1 Réyes 21 - Biblia en Guaraní - ?anderuete ?e’? Por? 2015

Acab ha Nabot parralty

1Ohasapávo ko’ã mba’e ningo ojehu, Nabot, peteĩ Jizreelgua, oguereko peteĩ parralty, Acab, pe Samária retã ruvicha rogaguasu rembe’ýpe.

2Ha Acab he’i Nabótpe: Eme’ẽna chéve nde parralty, ajapose ichugui che huertarã hi’ag̃ui porãgui che rógagui, ha che ame’ẽta ndéve ambue parralty iporãvéva kóvagui; ha iporãvéta ramo ndéve, ame’ẽta ndéve hese pirapire.

3Ha Nabot he’i Acábpe: Atĩetéta Ñanderuetégui, ame’ẽ ramo ndéve che rukuéra yvyteéva.

4Ha Acab ou hógape mba’embyasy ha pochy reheve, Nabot, pe Jizreelgua, he’iva’ekue rehe ichupe: Name’ẽmo’ãi ndéve che rukuéra yvyteéva. Ha oñeno hupápe, ha ombojere hova tápia gotýo, ha ndokarúi.

5Ha hembireko, Jezabel, ou hendápe ha he’i ichupe: Mba’érehe piko ndepochy ha nderekaruireína.

6Ha ha’e he’i ichupe: Añe’ẽ Nabot, pe Jizreelgua ndive, ha che ha’e ichupe ome’ẽ hag̃ua chéve iparralty pirapire rehe, térã ambue parralty rehe, ha’e katu ombohovái chéve: Che name’ẽmo’ãi ndéve che parralty.

7Ha hembireko Jezabel he’i ichupe: Nde ningo Israel retã ruvicha. Epu’ã, ekaru ha evy’a, che voi ame’ẽta ndéve Nabot, Jizreelgua parralty.

8Upéramo ha’e ohai kuatiañe’ẽ Acab rérape, ha ofirma rire, ha’e oguerahauka karai ancianokuéra ha mburuvichakuérape oikóva Nabot távape.

9Ha pe kuatiañe’ẽ ha’e ohaiva’ekue, péicha he’i: Pemoherakuã karu’ỹrã, ha pemoĩ Nabótpe tetãyguakuéra renondépe.

10Ha pemoĩ mokõi kuimba’e heko ñañáva, he’iva’erã hese péicha: Nde reñe’ẽvai Ñanderuete ha tetã ruvicha rehe. Upéi penohẽ ichupe okápe ha peity hi’ári ita omano meve.

11Ha umi tavaygua karai anciáno ha mburuvichakuéra, oikóva pe távape, ojapopa Jezabel he’i haguéicha ichupekuéra ikuatiañe’ẽme.

12Upérõ omoherakuã hikuái karu’ỹ ha omoĩ Nabótpe tetãyguakuéra renondépe.

13Ha omog̃uahẽ hikuái mokõi kuimba’e ñaña henondépe ha ãva oñe’ẽvai Nabot rehe, he’ívo: Nabot oñe’ẽvai Ñanderuete ha tetã ruvicha rehe. Ha ogueraha táva oka gotýo ha ojuka ichupe hikuái, ojapívo ichupe itápe.

14Upéi he’iuka hikuái Jezabélpe: Nabot omanóma.

15Jezabel oikuaávo Nabot omanóma hague, he’i Acábepe: Epu’ã ha eñemomba’e Nabot parralty Jizreel pegua rehe, nome’ẽseiva’ekue ndéve pirapire rehe. Nabot ndoikovéima, ha’e omanóma.

16Ha Acab ohendúvo, Nabot omanóma hague, opu’ã oguejy Jizreélpe, Nabot parraltykuére, oñemomba’e hag̃ua.

17Upémaramo Ñanderuete ñe’ẽ ou Elías, pe Tisbeguápe, he’ívo:

18Epu’ã eguejy rehug̃uaitĩ hag̃ua Israel retã ruvicha Acab ndive, oĩva Samáriape, péina ha’e oime Nabot parraltykuépe, pépe oguejýkuri oñemomba’e hag̃ua hese.

19Ha eñe’ẽ ichupe, péicha he’i Israel Jára: Ndereporojukáipa ha ndereporomondaipareína. Ha eñe’ẽ jevy ichupe erévo, péicha he’i pende Ruete: Jaguakuéra oheréi haguépe Nabot ruguykue, upepete jaguakuéra oheréita avei nde ruguy.

20Ha Acab he’i Elíaspe: Cherayhu’ỹva piko chejohu jevy. Ha Elías ombohovái ichupe he’ívo: Rojohu rejapo vaígui Ñanderuete renondépe, remondágui Nabot yvy pehẽngue.

21Eikuaa porãke, Che agueru mba’evai ndeári, ha aitypeíta nde ra’ykuérare, ahundi peve opaite kuimba’e nde rógagui, taha’e tembiguái térã tembiguai’ỹ Israel retãme.

22Ajapóta avei nde rogayguakuéra rehe ajapo haguéicha Jeroboam, Nebat ra’y rehe, ha Basa, Ahías ra’y rogayguakuéra rehe, nde repu’ã haguére cherehe chembopochývo, ha remoangaipágui avei Israelguakuérape.

23Ñanderuete oñe’ẽ avei Jezabel rehe, he’ívo: Jaguakuéra ho’uva’erã Jezabel ro’o, Jizreel korapy jere ypýpe.

24Acab rogaygua omano ramo távape, jaguakuéra ho’úta ichupe, ha hogaygua omano ramo ñúme guyra ovevéva ho’úta ichupe.

25Añetehápe ndaipóri ambue Acábeicha, ojapo ivaíva Ñanderuete resa renondépe, hembireko Jezabel omyañágui ichupe iñaña reko gotýo.

26Ha’e ojapógui heta mba’e ivaietereíva, oiko jára gua’u ra’ãnga rapykuéri, Amorguakuéra ojapo hagueichaite, upévagui Ñanderuete voi omosẽva’ekue ichupekuéra hetãteégui Israel ñemoñarenguéra renonderãgui.

27Ha ojehu, Acab ohendúvo ko’ã ñe’ẽ, omondoro ijao ha oñemonde ao vosakuépe ha ohasa karu’ỹ rehe, ha oñeno oke hag̃ua ijao reheve, oñembyasyetégui.

28Upémaramo Ñanderuete oñe’ẽ Elías, pe Tisbeguápe, he’ívo:

29Nderehecháipa mba’éichapa Acab oñemomirĩ añete che renondépe. Ha’e oñemomirĩ añete haguére che renondépe, ndaguerumo’ãi mba’e ivaíva ha’e oikove aja, aguerúta katu mba’evai ita’ýra oikove ajánte.