Jeremías 34 - Biblia en Guaraní - ?anderuete ?e’? Por? 2015

Jeremías oñe’ẽ Sedequíaspe

1Ñanderuete ñe’ẽ ou Jeremíaspe, Nabucodonosor, Babilónia retã ruvicha ha mayma isoldadokuéra, omongora aja Jerusalénpe ha ambue Juda tavakuérape heta tetãyguakuéra ndive, oĩva ipoguýpe.

2Péicha he’i pende Ruete, Israel Jára: Tereho ha eñe’ẽ Sedequíaspe, Juda retã ruvichápe, ha ere ichupe: Péicha he’i pende Ruete, eikuaa porãke, ko táva Che ame’ẽma Babilónia retã ruvicha pópe, ha’e ohapy hag̃ua.

3Ha nde ndaikatumo’ãi rekañy ipógui, katuete ha’ekuéra ndejapyhýta ha nemoĩta ipópe, nde resa ohecháta Babilónia retã ruvicha resa, ha nde juru oñe’ẽta hendive ha reg̃uahẽta Babilónia retãme.

4Upeichavéramo jepe, nde Sedequías, Juda retã ruvicha ehendu Ñanderuete ñe’ẽ: Péicha he’i Ñanderuete nderehe: Neremanomo’ãi kyse puku rupi.

5Py’aguapýpe rembotýta nde resa, ha nde rukuéra, umi tetã ruvicha nde mboyveguare rehe ojehapy haguéicha mba’e ryakuã asy oñeñotỹ rire, péicha ojehapýta avei ndéve g̃uarã, ha ndeguerojahe’óta hikuái, he’ívo: Angái, karai; Che ha’égui ko’ã ñe’ẽ, upévare katuete oikóta avei, he’i pende Ruete.

6Ha Jeremías he’ipaite ko’ã ñe’ẽ tetã ruvicha Sedequíaspe, Jerusalénpe.

7Ha Babilónia retã ruvicha soldadokuéra ojeityve Jerusalen ári, Laquis ha Azeca ári; ko’ãvahína umi táva ikorapy jere yvatéva hembýva gueteri Juda táva apytégui.

Jeremías oñe’ẽ pohýi umi mba’e ojejapova’ekue umi tembiguái ojepoíva guive rehe

8Ñanderuete ñe’ẽ ou Jeremíaspe, Sedequías oñe’ẽme’ẽ rire hetãyguakuéra ndive ojepoipa hag̃ua umi tembiguái (esclávo Israel pegua) oikóva guive Jerusalénpe.

9Peteĩteĩ topoi hembiguái kuimba’e ha kuñágui, Israelguáva guive; ani hag̃ua avave oiporuvétei Judayguakuérape, ipehẽnguekuéra, hembiguái ramo.

10Ha iñe’ẽrendupa opaite mburuvicha ha tetãygua oikéva guive ko ñe’ẽme’ẽme opoi hag̃ua hembiguái kuimba’e ha kuñágui, ha ani hag̃ua avave oiporuve ichupekuéra hembiguái ramo, upévare opoipa ichuguikuéra.

11Ha opoipa rire ou ombyasy hikuái ha oguerupa jevy hembiguái kuimba’e ha kuñakuérape ha oguereko jevy hikuái ichupekuéra hembiguaikuéra ramo.

12Ha ou Ñanderuete ñe’ẽ Jeremíaspe, ha he’i:

13Péicha he’i pende Ruete, Israel Jára: Che añe’ẽme’ẽmava’ekue pende rukuéra ndive aguenohẽ ramoguare ichupekuéra Egípto retãgui, tembiguái rógagui, ha’évo:

14Oñepyrũvo pe áño 7-hápe peteĩteĩva opoiva’erã ipehẽngue Israelgua ojoguamava’ekuégui; oikova’erãnte tembiguái ramo 6 áño pukukue ha upéi opoiva’erã ichugui sã’ỹre, ha pende rukuéra nacheñe’ẽrenduiva’ekue, ha nohendúi che ñe’ẽ.

15Ha peẽ ningo ko ára kóvape peñembohekove pyahúkuri, ha pejapo hekoite pegua che resa renondépe; pepoívo pende rapichakuéragui; ha peme’ẽva’ekue pene ñe’ẽ che rovake, pe óga mamo oñehenoiháme che réra.

16Ha pejevy pemongy’a hag̃ua che réra, ha pejagarra jevy pene rembiguái kuimba’e ha kuñávape, pepoimava’ekue, opyta jevy hag̃ua hikuái pende poguýpe; ha peju pejoko ichupekuéra oiko jevy hag̃ua pene rembiguái ramo.

17Upévare Che, pende Ruete, ha’e peẽme: Peẽ nacherendúi haguére pepoi hag̃ua pene pehẽnguekuéra ha pene irũnguéragui Che ndapoimo’ãi avei kyse puku, pe mba’asy iñasãiva ha ñembyahýigui, he’i pende Ruete; ha pomoĩta ñemondyiguasu ramo tetãnguéra yvy apére oĩva guivépe.

18Ha umi tetãygua naiñe’ẽrenduiva’ekue che ñe’ẽme’ẽme, ha ndojapoiva’ekue pe ñe’ẽme’ẽmby he’i háicha ha ojapo vaiva’ekue che renondépe, omboja’óvo hikuái pe tóro ra’yrusu mbytépe ha ohasa ipa’ũ rupi (ijepokuaa, omoañete hag̃ua iñe’ẽme’ẽ).

19Umi Judaygua ha Jerusalen ruvichakuéra, umi karaiguasu, umi pa’i ha mayma tetãygua ohasava’ekue guive pe torora’y mbytére rupi,

20amoĩta ichupekuéra hesekuéra ija’e’ỹva pópe ha ijukaseharakuéra pópe; ha he’õnguekuéra opytáta guyra ha umi mymba saite ñarõ rembi’urã ramo.

21Ha Sedequías, Juda retã ruvicha, ha umi mburuvichápe amoĩta hesekuéra ija’e’ỹva ha ijukasehára pópe, ha pe Babilónia retã ruvicha soldadokuéra pópe, ame’ẽmbáta ohopa hag̃ua ko’ág̃a.

22Pema’ẽ porãke, Che ha’éta ichupe, ou jevy hag̃ua ko táva kóvape, ha’e ojeitýta hi’ári ha omoĩta ipoguýpe, ha upéi ohapýta ko távape; ha ambotaperéta umi táva Juda pegua, ndaiporivéi peve avave ipype.