehẽngue ipukuva’erã 76,75 kilómetro kuarahyreike gotýo (oĩháme pe yguasu Mar Mediterráneo), ha pe ambue yvy pehẽngue ipukuva’erã avei 76,75 kilómetro kuarahyresẽ gotýo, (pe ysyry Jordan oĩháme). Ha Ñanderuete rogaguasu opytáta ko yvy pehẽngueguasuitéva mbytépe, oha’ãva 76,75 kilómetro ipukukuévo ha 76,75 kilómetro ipekuévo, oĩháme Leviguakuéra, pa’ikuéra ha umi tavayguakuéra yvy.
22Israel retã ruvichápe g̃uarã kuarahyresẽ gotýo, opytáta pe yvy pehẽnguetéva oĩva Juda ha Benjamin yvy pa’ũme. Ha ambue yvy pehẽngue hovái opytáva, kuarahyreike gotýo, Juda yvy guive Benjamin yvy peve, opytáta avei tetã ruvicha mba’erã ramo.
23Ha Benjamin tríbu yvy pehẽngue opytáta (pe táva sur rembe’ýpe) kuarahyresẽ yke guive kuarahyreike yke peve.
24Ha Benjamin yvy rembe’y pukukuévo (sur gotýo), pe kuarahyresẽ yke guive kuarahyreike yke peve, opytáta Simeónpe g̃uarã.
25Simeon yvy rembe’y pukukuévo, pe kuarahyresẽ yke guive kuarahyreike yke peve, opytáta Isacárpe g̃uarã.
26Isacar yvy rembe’y pukukuévo, pe kuarahyresẽ yke guive pe kuarahyreike yke peve, opytáta Zabulónpe g̃uarã.
27Ha pe Zabulon yvy rembe’y pukukuévo, pe kuarahyresẽ yke guive pe kuarahyreike yke peve, opytáta Gádpe g̃uarã.
28Gad yvy rembe’y súrpe opyta Tamar guive Cades ykua peve, ha Egípto ysyry (arróyo) guive pe yguasu tuichaitéva peve.
29Ko yvy pemboja’o jevýta po’a jeporavo rupi Israel tribukuéra apytépe imba’e tee ramo, he’i pende Ruete pende jára.
30Ko’ãva hína Jerusalen rokẽguasu: Jerusalen yvy rembe’y yvateoygua ipuku 13,81 kilómetro,
31ha itáva rokẽguasu mbohapy oñembohéra Israel tríbu réra oĩ háicha: Ruben rokẽ, Juda rokẽ ha Levi rokẽguasu.
32Ha ijyke kuarahyresẽ gotyogua ipuku avei 13,81 kilómetro ha oĩ avei mbohapy okẽguasu: Jose rokẽ, Benjamin rokẽ ha Dan rokẽguasu.
33Ha pe ijyke yvy gotyogua ipuku avei 13,81 kilómetro ha itáva rokẽ mbohapyha avei: Simeon rokẽ, Isacar rokẽ ha Zabulon rokẽguasu.
34Ha pe táva rembe’y opytáva yguasu yke (kuarahyreike) gotýo ipuku avei 13,81 kilómetro ha oĩ avei mbohapy okẽ: Gad rokẽ, Aser rokẽ ha Neftali rokẽguasu.
35Ijerekuévo oĩ 55,24 kilómetro. Ha upe táva upéva hérata upe ára guive: Ñanderuete rekoha.
Who We AreWhat We EelieveWhat We Do
2025 by iamachristian.org,Inc All rights reserved.
