1 Réyes 11 - Biblia en Guaraní - ?anderuete ?e’? Por? 2015

Salomón oñepysãnga ha ojei Ñanderuete rapégui

1Tetã ruvicha Salomón ohayhu faraon rajýpe, ha hendive hetaiterei ambue kuña tetã ambueyguápe: Moabgua, Amongua, Edomgua, Sidongua ha Hetguakuéra.

2Umíarehe Ñanderuete he’iva’ekue Israel ñemoñarenguérape: Napeñembojoajumo’ãi hesekuéra, ha ha’ekuéra noñembojoajuiva’erã penderehe, katuete omboykeva’erã pende py’a ijarakuéra rapykuéri, ha ãva rehe Salomón oñembojoaju mborayhupópe.

3Ha’e 700 hembirekoteéva, mburuvicha rajykuérava, ha 300 ambue kuña, opaite ko’ãva omombiavahína Salomónpe Ñanderuete rapégui.

4Ha Salomón itujáma ramo ohóvo ikuñakuéra omboyke Salomon py’apy Ñanderuete rapégui, omomba’eguasu hag̃ua ambue jarakuérape ipy’apy naipotĩvéigui Ñanderuete ndive, itúva David ñe’ãicha.

5Upéi Salomón omomba’eguasu Astarte, umi Sidongua jára kuñáme, ha avei Milcómpe, Amonguakuéra jára ahẽvape.

6Upéicha Salomón ojapo ivaíva Ñanderuete resa renondépe ha ndoiko porãvéi Ñanderuete rapykuéri itúva David oiko haguéicha.

7Upéramo Salomón omopu’ã peteĩ ñemomba’eguasu rendag̃ua yvate Quemos, Moab jára ahẽvape g̃uarã, pe cérro oĩ Jerusalén rovái; ha Molócpe, umi Amon ñemoñare jára ahẽvape g̃uarã avei.

8Péicha ojapo avei opaite ambue ikuña tetã ambueyguápe g̃uarã, ha ha’ekuéra ohapy ohóvo mba’e ryakuã porã ha oikuave’ẽ ijarakuérape g̃uarã.

9Ha Ñanderuete ipochy Salomón ndive, oñemboyke haguére Israel Járagui, ha hi’ariete ojehechaukava’ekue ichupe mokõi jevy.

10Ha oavisa porãva’ekue ichupe ko’ã mba’e rehe, ani hag̃ua oiko ambue jára rapykuéri, ha’e katu ndojapói Ñanderuete he’imava’ekue ichupe.

11Ha Ñanderuete he’i Salomónpe: Oĩgui ndepype ko’ã mba’e, ha reñemomombyrýgui chehegui ha nderejapovéi umi tembiapoukapy ha’emava’ekue ndéve, aipe’áta ndehegui ne retã guapyhaguasu ha ame’ẽta ne rembiguáipe.

12Ndajapomo’ãi katu nde rekovépe, nde ru David rayhupápe, aipe’áta katu nde ra’y pógui.

13Ndaipe’apamo’ãi, peteĩ tríbu ahejáta nde ra’ýpe g̃uarã, che rembiguái David rayhupápe ha Jerusalén rayhupápe, Che aiporavova’ekue.

14Upérõ Ñanderuete omopu’ã Salomón rehe peteĩ hese ija’e’ỹva: Hadad, Edom retã ruvicha ruguy reheguáva, ha oikóva Edómpe.

15David oiko ramoguare Edómpe, isoldádo ruvicha, Joab ojupi oñotỹ hag̃ua Israel re’õnguekuéra, ha upépe oĩ jave ojukapa kuimba’e Edom peguápe.

16Joab oiko upépe 6 jasy, ojukapa peve kuimba’ekuéra oĩva guive Edom retãme.

17Hadad katu okañy ha hendive Edom kuimba’ekuéra, itúva rembiguaikuéra, ha oho Egíptope; upéramo Hadad imitã gueteri.

18Ha opu’ã hikuái Madiángui ha ou Paránpe, ha Hadad ogueraha hendive kuimba’e Parangua, ha ou hikuái Egíptope, faraon Egípto retã ruvicha rendápe, ha ha’e ome’ẽ ichupe hogarã, hembi’urã ha ijyvyrã avei.

19Ha Hadad ojohu tuicha ñepytyvõ faraón rógape, ha’e ome’ẽ ichupe hovaja hembireko ramo, kóva hembireko Tahpenes kypy’y voi.

20Ha Tahpenes kypy’y imemby ichupe g̃uarã ita’ýra Genubat, faraón rógape, ha faraon ra’ykuéra apytépe ha’e oiko.

21Ha Hadad ohendúvo Egíptope David omano hague, ha Joab isoldádo ruvicha ojejukáma hague, he’i faraónpe: Ehejána, taha jevy che retãme.

22Faraón he’i ichupe: Mba’érehepa, ha mba’éiko reguereko chendive rehose hag̃ua ne retãme. Ha ha’e he’i jevy: Mba’eve, upeichavéramo jepe, ajerure ndéve cherejánte taha.

23Ñanderuete omopu’ã avei Salomón hese ija’e’ỹva ramo Rezon, Eliada ra’y, péva okañyva’ekue Hadadézer, Soba retã ruvichágui.

24Ha’e ombyatýma hapichakuéra omopu’ã hag̃ua hese, ha oiko peteĩ soldádo aty ruvicha ramo, David omosarambírõ guare Sobayguakuérape. Upéi oho hikuái Damáscope ha oiko upépe, ha omoĩ hikuái ichupe Damásco retã ruvicha ramo.

25Ha’e oñemoĩ Israel rehe Salomón oikove aja pukukue. Ha péva ári Hadad ndaija’éi Israel rehe, ha Rezon opyta Síria retã ruvicha ramo, ipochyete Israelguakuéra ndive.

26Jeroboam, Nebat ra’y, peteĩ Efraingua Seredágui, Salomón rembiguái voi, isy héravakuri Zerua ha iména omanova’ekue, omopu’ã avei ipo tetã ruvicha rehe.

27Jeroboam omopu’ã ipo tetã ruvicha rehe: Salomón omopu’ã jave Milo omboty porã hag̃ua itúva David táva tápia.

28Ha ko kuimba’e Jeroboam ipy’aguasu ha ikyre’ỹ, ha Salomón ohechávo ko mitãrusu oku’eha, omoĩ ipoguýpe umi Jose ñemoñarenguéra.

29Ojehu umi árape Jeroboam osẽvo Jerusaléngui, oñohug̃uaitĩ tapépe pe proféta Ahías, Silogua ndive, omondéva peteĩ ahoja pyahu ha mokõivéva ha’eño ojojohu hikuái ñúme.

30Ha Ahías ojapyhy ijahoja pyahu omondéva, ha omondoro 12 hendápe.

31Ha he’i Jeroboámpe: Ejapyhy ne mba’erãva ramo 10 pehẽngue, péicha Israel Jára he’ígui: Péina ápe che amondoro 10 tríbu Salomón retãgui ha ame’ẽta ndéve.

32Ha ichupe opytáta peteĩ tríbunte, che rembiguái David rayhupápe ha Jerusalén rayhupápe, pe táva Che aiporavova’ekue opaite Israel tríbu apytégui,

33ha’ekuéra opoi haguére chehegui omomba’eguasu hag̃ua Astarte, umi Sidongua jára kuñáva; Quemos, Moabgua járape; ha Moloc, Amon ñemoñare járape, ha ndoikovéima hekoitépe che resa renondépe, che ñe’ẽ ha che rembiapoukapykuéra he’i háicha ha David, itúva ojapo haguéicha.

34Ndaipe’amo’ãi hetã guapyha ha’e oikove aja pukukue, David che rembiguái rayhupápe, Che aiporavova’ekue, ha’e ojapova’ekuégui che ñe’ẽ ha che rembiapoukapykuéra.

35Aipe’áta katu pe tetã pu’aka ita’ýra pógui, ha ndéve ame’ẽta 10 tríbu.

36Ha ita’ýrape opytáta peteĩ tríbunte, che rembiguái David resape ohesape hag̃ua opaite ára che renondépe Jerusalénpe, pe táva Che aiporavova’ekue amoĩ hag̃ua ipype che réra.

37Upévare Che roiporavo, nde reisãmbyhy hag̃ua ne ánga oha’ãrõ háicha, ha reikóta tetã ruvicha ramo 10 Israel tríbu ári.

38Neñe’ẽrendu ramo opaite mba’e Che ha’étava guive ndéve rejapo hag̃ua, ha reiko ramo che rape rehe, ha rejapo ramo che resa renondépe mba’e iporãva, rejapóvo che rembiapoukapy ha che rembipota, che rembiguái David ojapo haguéicha, upéicharõ Che aĩta avei nendive ha amopu’ãta ndéve g̃uarã nde rógarã, amopu’ã haguéicha David róga, ha Che ame’ẽta ndéve ne mba’e ramo Israel retã.

39Ha Che aipy’apýta David ñemoñarenguérape ko’ã mba’e rehe, ndaha’emo’ãi katu opaite árape.

40Upévare Salomón oñeha’ã ojuka hag̃ua Jeroboámpe, Jeroboam katu opu’ã ha okañy Egíptope, Sisac, Egípto retã ruvicha rendápe, ha oiko Egíptope Salomon omano meve.

Salomón ñemano

41Ambue Salomón rembiapokuéra ha iñarandu ojehaipa Salomón rembiapokue kuatiañe’ẽme.

42Salomón oisãmbyhy Israel retãme 40 áño pukukue Jerusalénpe.

43Ha Salomón omano rire, oñeñotỹ ichupe itúva David távape, ha hendaguépe oisãmbyhy ita’ýra Roboam.