1Ñanderuete oñe’ẽ Oséas, Beeri ra’ýpe, Uzías, Jotam, Acaz ha Ezequías oiko ramoguare Juda retã ruvichakuéra ramo, ha Jeroboam, Joas ra’y, oiko ramoguare Israel ruvicha ramo.
2Ñanderuete oñepyrũvo oñe’ẽ Oséas ndive he’i ichupe: Tereho emenda peteĩ kuña reko vaíva rehe ha tandera’y ichugui, che retã oikógui kuña reko vaícha, oguata ambue jára gua’u rapykuéri.
3Upévare Oséas oho ha omenda Gomer, Diblaim rajy rehe, ha ha’e hyeguasu ha imemby peteĩ kuimba’e.
4Ha Ñanderuete he’i ichupe: Embohéra ichupe Jezreel, (he’ise: Ñanderuete omosarambi), Che aháta amyengovia hag̃ua pe tuguy Jehu oñohẽ reíva’ekue Israel ruvichakuéra opa hag̃ua.
5Ha upe árape Che amopẽta Israel guyrapa Jezreel ñuguasúpe.
6Ha Gomer hyeguasu jevy ha imemby peteĩ kuña. Ha Ñanderuete he’i ichupe: Embohéra ichupe Loruháma (he’ise: Ojeporiahu’ỹva), Che ndaiporiahuverekomo’ãvéima Israelguakuérape, Che apoíta uvei ichuguikuéra.
7Judayguakuérape katu aiporiahuverekovéta, che réra rehehápe aguenohẽgui ichupekuéra ijejopy vaígui Che ha’égui Ijára, naipytyvõséi katu ichupekuéra guyrapa, kyse puku, ñorãirõhára, kavajukuéra térã kavaju arigua rupi.
8Ha Gomer omombo’o rire Loruhámape, hyeguasu jevy ha imemby peteĩ mitãkuimba’e.
9Ha Ñanderuete he’i: Embohéra ichupe Loami (he’ise: Peẽ ndaha’éi che retã), peẽ ndaha’evéigui che retã ha Che ndaikomo’ãvéima pende Jára ramo.
10Upéicharamo jepe og̃uahẽta katuete pe ára Israel ra’ykuéra oñemboheta jevýta yvyku’i yguasu rembe’y peguáicha, ndaikatúiva oñeha’ã térã ojepapa. Ko’ág̃a oje’e peẽ ndaha’eveimaha che retãteéva, og̃uahẽ jevýta katuete pe ára oje’etaha peẽme: Peẽ pende Ruete oikovéva ra’ykueraha.
11Ha Juda ha Israel ra’ykuéra oñembyaty jevýta oñondive ha oiporavóta hikuái peteĩnte hetã ruvicharãme ha pe tetã oñemopu’ã jevýta, Jezreel ararã ituichaiterei jevýta.
Who We AreWhat We EelieveWhat We Do
2025 by iamachristian.org,Inc All rights reserved.
