Apocalípsis 11 - Biblia en Guaraní - ?anderuete ?e’? Por? 2015

Mokõi techahare

1Ha oñeme’ẽ chéve peteĩ takuára ojoguáva yvyra po’ípe, ha oje’e chéve: Epu’ã ha eha’ã (emedi) Ñanderuete rogaguasu ha pe kuave’ẽmby renda ha eipapa umi upépe oñembo’évape,

2pe korapy oka gotýo oĩva katu anítei reha’ã, oñeme’ẽmagui tetãyguakuéra ojerovia’ỹvape oñemomba’e hag̃ua hikuái Jerusalen rehe 42 jasy javeve,

3ha Che ame’ẽta che mokõi techaharépe pu’aka omyasãi hag̃ua Che ñe’ẽ, 1260 ára (día), oñemondepyréva hikuái vosa sorópe (ñandéve g̃uarã he’ise ao hũme).

4Ko’ãva ningo umi mokõi olívo yvyra ha umi mokõi tataindyenda, oñembo’ýva yvy Jára renondépe.

5Ha oimeraẽva ojapo vaiséva hesekuéra ohasa asýta, osẽgui tata ko’ã techahare jurúgui ohapypáva hesekuéra ija’e’ỹvape. Ha oimeraẽ ohundiséva ko’ã techaharépe omanova’erã.

6Ko’ã techahare ipu’aka ojoko hag̃ua araikuéra ani hag̃ua oky, umi ára ha’ekuéra oprofetiza (omomarandu) aja, ha’ekuéra ipu’aka avei y rehe ojapo hag̃ua ichugui tuguy, ha ipu’aka avei hikuái ombohasa asy hag̃ua heta jevy tetãyguakuérape opaichagua plága rupi, ha’ekuéra oipotaha peve.

7Ha ha’ekuéra ojapopávo hembiapo, pe mymba vai ojupíta pe yvykua pypukuetégui (yvypore’ỹgui) oñorãirõ hag̃ua hendivekuéra ha ombopoguy rire, ojukáta ichupekuéra.

8Hetekuekuéra ojehejáta ojepyso pe távaguasu cállepe, oñembohérava Pytu rehegua ñe’ẽme Sodóma térã Egípto, upépe oñemosãingova’ekue avei kurusúre Ijárape.

9Ha umi tetã, tribukuéra, opaichagua ñe’ẽ ha yvyariguakuéra oma’ẽ hetekuekuéra rehe mbohapy ára imédio pukukue ha ndohejamo’ãi oñeñotỹ hag̃ua ichupekuéra.

10Ha umi tetãyguakuéra ovy’a ha hory joaitégui oguerahaukáta ojupekuéra jopói, ko’ã mokõi techahare omyangekõiete haguére umi yvy ári oikóvape.

11Ha mbohapy ára imédio rire Ñanderuete omboúvo Pytu tekove rehegua hetekuépe, oñembo’y jevy hikuái ha oñemondyipáta ohecháva guive ichupekuéra.

12Ha ko’ã techahare ohendu peteĩ ñe’ẽpu he’íva ichupekuéra: Pejupi ko’ápe. Ha ojupi hikuái yvágape peteĩ araípe, ha hesekuéra ija’e’ỹva oma’ẽ hesekuéra.

13Ha upejave oiko yvyryryiguasu, ha pe óga atyguasu apytégui cáda óga 10-ha ho’a ha 7.000 hetãygua omano, ambuekuéra ohecháva guive umi mba’e oñemondyiete, ha omomba’eguasu Ñanderuete yvága peguápe.

14Pe jehasa asyguasu mokõiha ohasáma, pe mbohapyha og̃uahẽmbotáma avei.

Pe turu 7-ha

15Ha pe yvága rembiguái 7-ha ombopúvo ituru oiko peteĩ ñe’ẽpu tuicháva yvágape he’íva: Yvy arigua tetãnguéra opytáma Ñanderuete ha Icrístope g̃uarã, Ha’e oisãmbyhy hag̃ua tapia g̃uarã.

16Ha umi 24 karai anciáno, oguapýva iguapyhakuérape Ñanderuete guapyha renondépe, ojeity ovapývo omomba’eguasu hag̃ua Ñanderuetépe,

17ha he’i hikuái: Ore roagradece ndéve, ore Jára Ndepu’akapáva, Nde reikovevareína, reikomava’ekue ha rejuva’erãva, nde reñepyrũma reisãmbyhy hag̃ua nde pu’akapa rupi.

18Umi tetã ipochypa joa, ha og̃uahẽma avei ndepochyha ára ha oúma pe ára Nde rembojovake hag̃ua umi omanomava’ekuépe ha remyengovia hag̃ua ne rembiguaikuérape, Nde profetakuéra rembiapo ha umi heko potĩvape, taimichĩ térã taituicha, og̃uahẽmagui avei pe ára Nde rehundi hag̃ua umi ombyaívape ko yvy kóvape.

19Ha ojepe’a Ñanderuete rogaguasu oĩva yvágape ha ojehecha pe karameg̃ua, péva rupi ojehechauka Ñanderuete oñembopy’apeteĩ hague Israel retã ndive, ha oiko aratiri, ñe’ẽpu, arasunu, yvyryrýi ha amandauguasu.