Salmokuéra 91 - Biblia en Guaraní - ?anderuete ?e’? Por? 2015

Ñanderuete oñangareko ñanderehe

1Upe oikóva pe Jára Ijyvatetéva ãme ha pe Ipu’akapáva poguýpe,

2he’ikuaa Ñanderuetépe: Nde, che Ruete, ne rendápe akañykuaa ha Nde che mo’ãha, Nde, che Ruete, nderehe ajerovia.

3Ha’e voi ningo neguenohẽ nde rapicha ñuhãgui, mba’asy iñasãivagui ha jehasa asýgui.

4Ipepópe neñuãmbáta ha kyhyje’ỹme reiméta ipoguýpe, heko añete nemo’ãta ha Ha’e oñangarekóta nderehe.

5Pyhare aja nderekyhyjemo’ãi mba’evégui, térã hu’ýgui ojepoíva arakuépe.

6Nderekyhyjemo’ãi mba’asy iñasãivagui og̃uahẽva pyharekuépe, térã jejuka guasúgui arakuépe oporombyaívagui.

7Nde asu gotýo ho’a ramo 1.000, ha nde akatúa gotýo 10.000, mba’eve ivaíva nanderupitymo’ãi.

8Nde resa rupi katu rema’ẽta ha rehecháta mba’éichapa oñemyengovia tekove ñañáme hembiapo vaikue.

9Nde, che Ruete ne rendápe akañyse ha katuete Nde chemo’ãta.

10Ndéve ndojehumo’ãi mba’evaietéva, ha mba’asy iñasãiva ndojamo’ãi nde róga rehe.

11Ñanderuete he’íta hi’angelkuérape oñangareko hag̃ua opaite nde raperã rehe.

12 Hi’angelkuéra ndererahava’erã ipopekuéra ani hag̃ua ita rehe reñepysãnga.

13Nde rehasa ramo jepe leõ ha mbói ári, nde rehundipáta ichupekuéra.

14Ñanderuete voi ningo he’i: Ha’e ojejoko hatãgui cherehe, Che aguenohẽta ichupe ijejopy vaígui, ha Che añangarekóta hese ha’e oikuaágui che réra.

15Ha’e ohenói ramo che réra Che ambohováita ichupe, Che aĩta hendive ijepy’apyha árape, aguenohẽ hag̃ua ichupe ijejopy vaígui ha upéi Che ambotuicháta ichupe.

16Ambopukúta hekove, ha ahechaukáta ichupe che pu’aka (ha ha’e oikóta chendive tapia guarã).