Isaías 5 - Biblia en Guaraní - ?anderuete ?e’? Por? 2015

Parralty

hi’a’ỹva

1Ko’ág̃a apurahéita peteĩ purahéi cherayhúvape g̃uarã iparralty rehe. Che irũ parralty oĩ yvy porãme cérro yke rehe.

2Oipe’apa umi ita ojo’o porã hag̃ua pe yvy ha upéi oñotỹ parral rakãnguéra ojeporavopyréva; ha iparralty mbytépe omopu’ãva’ekue peteĩ óga yvate ha ojapo avei peteĩ parralty oñami hag̃ua; ha oha’ãrõ hi’a porã, hi’a katu parral hái.

3Ko’ág̃a peẽ Jerusalen ha Judaygua pembojovake porãke ha pemombe’u chéve mávapa ojavy.

4Mba’épa ikatu ojejapovéra’e che parralty rehe, Che ajapo’ỹmava’ekue hese. Mba’éicha rupípa ou hi’a parral hái ha Che aha’arõiteva’ekue hi’a he’ẽva asytaha.

5Ahechaukáta peẽme, mba’épa Che ajapóta che parralty rehe: Aitýta ikorapy jere, aipe’áta pe ñuatĩndy oĩva ijerekuévo oñepyrũmba hag̃ua hese.

6Ahejáta ta’itapere; noñehakã’omo’ãvéima ha ndojejo’omo’ãi hapo jerekue rehe, okakuaa hag̃ua ipype ñana ha ñuatĩndy; ha umi araípe ha’éta ani hag̃ua oñohẽtei ama hi’ári.

7Añetehápe Israel retã, yvága atykuéra Jára parralty voi, ha kuimba’ekuéra Juda pegua iñemitỹ ojeporavopyréva; Ñanderuete oha’ãrõ teko porã ha péina ápe heñói ñaña reko; oha’ãrõ py’aguapy ha péina oñehendu ipype ipyahẽ asy.

Cháke umi ha’enteséva

8Cháke, peẽ pembyatýva heta óga ojoykére, ha cháke peẽ pembojoajúva pende kokue ykére ambue kokue peẽ pepyta peve yvyjára ramo ko tetã kóvape.

9Che apysápe ahendu Ñanderuete ñe’ẽ he’íva: Añetehápe heta óga oñemonandíta iporã ha ituicha ramojepe.

10Oñemono’õ ramo jepe 2,5 hectárea parralty oñemyenyhẽnte peteĩ víno ryru, 22 lítro, ha oñeñotỹ ramojepe 220 kílo trígo oñemono’õnte 22 kílo.

11Cháke, peẽ pepu’ãva pyharevete pe’u hag̃ua víno ka’aru pytũ meve, peka’u ha peñembyaku hag̃ua.

12Oka’u jave ojapysaka hikuái mbaraka ha árpa pu rehe, mimby ha tambor pu rehe, noma’ẽi katu Ñanderuete rembiapokue rehe, ha ndojepy’amongetaséigui ipo rembiapokue rehe.

13Che retãyguakuéra naiñakã porãigui ojegueraha jepokuahápe tetã ambuépe ha upépe imburuvichakuéra iñembyahyiva’erã ha hetãyguakuéra ijy’uheieteva’erã.

14Upévare pe omanóva retã oipe’a tuicháta ijuru omokõ hag̃ua Sion pegua mburuvichakuéra ha hetãyguakuérape oikóva vy’apópe ha ayvuguasúpe.

15Upévare Ñanderuete omomirĩva’erã hetãyguakuérape, oityva’erã ichupekuéra yvýre ha omotĩta umi oñembotuichávape.

16Ñanderuete katu oñemomba’eguasuva’erã iñembojovake hekoite pegua rupi, ha Ñanderuete justícia rupi ohechaukáta heko iporãha.

17Upépe okarúta ovecha ra’ykuéra ñu meguáicha ha itaperéta oñemongyráta kavarakuérape.

18Cháke peẽ peñapytĩva pene rembiapo vai ñembotavy sã reheve, ha pemosãva pene rembiapo vai cárro sã reheve, pya’eve oñemosarambiva’erã.

19Peẽ pejéva: Tou pya’e ha pya’e Ha’e tojapo hembiapo, jahechakuaa hag̃ua hembiapo; ha toñemboja pe Heko Potĩva hekombo’e reheve Israel retãme, jaikuaa porã hag̃ua Ha’e oĩha.

20Cháke, peẽ pejéva mba’evai iporãha; ha iñypytũva rehe peje hesakãha; ha mba’e iróvare peje he’ẽha; ha mba’e he’ẽvare peje iroha.

21Cháke, peẽ voi peimo’ã penearandu ha peneakãguapyha.

22Cháke, peẽ pendepy’aguasúva pe’u hag̃ua víno ha peẽ kuimba’e pendekatupyrýva pembojoparáva opaite mba’e oporomonga’ukuaáva guive.

23Cháke, peẽ pepoíva iñañávagui oñeme’ẽgui peẽme jopói ha pe heko potĩvape pemoinge cárcelpe.

24Pemboyke haguére Ñanderuete rembiapoukapy ha iñe’ẽ porã peñehundíta, ku tata ohapy háicha umi temitỹngue ha kapi’i pirukue; peẽ pendetujúta ku yvyra rapo tuja ituju háicha ha upéi peñemosarambipáta, oñemosarambi háicha opárupi umi yvyra potykue.

25Ko’ã mba’e rupi Ñanderuete oñemoĩ hetãyguakuéra rehe, ha oipyso ipo ohavira hag̃ua ichupekuéra. Umi cérro oryryipa. He’õnguekuéra oñemombopa tapére ytýicha ha upeichavéramo jepe ndopíri ipochy, ha ojepyso gueteri hína ipo.

26Ha’e omopu’ãva’erã ipoyviveve tetãnguéra mombyryguápe g̃uarã, ha oturuñe’ẽta umi oĩva yvy apýrape pya’e ou hag̃ua.

27Ijapytepekuéra ndojejohumo’ãi ikane’õva térã oñepysãngáva; avave ndahopehýiri ha avave ndokemo’ãi; avavégui ndojeramo’ãi iku’akua jokuaha ha ndosomo’ãi ichuguikuéra isapatu sã.

28Ihu’ykuéra hãimbe porã, iguyrapa sãnguéra ojepyso hatã, henda kavaju pysãpẽ hatã itáicha ha icárro ruéda iñakuã yvytu ratãicha.

29Okororõta leõ kuñáicha, ku leõ ra’ýicha ongururu, omopururũta hãinguéra ojeity hag̃ua hembi’urã rehe, ogueraha hag̃ua kyhyje’ỹme, ha ndaipóri oipe’a jevyva’erãva ijurúgui.

30Ha upe ára upévape osunúta hi’ári ku yguasu pochy hyapu háicha; ha oma’ẽvo pe tetã rehe ojehecha pytũ oporomongyhyjéva oñu’ã pe yvy, ha arai anambusu omoypytũ pe tesape.