Levítico 18 - Biblia en Guaraní - ?anderuete ?e’? Por? 2015

Menda rembiapoukapy

1Ñanderuete oñe’ẽ Moiséspe, ha he’i:

2Eñe’ẽ Israel ñemoñarenguérape, ha ere ichupekuéra: Che ha’e Jahve, pende Ruete.

3Ani peiko Egiptoygua oiko háicha, peẽ peiko haguépe avei, ha ndapejapoiva’erã ojejapo háicha Canaanguakuéra, mamo Che poguerahasehápe, ha ndapeikoiva’erã hembiapoukapykuéra he’i háicha.

4Che rembiapoukapy katu pejapova’erã, ha che rembipota pejapova’erã, peikova’erã Che ha’e haguéicha peẽme, Che ningo Jahve, pende Jára.

5Upéicharupi pejapova’erã che ñe’ẽ, che mbo’epy ha che rembiapoukapy, umi kuimba’e térã kuña ojapóva che rembipota oikoveva’erã, Che ningo Jahve, pende Ruete.

6Mba’eveichagua kuimba’e ani oñemog̃uahẽtei ipehẽngue rehe, oñeno térã oiko hag̃ua hendive. Che ningo Jahve, pende Ruete.

7Nde ru ha nde sy ijopívova nderehechaiva’erã; ha’égui nde sy, upévare nderehechaiva’erã ijopívo,

8ani reiko nde ru rembireko ndive, oñeme’ẽgui ichupe g̃uarãnte.

9Ani reiko ne reindy ndive (omendavakuéra oiko háicha), nde ru rajy térã nde sy memby ndive, onacéva nde rógape térã okápe.

10Ani reiko nde ra’y rajy ndive, térã nde rajy memby ndive, ha’ekuéra oikógui nde rajyteévaicha.

11Ani reiko nde ru rembireko membykuña ndive, nde ru omoheñoiva’ekue, péva ningo ne reindy, nderehechaiva’erã ijopívo.

12Ani reiko nde ru reindy ndive, péva ningo nde ru pehẽngueteéva.

13Ani reiko nde sy kypy’y ndive, péva ningo nde sy pehẽngueteéva.

14Ani reiko nde ru ryvy rembireko ndive; nereñemog̃uahẽiva’erã hembireko rehe; ha’égui nde ru ryvy rembireko.

15Ani reiko nde ra’y rembireko ndive, péva ningo nde ra’y rembireko, nderehechaiva’erã ijopívo.

16Ani reiko nde ryvy rembireko ndive, ha’égui nde ryvy rembireko.

17Nde ndereikoiva’erã peteĩ kuña ha imembykuña ndive, ni imembykuimba’e rajy térã imemby membykuña ndive; ne pehẽnguégui hína, kóva ningo ñaña reko.

18Ani remenda avei ne rembireko ryke térã ikypy’y rehe, ne rembireko oikove aja, (Génesis 30,12).

19Nde ndereikoiva’erã ne rembireko ndive ikuña mba’asy aja.

20Ani reiko nde rapicha rembireko ndive, reñemongy’águi hendive.

21Aníke reme’ẽ nde ra’y térã nde rajy oñekuave’ẽ hag̃ua Molócpe (Canaangua járape) tata rupi; aníke péicha remongy’átei nde Jára réra, Che ningo Jahve.

22Nereñenoiva’erã kuimba’e ndive, kuña ndive ramoguáicha; péva mba’evaietereirasa.

23Ani kuimba’e térã kuña oiko tymba ndive, mba’evaietereirasa péva.

24Mba’eveichagua ko’ã mba’e rupi napeñemongy’aiva’erã; opaite ko’ã mba’e rupi Canaan retãnguéra oñemongy’ava’ekue ha upévagui Che amosẽta ichupekuéra pene renonderãgui,

25ha pe yvy ou oñemongy’apa; ha Che ahaviráta ichupekuéra, ha pe yvy og̃ue’ẽ (oprovoca) umi ipype oikóvagui.

26Pejapóke che ñe’ẽ ha che rembiapoukapykuéra; Israelgua ni tetã ambueygua oikóva pene mbytépe ndojapoiva’erã ko’ã mba’e iky’aitereíva.

27Opaite ko’ã mba’evaiete, Canaan retãygua ojapo, ha hembiapo vaiete rupi omongy’apa Canaan yvy.

28Upévare anítei peẽ pemongy’a avei Canaan yvýpe pene rembiapo vai rupi, ỹrõ pe yvy penemosẽta avei.

29Oimeraẽva ojapóva guive ko’ã mba’e ivaietereíva ojejukava’erã hetãyguakuéra apytégui.

30Pejapóke che rembiapoukapy, ha anítei peñemongy’a avei oñemongy’a haguéicha Canaan retãyguakuéra. Che ningo Jahve, pende Jára.