Salmokuéra 107 - Biblia en Guaraní - ?anderuete ?e’? Por? 2015

Ñanderuete oguenoh… Israel ijepy’apy asýgui

1Pemomba’eguasu Ñanderuetépe, Ha’e ipy’a porã, ha imborayhu opyta tapia g̃uarã.

2Ko’ã ñe’ẽ he’i’arã umi Ñanderuete oguenohẽmava’ekue hese ija’e’ỹva poguýgui.

3Ñanderuete ombyatyva’ekue Israelguakuéra opaite tetãgui, kuarahyresẽguio ha kuarahyreikéguio, yvatéguio ha yvýguio.

4Oiko rei hikuái pe yvy perõme, oiko mombyry tapekuéragui, ha ndojohúi peteĩ táva oiko porãkuaa hag̃ua.

5Ohasa asy ñembyahýi ha y’uhéi reheve, hi’ánga ikangypa.

6Ha oĩ aja jepy’apy asy omba’ejerure hikuái Ñanderuetépe, ha Ha’e oguenohẽ ichupekuéra ijepy’apy asýgui.

7Ha oguenohẽ ichupekuéra tape porãme ha ogueru pe táva ojeiko porã hag̃uáme.

8Ko’ág̃a omomba’eguasu hikuái Ñanderuetépe, oiporiahuvereko ha ohechauka haguére mba’e techapyrãva ko’ẽ yvyariguakuérape g̃uarã.

9Ha’e omboy’u umi ijy’uhéivape ha omohyg̃uatã umi iñembyahýivape.

10Oĩ ningo umi oikóva pytũguýpe ha ñemano rokẽme, ojepokua ha ojepykuáva cadénape.

11Umi mba’e ojehu hekovépe, opu’ã haguére hikuái Ñanderuete ñe’ẽ rehe, ha omboyke haguére hikuái pe Jára Ijyvatetéva rembipota.

12Upévarehe Ha’e omomirĩ ichupekuéra, jejopy pohýi rupi ipy’apykuéra oñepysãnga ha ho’a, ha ndaipóri avave oipytyvõva ichupekuéra.

13Ha ohasa asyete jave omba’ejerure asy Ñanderuetépe, ha Ha’e oguenohẽ ichupekuéra ijepy’apy vaígui.

14Oguenohẽ ichupekuéra iñypytũhágui ha ñemanógui, ha omondohopa umi iñeñapytĩhakuéra.

15Umíva ko’ág̃a tomomba’eguasu Ñanderuetépe, Ha’e oiporiahuvereko ha ohechauka haguére imilagrokuéra yvyariguakuérape g̃uarã.

16Ojokapa umi okẽ bronceguiguáva, ha omopẽmba umi iñembotyha hierroguiguáva.

17Umi ivýrova ohasa asy heko ñaña ha hembiapo vai rehe.

18Hembi’u ningo ombopy’ajerepáma ichupe, og̃uahẽma ñemano rokẽme.

19Ha omba’ejerure asývo Ñanderuetépe ojepy’apy vai jave, Ñanderuete oguenohẽ jevy ichupekuéra ijepy’apy vaígui.

20Ombou iñe’ẽ ha omonguera ichupekuéra ha oguenohẽ ichupekuéra iñuhãgui.

21Omomba’eguasu hikuái Ñanderuetépe oiporiahuvereko ha ojapo haguére umi tembiapo techapyrãva yvyariguápe g̃uarã.

22Peikuave’ẽ kuave’ẽmby ñemomba’eguasu reheguáva ha vy’apópe pemombe’u hembiapokuéra.

23Umi ohóva barcoguasúpe oñemu hag̃ua umi yguasuete rembe’y rupi,

24ohecháma Ñanderuete rembiapokuéra ha umi mba’e techapyrãva y pypuku rupi.

25Iñe’ẽ rupi Ha’e omopu’ã peteĩ yvytuatã ombopochýva pe yguasu, ha yvate ohupi pe y pochy.

26Ára gotýo opu’ã ha hugua peve oguejy pe y pochy, upévagui oñemondyiete hikuái ku omanombotárõ guáicha.

27Iñakãnga’u ha ndoikuaái mba’épa ojapo ku oka’úvaicha ovava ágotyo pégotyo, ha iñarandu katu opa rei.

28Upémaramo omba’ejerure asy hikuái Ñanderuetépe, ha Ha’e oguenohẽ ichupekuéra ijepy’apy asýgui.

29Oipe’a pe yvytu’atã ha hekovia omoĩ ára porã, ha omboguapy jevy pe y pochy.

30Upéi ovy’a joa hikuái pe y oguapy jevy haguére, ha péicha Ha’e oisãmbyhy ichupekuéra og̃uahẽ meve pe barcoguasu pytaha (puérto) peve.

31Pemomba’eguasu Ñanderuete poriahuvereko ha pemombe’u hembiapo hechapyrãva ojapóva yvyariguakuérape g̃uarã.

32Ha’ekuéra omomba’eguasu ichupe pe tetã atýpe ha omboete ichupe karai ancianokuéra atýpe.

33Ñanderuete omokã pe ysyry, oiko hag̃ua ichugui yvy perõ, ha Ha’e ombohypa umi yvu.

34Pe yvy hi’a porãvagui ojapo ñu juky pegua, umi oikóva ipype oñemboheko vai haguére.

35Yvy perõgui ojapo y renda ha pe yvy ikãvagui yvu porã.

36Upépe omohenda umi iñembyahýivape oiko porã hag̃ua, ha omopu’ã hag̃ua avei itavarãnguéra oiko porã hag̃ua ipype,

37ha’ekuéra oñotỹ ikóga, ombosako’i iparralty hi’a iporãitereíva.

38Rehovasa haguére ichupekuéra oñembohetaiterei ha hymbakuéra oñemoña ohóvo.

39Uperire katu imbovymive ohóvo ha imburuvichakuéra itĩndypa oiko vai haguére, upévare Ha’e ombou avei hendapekuéra mba’evaiete ha jepy’apy ndetuicháva.

40Ñanderuete omotĩndy imburuvichakuérape ha omboguata rei ichupekuéra yvy perõme ani hag̃ua ojohu haperã.

41Oipe’a uvei umi mboriahúpe ijehasa asýgui, ha omboheta hetave ohóvo iñemoñare ku ovecha atýicha.

42Umi heko potĩva ohechapa ha ovy’a joa, ha mayma tekove vai tomboty ijuru.

43Umi iñarandúva toma’ẽ porã ko’ã mba’e ko’ãva rehe ha tohechakuaa Ñanderuete oporoporiahuverekoha.