1Roboam oñemoĩ hatãma ramo hetãme opoi Ñanderuete rembiapoukapýgui ha opaite Israelguakuéra hendive.
2Ha oñemoĩ rire hikuái Ñanderuete rehe, Sisac, Egípto retã ruvicha ou Jerusalénpe ojeity hag̃ua hi’ári,
3Sisac ou 1.200 cárro reheve, ha 60.000 kuimba’e kavaju arigua reheve; ha heta tetã ambueygua ou hendive Egíptogui: Libiaygua, Sucgua, Etiopiaygua, ojepapakuaa’ỹva hetaitereígui.
4Ha Sisac omoĩ ipoguýpe umi Juda táva oñemombaretepyréva, ha og̃uahẽ avei Jerusalénpe.
5Upéramo pe proféta Semaías ou Roboam ha Juda ruvichakuéra rendápe, Sisac omongoráma jave Jerusalénpe, ha he’i ichupekuéra: Péicha he’i Ñanderuete: Peẽ pepoi haguére chehegui Che avei pome’ẽta Sisac pópe.
6Ha mburuvichakuéra ha tetã ruvicha oñemomirĩ, ha he’i hikuái: Ñanderuete ombojovake porã.
7Ha Ñanderuete ohechávo oñemomirĩ hague hikuái, Ha’e oñe’ẽ Semaíaspe, ha he’i: Oñemomirĩgui hikuái, nahundimo’ãi; asalváta pya’ete ha che pochy nañohẽmo’ãi Jerusalen ári Sisac po rupi.
8Oikóta katu hikuái Sisac rembiguái ramo, oikuaa hag̃ua mba’épa he’ise Yvága Jára rembiguái, ha mba’épa he’ise yvyarigua rembiguái.
9Ha Sisac, Egípto retã ruvicha, ojupi Jerusalénpe ha ojapyhy umi mba’erepyeta Ñanderuete rógagui, ha mba’e repyeta tetã ruvicha rógagui; ha oguerahapaite, ojapyhy avei umi soldádo retemo’ãha oroguiguáva Salomon ojapoukava’ekue.
10Umíva rendaguépe tetã ruvicha Roboam ojapouka ambue soldádo retemo’ãha bronceguiguáva ha ome’ẽ itahachi ruvichakuérape, oñangarekóva tetã ruvicha róga rehe.
11Pe tetã ruvicha oho ramo Ñanderuete rógape, ko’ã soldadokuéra omoirũ ichupe, ohokuévo ha oukuévo, ha upéi oñongatu jevy umi tetemo’ãha hendaguépe.
12Ha Roboam oñemomirĩ rire, Ñanderuete pochy ojei ichugui, ha nohundivéi ichupekuéra; ha Juda retãme oho porãmba opaite mba’e.
13Upéicha oñemombarete ha oisãmbyhy porã jevy Jerusalénpe; ha Roboam oguereko 41 áño oñepyrũvo oisãmbyhy Jerusalénpe, pe táva Ñanderuete oiporavova’ekue opaite Israel tríbu táva apytégui, omoĩ hag̃ua ipype héra. Ha Roboam sy réra Naamã, peteĩ Amongua.
14Ha’e katu ojapo ivaíva, nombosako’ipáigui ipy’apy oheka hag̃ua Ñanderuetépe.
15Umi Roboam rembiapo ypykue guive ipaha peve, ojehaipa pe proféta Semaías kuatiañe’ẽme ha proféta Iddo kuatiañe’ẽme, hogayguakuéra réra ojehaihápe. Ha Roboam ha Jeroboam apytépe tapiaite oiko ñorãirõ.
16Ha Roboam omano rire, oñeñotỹ ichupe David távape; ha hendaguépe oisãmbyhy ita’ýra Abías.
Who We AreWhat We EelieveWhat We Do
2025 by iamachristian.org,Inc All rights reserved.
