Salmokuéra 104 - Biblia en Guaraní - ?anderuete ?e’? Por? 2015

Ñanderuete oñangareko hembiapokue rehe

1Emboete nde, che ánga, Ñanderuetépe. Ñanderuete, che Jaratee, mba’e guasuete ningo Nde, Nde reñemonde jajái ha mba’e techapyrãme.

2Nde reñeñu’ã tesapépe, ku pónchope oñemonde háicha, ha Nde rejepyso umi yvága ojepyso háicha peteĩ cárpa óga ape ári.

3Nde remopu’ã nde róga y mbytépe, Nde remoĩ umi arai nde cárro ramo. Nde reveve pe yvytu pepo ári.

4Nde reiporu yvytukuéra ne remimbou ramo, ha aratiri ne rembiguái ramo.

5Nde remopu’ã ko yvy ipyenda ári ani hag̃ua oku’e araka’eve.

6Ku ahojápe ramoguáicha reñu’ãva’ekue ko yvy, cérro ru’ãme jepe ojaho’ipava’ekue.

7Nde reja’óvo ichupekuéra okañymba hikuái, nde arasunu hyapúvo kyhyjepópe oguejy pya’e hikuái.

8Upéicha cerrokuéra ojupi ha umi ñu oguejypa oho opyta hag̃ua Nde remohenda haguépe.

9Nde rejokova’ekue ykuéra oĩháme anítei ohasa ni oñu’ã jevy ko yvy.

10Nde remondo pe y yvu pegua oike hag̃ua ysyrýpe ha upéi osyry hag̃ua hikuái cérro pa’ũ rupi.

11Upépe Nde remboy’u mayma mymba saite ñu rupiguápe, ha umi búrro saite ombogue ijy’uhéi.

12Hembe’y rehe oiko guyrakuéra ha opurahéi joa yvyra rakãre.

13Nde remyakỹ umi cérro nde róga yvága pegua guive, Nde rehovaságui ne rembiapo pe yvy hyg̃uatã.

14Nde remoheñói pe kapi’i mymbakuérape g̃uarã, ha umi temitỹngue yvyariguápe g̃uarã Nde reguenohẽ yvýgui, pe trígo yvyarigua rembi’urã.

15Ha víno ombopy’arory kuimba’e ha kuñakuérape, pe acéite ombovera yvyariguakuéra rova, ha pan rupi remombarete ichupekuéra.

16Ñanderuete yvyrakuéra hoy’u henyhẽmba peve, umi cédro Líbano pegua Ha’e oñotỹva’ekue avei.

17Upépe ojaitypo guyrakuéra, pe tujuju oiporavo pe yvyra cipres (ojogua pínope) ojaitypo hag̃ua.

18Umi cérro ijyvatéva rupi oiko umi kavara saite imba’e ramo, ha umi ita oĩha rupi tapiti ojapo haityrã.

19Ñanderuete ojapo pe jasy omboja’o hag̃ua meskuéra, ha pe kuarahy oikuaa porã hape moõpa oike hag̃ua.

20Nde remoypytũ ramo og̃uahẽ pe pyhare, upejave mymba ka’aguy pegua oguata.

21Umi leõ ra’ymimi okororõ hembi’urãre, ha oha’ãrõ Ñanderuete omongaru hag̃ua ichupekuéra.

22Ha osẽvo pe kuarahy okañymba hikuái opytu’u hag̃ua ikuárape.

23Upevove umi kuimba’e ha kuña oho omba’apo hag̃ua pe kuarahy oike peve.

24Ndaikatuvéima ojepapapa ne rembiapokuéra hetaitereígui, Nde, ore Ruete. Ne arandu ituichaite rupi rejapopaite umía, pe yvy henyhẽte ne rembiapo porãgui.

25Upépe oĩ pe yguasu tuichaitéva ha ipyetéva, oñemomyiháme mymbakuéra ojepapakuaave’ỹva, mymba michĩ ha tuicháva.

26Upépe oiko umi barcoguasu, upépe oĩ avei pe tejujaguaguasuete (Leviatan) oñembosarái hag̃ua ipype.

27Ha’ekuéra oha’ãrõ ndehegui hembi’urã hi’araitépe.

28Reme’ẽ jave ho’u hikuái, Nde reipyso ramo nde po ha’ekuéra hyg̃uatã porãmba.

29Reñomi ramo nde rova iñangekõipa hikuái, rejoko ramo ipytuhẽ omanomba hikuái, ha oiko jevy ichuguikuéra yvy timbo.

30Nde rembou ramo nde Pytu Porã ha’ekuéra oikóta, ha Nde voi ningo rembopyahu jevy jey ko yvy ape.

31Opaite ára peve toiko Ñanderuete resape ojajaipáva, tahoryete Ñanderuete hembiapokue reheve.

32Ha’e oma’ẽ ramo pe yvy rehe, pe yvy oryrýi ha Ha’e opoko ramo umi cérro rehe otimbo.

33Che aikove aja agueropurahéita Ñanderuetépe, amomba’eguasúta che Járape chepytuhẽ aja pukukue.

34Tove taiporã che py’apy ñemongeta, avy’aite che Jára ndive.

35Toñehundipa umi tekove ñaña oikóva guive ko yvy apére ha tomanomba umi heko vaíva. Nde, che ánga, emomba’eguasu Ñanderuetépe. Alelúia (hebréo ñe’ẽme he’ise: pemomba’eguasu Ñanderuetépe).