1Heko potĩva omano ha ndaipóri avave ojepy’apýva hese; umi ohayhúva Ñanderuetépe omano ha ndaipóri avave ohechakuaáva heko porã rupi ojejuka hague ichupekuéra.
2Oiko py’aguapýpe ha opytu’u porãva’erã hupápe mayma ojeroviáva Ñanderuete rehe.
3Peẽ katu peñemboja ko’ápe, peẽ kuña paje apoha membykuéra, kuimba’e omyakã ratĩva ha kuña reko vai ñemoñarenguéra.
4Mávarehepa peñembohorýra’e. Mavarehépa pejejurupe’ara’e ha pembopukúra’e pene kũ. Peẽ piko ndaha’éi umi heko ñemoĩséva ha ijapúva ñemoñarenguéra.
5Peẽ peñembohakúva yvyra terebínto guýpe ha ambue yvyraguasu rakã guýpe, ha peikuave’ẽva pende ra’ykuérape umi cerrokuéra pa’ũme, y osyryhápe ha umi itaguasu pa’ũme.
6Nde Israel remomba’eguasu avei umi ita isỹiva rejohúva ysyrýpe, umíva nde po’a jeporavokue; ha ã itápe g̃uarã reñohẽkuri ne víno kuave’ẽmby ramo ha reikuave’ẽ avei ambue ne kuave’ẽmbynguéra. Ndahaviramo’ãi piko ko’ã mba’e.
7Pe cérro ru’ãme remoĩ nde rupa; ha upépe avei rejupi reikuave’ẽ hag̃ua.
8Nde róga rokẽ horcon kupépe remoĩra’e nde jára gua’u ha chehegui nderesarái, upéi reñemboi reñeno hag̃ua ambue ndive nde rupa porãme, rejogua ichupe ha rema’ẽ nde jára gua’u rehe.
9Ha reho pe jára Melec rendápe, reguerahávo acéite ha mba’e ryakuã asy porãva ichupe g̃uarã, ha mombyry remondo ne ñe’ẽ rerahára reikuaave hag̃ua mba’éichapa nde ikatu remomba’eguasu ambue jára gua’úpe ha mba’éichapa ikatu reguejy omanóva retãme (espiritísta).
10Nekane’õ ramojepe nde rape pukuetépe, nde’ereiva’ekue: Apoipáta, nde reñemokyre’ỹ jevy uvei ha nandepy’akangýi.
11Ha mávaguipa reñemondýi ha rekyhyjéra’e nderejeroviavéi hag̃ua cherehe, ha nanemandu’avéi cherehe, ha ipahápe repoiete chehegui. Umi ára ymaite guivéma akirirĩmive aikóvo ha upévagui nderekyhyjéi chehegui.
12Ko’ág̃a katu Che ahechaukáta nde reko ha ne rembiapokue, ha nde pu’aka nanepytyvõmo’ãi mba’evetépe.
13Ág̃a nde rejerure ramojepe sapukaipópe nde jára gua’u ra’ãngápe nepytyvõ hag̃ua, rehechakuaáta nanepytyvõmo’ãiha, pe yvytu uvei oguerahapáta, oipeju ramo isarambipáta; umi cherehe ojeroviávape katu oñeme’ẽta ijyvy imba’eteerã, ha che cérro oñemboykemava’ekue oñeme’ẽta avei ichupekuéra imba’etee ramo.
14Upéramo Ñanderuete he’i: Pembosako’i ha pembojojáke pe tape, pemopotĩ pe tape, ha peipe’a che retã rapégui umi ñepysãngaha.
15Péicha he’i pe Ijyvatetéva, pe oisãmbyhypáva tapia g̃uarã iguapyhágui ha hérava Heko porãitéva: Che aisãmbyhy ijyvatehágui ha aiko ikane’õva ha ojepy’apýva ndive, amokyre’ỹ jevy hag̃ua umi ikane’õva ha oñemomirĩvape.
16Ndachepochymo’ãi tapiaite ni ndorohaviramo’ãi opaite árape, ỹrõ oimeraẽva pytu ojepy’apyetereíta ha yvyarigua ánga ojejopyetereíta, umíape Che voi amoingovemava’ekue.
17Israel reko iñaña ha ha’enteséva chembopochy, upévare ajahéi hese, ha pochypópe añomi che rova; Israel katu oguatave gueteri hape vai rupi, ha’e voi oiporavova’ekue.
18Ahechapa voi ningo hapekuéra; upeichavéramo jepe amonguerase ko’ág̃a ichupe ha amboguata jevýta ichupe ha amoangapyhýta umi imba’embyasývape.
19Ha aporombopurahéita: Py’aguapy, py’aguapy ame’ẽse umi mombyry ha ag̃ui oikóvape, he’i pende Ruete; ha amonguera jevýta che retãme.
20Ha umi iñañáva katu ojogua yguasu pochýpe, oipeju jave yvytu’atã vai nokirirĩkuaái ha hi’y omopu’ã mba’e ky’a ha tuju.
21Iñañáva rekovépe ndaipóri py’aguapy, he’i pende Ruete.
Who We AreWhat We EelieveWhat We Do
2025 by iamachristian.org,Inc All rights reserved.
