Isaías 2 - Biblia en Guaraní - ?anderuete ?e’? Por? 2015

Ñanderuete oikóta hetã ruvichaguasu ramo

1Isaías, Amos ra’y, ohecha umi mba’e ojehútava Jerusalénpe ha Judayguakuéra rehe.

2Ojehuva’erã umi ára pahávo, pe cérro, Ñanderuete rogaguasu oĩháme, omoakãta ambue cerrokuéra, ha opaite tetãnguéra ou joava’erã hendápe.

3Ha umi tetã ou joáva, he’íta: Peju ha jajupi Ñanderuete cérrope, Jacóbo Jára rogaguasúpe, ha’ekuéra ñanembo’e hag̃ua hapekuérare, ha upéi jaguata avei hapekuéra rehe. Sióngui osẽta Ñanderuete rembiapoukapy ha Jerusaléngui oúta iñe’ẽ.

4Jerusalen ombojovakéta ha ohaviráta heta tetãnguérape ha oiporavóta hetápe; ikyse pukúgui ojejapóta yvy mbovoha (arádo), ha ijyvyra puku akuágui kyse ty’ãi (fóice); tetãnguéra mopu’ãmo’ãvéi ikyse pukukuéra ojuehe, ha noñembokatupyrymo’ãvéi ñorãirõ rembiapópe.

Ñanderuete ombojovake umi oñembotuichávape

5Peju, Jacóbo rogaygua ha jaguata Ñanderuete rapére.

6Añetehápe, Nde remboykéma ne retã, Jacóbo rógape oiko haguére umi kuarahyresẽha imba’ekuaávaicha ha ku Filisteaygua ta’yvõháraicha, paje apoháraicha, ha oike peteĩ py’apy umi tetã ambueygua ñemoñarenguéra ndive.

7Hetã henyhẽ pláta ha órogui, ha imba’erepyeta ndojepapakuaavéi hetaitereígui. Hetãpy henyhẽ kavaju ha hetaiterei cárrogui, umía ndojepapakuaamo’ãvéi voi ningo.

8Juda retã henyhẽ jára gua’u ra’ãngágui ha oñesũ hikuái ipokuéra rembiapokue renondépe, ipokuéra ojapova’ekue renondépe.

9Umi kuimba’e oñakãity ha karaiguasu oñemomirĩkuri ñemotĩpópe henondepekuéra; upévare ani reperdonátei ichupekuéra.

10Peike katu itakuápe, pekañy yvy guýpe Ñanderuete rova ha heko jajaipágui.

11Umi yvyarigua oñembotuicháva itĩndyva’erã, ha umi ojejapóva oñemomirĩva’erã; ha upe ára upévape oñemomba’egusuva’erã añónte Ñanderuetépe.

12Upe árape yvága atykuéra Jára oñemoĩta opaite umi ojejapóva rehe, oñembotuicháva ha mayma oñemomba’eguasúva rehe oñemomirĩva’erã katuete;

13ha oñemoĩta avei mayma cédro Líbano pegua rehe, yvate oñembo’ýva, ha mayma yvyra tuichaitéva Basan pegua rehe.

14Opu’ãta avei mayma cérro michĩva ha tuicháva rehe,

15mayma óga yvate ha mayma korapy jere yvate rehe,

16mayma barcoguasu Tarsis pegua ha mayma jeguaka porã hepýva rehe.

17Umi yvyarigua oñembotuichava’ekue ojeityva’erã yvy rehe, ha kuimba’ekuéra ojejapóva oñemotĩndyva’erã; upe ára upévape oñemomba’eguasuva’erã Ñanderuete añoitémante.

18Ojepe’apava’erã ijára gua’u ra’ãngakuéra.

19Oikéta hikuái yvy ha itakuaguasúpe, okañýta okyhyjeitereígui Ñanderuete rova ha heko jajaipágui, Ha’e opu’ã ramo ko yvy oryryipáta.

20Upe ára upévape yvyariguakuéra ombyatyva’erã ijára gua’u ra’ãngakuéra omomba’eguasuva’ekue ha ojejapova’ekue pláta ha órogui omombo hag̃ua anguja ha mbopi oĩháme.

21Ñanderuete opu’ã ramo omboryrýi hag̃ua yvyariguakuérape ojasuruva’erã itaguasu pa’ũ rupi ha itakuaguasúpe, okañy hag̃ua Ñanderuete rova ha heko jajaipágui.

22Pepoi yvyariguakuéragui, oguerekóva yvytúnte itĩme, mba’érehe piko pembotuicha ichupekuéra.