Levítico 26 - Biblia en Guaraní - ?anderuete ?e’? Por? 2015

Jehovasa oĩta iñe’ẽrendúvape g̃uarã

1Ndapejapoiva’erã pendejupe g̃uarã pende jára gua’u, ani pemopu’ã pendejupe g̃uarã jára gua’u ra’ãnga, ha napemoĩriva’erã ita oñemboparapyréva pene retãpy rehe peñakãity hag̃ua henondépe; Chénte Jahve, pende Jarateéva.

2Pemboaretéke che jepytu’uha arakuéra ha pembotuicha (perespeta) che rekoha (óga jojohuha). Che ningo Jahve, pende Ruete.

3Peiko ramo che ñe’ẽ he’i háicha, ha pejapo ramo hekoitépe che rembiapoukapykuéra,

4Che amboúta peẽme ama hi’árape, pe yvy hi’a porã hag̃ua, ha umi yvyra ñu megua ome’ẽ hag̃ua avei peẽme hi’akuéra.

5Ha pe trígo ñemono’õ ára ohupitýta pe parral’a ñemono’õha árape ha pe parral’a ñemono’õ ohupitýta pe trígo ñemitỹha ára peve, ha pe’úta pene pan peẽ peneryg̃uatã porã meve, ha peikóta pende yvýpe kyhyje’ỹre.

6Ha Che ame’ẽta pytu’u pene retãme, ha peikóta py’aguapýpe ha ndaiporimo’ãi avave penemondýiva; ha aguenohẽukapáta pende yvýgui mymba iñarõva, ha kyse puku ndohasamo’ãi pene retãpy rupi.

7Ha pemuñáta penderehe ija’e’ỹvape, ha ho’áta hikuái kyse puku rupi pene renondépe.

8 Cínco pende apytégui omuñáta 100-pe, ha 100 pende reheguáva omuñáta 10.000-pe, ha penderehe ija’e’ỹva ho’áta pene renondépe kyse puku rãimbekuépe.

9Che poipytyvõta, pombotuicháta, pombohetáta ha che ñe’ẽme’ẽ amoañetéta penendive.

10Pe’u aréta ñemitỹngue itujáva, ha penohẽta okápe umi itujáva peñongatu hag̃ua ipyahúva.

11Ha amoĩta pende apytépe che rogaguasu, ha che (rekove) noñemotĩmo’ãi pendehegui;

12Ha Che aikóta pende apytépe pende Jára ramo, ha peẽ che retãyguakuéra ramo.

13Che Jahve, pende Jára, poguenohẽva’ekue Egípto retãgui ani hag̃ua peiko ambue tetã rembiguái ramo, Che amopẽma pende cangálla ha pomoingo akã rapu’ãpópe.

14Ha napecherendúi ramo, ha ndapejapói ramo opaite ko’ã mba’e che ha’eva’ekue guive peẽme,

15ha pemboyke ramo che ñe’ẽ, ha pene ánga oñemoĩ ramo che rembiapoukapy rehe Che pombo’eva’ekue ha peheja rei ramo ñane ñe’ẽme’ẽmby,

16Che ajapóta penderehe ko’ã mba’e: Amboúta pende ári kyhyje, mba’asy po’i ha akãnundu vai, ambohypáta pende resay peẽ pendepytupa peve; ha peñotỹ reíta pene mba’e ra’ỹingue, ha penderehe ija’e’ỹva ho’upáta.

17Che añemoĩta penderehe ha pohundíta penderehe ija’e’ỹva rovake; ha umi pehayhu’ỹva oñembojárata penderehe, ha pekañýta oĩ’ỹre penemuñáva.

18Ha ã mba’e rupi napecherendúi ramo gueteri, Che pohaviráta 7 jevyve pene angaipakuéra rehe.

19Che pomyangekõita pepoi hag̃ua pende reko ñembotuichágui, Che ajokóta pe ama ha pende yvy hatãva’erã brónceicha.

20Pende pu’aka opa reiva’erã, pende yvy nome’ẽmo’ãvéigui hi’akue ha umi yvyra ndahi’amo’ãvéi.

21Ha peñembotuichave ramo, ha nacherendúi ramo gueteri, Che ambojo’áta pende ári 7 jevyve (véces) pe plága pene angaipa heta háicha.

22Ha amondova’erã pende ári mymba ñarõ, omokõ hag̃ua pende ra’ykuérape penembovyve hag̃ua ha ohundi hag̃ua pene rymbakuérape, ndojeporuvéi peve pende rapekuéra.

23Ha ã mba’e rupi ndapejevýi ramo, ha peñemoĩve ramo gueteri cherehe.

24Che avei añemoĩvéta penderehe, ha pohaviráta 7 jevyve pene angaipakuéra rehe.

25Agueruva’erã pende ári kyse puku añevenga hag̃ua ndapejapói haguére pe ñe’ẽ peẽ voi peme’ẽva’ekue chéve; ha pekañy ramo pende távape, Che amboúta péste pende rapykuéri, ha pomoĩta penderehe ija’e’ỹva pópe.

26Uperire aipe’áta che ñepytyvõ ani hag̃ua pehupity pan peneryg̃uatã hag̃ua, 10 kuña ombojyva’erã pene pankuéra peteĩ tatakuápente, ome’ẽ jevyva’erã peẽme pene pan oñeha’ãvo ipohyikue; ha pe’u ramo jepe napeneryg̃uatãmo’ãi.

27Ha ko’ã mba’e rupi napecherendúi ramo, ha peñemoĩve ramo gueteri cherehe, pende Ruete he’i:

28Che añemoĩvéta pochypópe penderehe, ha pohaviráta 7 jevyve pene angaipa vai rehe,

29ha pe’úta pende ra’ykuéra ha pende rajykuéra ro’okue jepe.

30Ha ahundíta umi yvy ijyvatéva pemomba’eguasuhápe pende jára gua’u, ha aitypáta pende jára gua’u ra’ãngakuéra, ha amombóta pende retekue pende jára gua’u ra’ãnga rete oikove’ỹva ári, ha che ánga ojeguarúta pendehegui.

31Pende tavakuéra ha pe óga jojohuha ambotaperéta, ha nahetũmo’ãi pene mba’e ryakuã asy.

32Che voi ambotaperéta pene retã, ha oñepy’andyipáta penderehe ija’e’ỹva oikévo pene retãme ha ohechávo ko’ã mba’evaiete.

33Che pomosarambíta tetãnguéra rupi, ha amondóta che kyse puku pende rapykuéri; ha pende táva ha pende yvýgui oikóta tapere.

34Upéramo umi ára itapere aja pukukue pende yvy oguerekova’erã ijepytu’uha ára, peẽ peikoramo g̃uarã penderehe ija’e’ỹva retãme.

35Umi ára itapere aja pukukue opytu’úta, ndopytu’úi haguére umi jepytu’uha ára peẽ peiko ramoguare ipype.

36Ha umi hembýva pende reheguakuéragui ambopy’amirĩta penderehe ija’e’ỹva retãme, peteĩ yvyra rogue ryapúgui okañyva’erã ha okañýta ichugui ku oñekañy ramoguáicha kyse pukúgui, ha ho’ava’erã hikuái avave omuña’ỹre ichupekuéra.

37Oñepysãngapava’erã ojuehe ku oñani ramoguáicha kyse pukúgui, avave nomuñái ramojepe ichupekuéra; ha napendepu’akamo’ãi umi penderehe ija’e’ỹva rehe.

38Ha pemanóta ambue tetãme, ha umi penderehe ija’e’ỹva yvy penembokusuguéta.

39Ha umi pendehegui hembýva ikangypáta penderehe ija’e’ỹva retãme iñaña reko rupi; ituvakuéra py’a ikangypa haguéicha avei.

40Ha oñemombe’uva’erã hikuái heko ñañanguégui, ha ituvakuéra reko ñañanguégui, ha’ekuéra chembotavyse haguére ha oñemoĩ haguére cherehe.

41Upévare Che voi añemoĩta avei hesekuéra, ha ahejáta ojereraha ichupekuéra hesekuéra ija’e’ỹva retãme, upéicharamo oñemomirĩta ipy’apýpe ha ohechakuaava’erã heko ivaiha.

42Upéicharamo chemandu’a jevýta che ñe’ẽ ame’ẽva’ekue rehe Jacóbope, ha avei che ñe’ẽme’ẽ Isaac ha Abrahámpe, chemandu’a jevýta avei ko yvy kóva rehe.

43Ha ijyvy ojeheja reiva’erã opytu’u hag̃ua itapere aja, ha’ekuéra ojehaviráta katu iñaña haguére; nomomba’éigui hikuái che rembiapoukapy, ha hi’angakuéra omboykégui che ñe’ẽ.

44Upéicharõ oiko aja hesekuéra ija’e’ỹva retãme, Che namboykepamo’ãi ichupekuéra, ha nahundipamo’ãi ichupekuéra opyrũ haguére che ñe’ẽme’ẽ rehe, Che ningo Jahve, Ijára.

45Chemandu’áta uvei hesekuéra ha Che ñe’ẽme’ẽ ymaguare rehe, aguenohẽ ramoguare rehe ichupekuéra Egípto retãyguakuéra resa renondégui, aiko hag̃ua Ijára ramo, Che Jahve.

46Ko’ãva hína umi ñe’ẽ, tekombo’e ha tembiapoukapy Ñanderuete ome’ẽva’ekue Moises po rupi Israelguakuérape g̃uarã Sinai cérrope.