1Saul ou jevývo Filisteayguakuéra muñahágui oñemombe’u ichupe: Péina David oime Engadi desiértope.
2Ha Saul ogueru hendive 3000 kuimba’e iporavopyréva Israelgua apytégui, ha oho jevy David ha iñirũnguéra rapykuéri, umi cérro ijyvatevéva rupi, oikohápe kavara saite.
3Ha og̃uahẽvo peteĩ ovecha korapýpe, oĩháme peteĩ itakuaguasu, Saul oike ñanandýpe; ha pe itakuaguasu ruguaite gotyovépe oguapyhína David iñirũnguéra ndive.
4Upéramo iñirũnguéra he’i Davídpe: Eikuaa porãke kovaha pe ára Ñanderuete he’imava’ekue ndéve: Péina nde pópe amoĩ nderayhu’ỹvape, ejapo hese rejapose háicha. Ha David opu’ã kirirĩháme ha oikytĩ Saul ahoja rembe’ýgui peteĩ pehẽnguemi.
5Ko’ã mba’e rire David py’apyñe’ẽ oavisa pohýi ichupe oikytĩ haguére Saul ahoja pehẽnguemi.
6Ha he’i iñirũnguérape: Ñanderuete tachepytyvõ ani hag̃ua ajapo umi mba’evai che jára rehe, Ñanderuete omonava’ekue acéite rehe (oiporavova’ekue), ani hag̃ua amopu’ã che po hese, Ñanderuete voi oiporavo haguére ichupe.
7Péicha David ojoko iñirũnguérape iñe’ẽ rupi, ha ndohejái opu’ã Saul rehe, ha Saul osẽ pe itakuaguasúgui ha oho hapére.
8Uperire David opu’ã ha osẽ pe itakuaguasúgui ha osapukái Saúlpe ijatukupéguio ha he’i: Che jára, tetã ruvicha. Ha Saul ojerévo oma’ẽ hapykue gotýo, David oñakãity jave yvy rehe ombotuicha hag̃ua ichupe.
9Upérõ David he’i Saúlpe: Mba’érehe piko rehendu ñe’ẽ vai oje’éva ndéve, he’i ramo: Eñangarekóke David rehe ha’e oñeha’ã ojapo hag̃ua mba’e ivaíva nderehe.
10Péina ágã nde resa rupi rehecha, mba’éichapa Ñanderuete omoĩ nde rekove che pópe ko itakuaguasúpe. Ha oje’e jepe chéve rojuka hag̃ua, che roperdona, che ha’égui péicha: Che namopu’ãmo’ãi che po che retã ruvicha rehe, Ñanderuete oiporavova’ekue rehe.
11Ema’ẽmi nde che ru, che pópe aguereko nde ahoja rembe’y pehẽnguemi aikytĩva’ekue, ndorojukaséi katu. Ehechakuaákena napu’ãi hague nderehe, ndarekóigui chepype ñaña térã tembiapo vai, ha nañemoangaipái nderehe; nde katu reñeha’ãmba chejuka hag̃ua.
12Ñanderuete tombojovake che rekove ha nde rekove apytépe; Ha’émante omyengoviapáta ndéve g̃uarã che rendaguépe, che katu namopu’ãmo’ãi che po nderehe araka’eve.
13He’i háicha pe ñe’ẽ arandu ymave guare: Tekove ñañávagui osẽ mba’e ñaña; upéicharupi namopu’ãmo’ãi che po nderehe.
14Máva rapykuéripa osẽra’e Israel retã ruvicha. Mávapepa omuña oikóvo; peteĩ jagua re’õnguépe térã peteĩ tũngusúpe.
15Ñanderuete tañanembojovake Ha’émante oikuaa porã mávapa ivai térã iporã ñande apytégui. Ha’e tohecha ha toikuaa che rembiapo ha Ha’e tachemo’ã ndehegui.
16Ha David he’ipávo ko’ã ñe’ẽ, Saul he’i: Kóva piko ne ñe’ẽ che ra’y David. Ha Saul sapukaipópe ojahe’o.
17Ha he’i Davídpe: Nde, nde reko porãve chehegui, rehechaukágui chéve mba’eporã, che ajapo ramojepe nderehe ivaíva.
18Nde rehechauka chéve ko árape rejapoha cherehe iporãva; ndachejukáigui Ñanderuete omoĩ ramojepe che rekove nde pópe.
19Mávapa ojohu ramo hese ija’e’ỹvape, ha opoi jevy ichugui hesãi reheve, Ñanderuete tome’ẽ ndéve mba’eporã rejapógui ko’ã mba’e iporãva cherehe ko ára kóvape.
20Ha ko’ágã hesakãmbáma chéve ndetaha Israel retã ruvicha, ha Israel oñemombaretetaha nderupi.
21Eme’ẽ chéve ne ñe’ẽ Ñanderuete renondépe nde nerehundimo’ãiha che ñemoñarenguérape ha nde neremboguemo’ãiha che réra, che ru rogaygua apytépe.
22Upérõ David ome’ẽ iñe’ẽ Saúlpe. Ha Saul oho hógape, ha David ha iñirũnguéra ojupi jevy pe cérro ijyvatevehápe.
Who We AreWhat We EelieveWhat We Do
2025 by iamachristian.org,Inc All rights reserved.
