Ezequiel 29 - Biblia en Guaraní - ?anderuete ?e’? Por? 2015

Ñanderuete ñe’ẽ Egípto rehe

1Pe áño 10-hápe, pe jasy 10-hápe ha pe ára 12-hápe ou chéve Ñanderuete ñe’ẽ ha he’i:

2Kuimba’e ra’y, emoĩ nde rova faraon, Egípto retã ruvicha gotýo, ha emomarandu ichupe ha opaite Egípto retã rehe,

3erévo: Péicha he’i Yvága Atykuéra Jára: Eikuaa porãke, Che apu’ãta nderehe, faraon, Egípto retã ruvicha, nde voi ningo jakareguasuete ojepysóva pe ysyry mbytépe, ha ere: Che mba’e ko ysyry Nílo, che rembiapo voi ningo.

4Che amoĩta ty’ãi (gáncho) ne rañykã rehe, ha ambojapáta nde pireky (escáma) rehe umi ysyry pegua pira ha roguenohẽta nde ysyry mbytégui, ha mayma pira oĩva guive nde ysyrýpe oñembojáta nde pireky rehe.

5Ha romombóta pe yvy perõme, ndéve ha opaite pira nde ysyry peguápe, pe ñu reíre re’áta; ha avave nanderupimo’ãi, avave naneñotỹmo’ãi; Che roitýgui umi mymba saite yvy ape arigua ha guyrakuéra árare ovevéva rembi’urã ramo.

6Ha mayma Egiptoygua oikuaáta Che ha’eha pe Yvága Atykuéra Jarateéva, oiko haguére hikuái ku yvyra po’i takuapi akuaguiguáicha Israel retãme g̃uarã.

7Ha’ekuéra ndejapyhy ramoguare ipópe, rejeka ha reikutu ijati’ýpe; ha ojejoko ramoguare hikuái nderehe, repẽ ha reikutu vai iku’ápe,

8upévare, péicha he’i pende Ruete: Eikuaa porãke, Che aguerúta ndeári kyse puku, ha ajukáta pene retãygua ha pene rymbakuérape.

9Ha pe Egípto retã itaperéta, ha ha’ekuéra ohechakuaáta Che ha’eha Jahve, pe Oikovéva tapia g̃uarã. Egípto voi he’íra’e: Che mba’e ningo pe Nílo, ha péva che rembiapokue voi.

10Upévagui, eikuaa porãke, Che apu’ãta nderehe ha nde ysyrykuéra rehe; ha amoĩta Egípto retã jepy’apy vaípe ha ambotaperéta Migdol guive Sevene peve, opytáva Etiopía retã rembe’ýpe.

11Mba’eveichagua yvyarigua py ndohasamo’ãvéima upérupi, ha mba’eveichagua mymba py, ha ndoikomo’ãvéi avei ipype 40 áño pukukue.

12Egípto retãgui ajapóta yvy perõ, umi yvy itaperéva apytépe, ha itavakuéra oñembyaipáta 40 áño pukukue umi táva itaperéva apytépe; ha amosarambíta hetãyguakuéra ambue tetãnguéra apyte rupi, ko yvy tuichakue javeve.

13Péicha he’i pende Ruete: 40 áño rire katu ambyatypa jevýta Egíptoyguakuéra opaite tetãnguéra mamo amosarambi haguégui.

14Uperire aguerupa jevýta Egiptoyguakuérape ha agueraháta ichupekuéra Patros yvýpe, heñói ypy haguépe, ha upépe oikóta peteĩ tetã michĩva ramo.

15Ambue tetãnguéra apytépe ha’e imichĩta; araka’evéma nopu’ãveiva’erã ambue tetãnguéra ári; Che voi amomichĩgui ichupekuéra, anivéma hag̃ua ipu’aka ambue tetãnguéra rehe.

16Ha Israelguakuéra ndojeroviamo’ãvéima Egípto rehe, ha oikuaa porãta ojavy hague ojejoko haguére Egípto rehe ha oikuaáta hikuái Che ha’eha Ijarateéva, Ituvateéva.

17Ojehu pe áño 27-hápe, jasy peteĩháme, pe ára peteĩháme, Ñanderuete ñe’ẽ ou chéve, ha he’i:

18Kuimba’e ra’y, Nabucodonosor, pe Babilónia retã ruvicha, ha isoldádo aty omba’apo pohyietéva ombopoguy hag̃ua Tírope. Iñakãnguéra iperõmba ha ijati’ykuéra ojepiropa; upeichavéramojepe noguenohẽi hikuái mba’eve Tírogui oñeha’ãmba ramojepe,

19upévare péicha he’i pende Ruete: Eikuaa porãke Che ame’ẽ Nabucodonosórpe, Babilónia retã ruvicha, Egípto retã; ha ha’e ojapyhýta imba’erepyeta, ha oguerahapáta ichugui oĩva guive, ome’ẽ hag̃ua isoldádo atýpe.

20Babiloniayguakuéra oñeha’ãmbágui ojapo hag̃ua Che aipotáva, upévare Che ame’ẽta ichupekuéra Egípto retã; omba’apógui hikuái chéve g̃uarã, he’i pende Ruete.

21Umi ára umívape ambohoky pyahu jevýta Israel retã pu’aka. Ha ndéve rombojurupe’áta (Ezequiélpe) ijapytepekuéra, ha oikuaáta hikuái Che ha’eha Ijarateéva.