1Juda rembiapo vai ojehai lápiz hiérro peguápe ha ita vera atã (diamánte) akuápe; ojehai ipy’apy rehe, ha umi ikuave’ẽmby renda ratĩ rehe,
2nde ra’ykuéra imandu’a hag̃ua ikuave’ẽmby renda rehe, ha umi Asera ra’ãngakuéra rehe, oĩva umi yvyraguasu porãva guýpe ha umi cérro rembe’y ijyvateha rupi.
3Umi mba’e repyeta oĩva guive umi cérro ha ñu rehe ha umi mba’e remono’õva’ekue ne retã ryepýpe oñemondapava’erã reñemohembiapo vai haguére umi yvy ijyvateha rupi.
4Nde Juda repoíta pe yvy ame’ẽmava’ekuégui ndéve, ha ame’ẽta ndéve nderehe ija’e’ỹva rembiguái ramo, ha reikóta peteĩ tetã ndereikuaáivape; pejatapýgui che pochy rendy rehe ha heta ára hendýta gueteri.
5Péicha he’i Ñanderuete: Maldíto upe tetãygua ojeroviáva hapicha térã ipu’aka rehe, ha upe omopu’ãva ijára gua’u ra’ãnga ha ipy’apýpe opoíma chehegui, he’i pende Ruete.
6Ha’e ojogua peteĩ yvyra pirúpe oĩva desiértope, ha ndohechamo’ãi og̃uahẽvo mba’eporã, oikóta uvei yvy ikãveháme ha jukytýpe ha avave ohasase’ỹha rupi.
7Ovy’aite ningo uvei upe yvyarigua ojeroviáva Ñanderuete rehe.
8Ha’ete ku yvyráicha oñeñotỹva y rembe’ýpe, hi’y omohe’õ porãva hapokuéra, upévagui noñandumo’ãi avei mba’eve ivaíva og̃uahẽ ramojepe pe ára haku térã ndokyvéi ramojepe noñemyangekõiri, ha ndopytamo’ãi hi’a’ỹrehe.
9Kuimba’e ha kuñakuéra py’apy hova mokõi ha iñañaite; máva piko ikatu oikuaa porã ichupekuéra.
10Che, pende Ruete, aikuaa porã opaite pensamiénto oĩva guive oimeraẽva pitikiri’ĩ ha ipy’apýpe, ha amyengoviáta peteĩteĩme hembiapokue ojerure háicha.
11Ku ynambu oñenóvaicha hupi’a’ỹkue ári, péicha ningo oikóta upe hekope’ỹ ombyatýva mba’e repyeta; hekove mbyte rupi ohejapa reíta, ha amo ipahápe oiko ichugui ivýrova.
12Ñanderuete rogaguasu ojogua tetã ruvichaguasu guapyha omimbipávape, oñemomba’eguasuhápe iñepyrũ guive.
13Nde, ore Ruete, Israel esperánza, oimeraẽ opoíva guive ndehegui oñemotĩva’erã; ha upe kuimba’e térã kuña oñemboykéva ndehegui, héra ojehaíta yvy timbo rehe, opoi haguére Ijáragui, Nde ningo ore yvu oĩháme y oikovéva.
14Nde, che Ruete, chepohãno ramo akueráta; chesalvamína ha aiko porã jevýta; Nde ha’égui che rerakuã porã.
15Péina ápe ningo oĩ he’íva chéve: Mba’éiko oiko Ñanderuete ñe’ẽgui, tojejapo ko’ag̃aite voi.
16Che ndaikoiva’ekue nde rapykuéri rehavira hag̃ua ichupekuéra, ha ndaipotái og̃uahẽ pe mba’evaiete ára, Nde voi reikuaa porã ko’ã mba’e. Opaite umi ñe’ẽ che ha’eva’ekue, ha’éma avei ne renondépe.
17Ani nde reiko chemongyhyjehára ramo, Nde ningo che mo’ãha og̃uahẽ jave mba’e ivaíva.
18Toñemotĩ umi chemuña muñáva, ha anítei che añemotĩ; ha’ekuéra toñemondýi, ha ani chepy’andýi; egueru hi’arikuéra mba’evai, eipy’apy jo’a jo’a ichupekuéra.
19Ñanderuete péicha he’i chéve: Tereho ha eñembo’y Jerusalen rokẽguasukuéra oĩháme, Juda retã ruvichakuéra oike ha osẽha rupi,
20ha ere ichupekuéra: Pehendúke Ñanderuete ñe’ẽ, Juda retã ruvichakuéra ha mayma Jerusalengua peikéva guive ko’ã okẽ ko’ãva rupi.
21Péicha he’i Ñanderuete: Peñangareko pendejehe pende rekove rehehápe ani hag̃ua pegueraha mba’e pohýi (cárga) jepytu’uha árape, ha ani pemoinge umía Jerusalen rokẽnguéra rupi.
22Ha ani peguenohẽtei mba’e pohýi pende rogakuéragui jepytu’uha árape, ha ani pejapótei mba’eveichagua tembiapo, pemboarete uvei jepytu’uha ára, Che ha’e haguéicha pende rukuérape.
23Ha’ekuéra katu naiñe’ẽrendúi, ha nomoĩri hikuái ijapysa ohendu hag̃ua, oñembopy’a hatã uvei hikuái ani hag̃ua ohendu ha ojehekombo’e hag̃ua ichupekuéra.
24Peẽ peneñe’ẽrendu ramo chéve, he’i pende Ruete, ha napemoingéi ramo jepytu’uha árape mba’eveichagua mba’e pohýi (cárga) ko táva rokẽnguéra rupi, ha pemboarete ramo pe jepytu’uha ára, ha ndapejapói ramo upe ára upévape mba’eveichagua tembiapo,
25upéicharamo oikova’erã David guapyhaguasúpe pene retã ruvichaguasu ha oikeva’erã ko’ã táva rokẽ rupi icárrope ha pene mburuvichakuéra ikavaju ári, ita’yrakuéra, Juda ha opaite Jerusalengua ndive; ha iñemoñare oikóta Jerusalénpe opaite árape g̃uarã.
26Og̃uahẽta che retãygua Juda tavakuéragui, Jerusalen jerekuévogui, Benjamin yvýgui, ñúgui, umi cérrogui ha Négevgui, ha oguerúta ikuave’ẽmby ojehapypa hag̃ua, ambue kuave’ẽmby nemboete ha nemomba’eguasu hag̃ua, ha ohapýta imba’e ryakuã porãva itrígo ku’i porã reheve Ijapoharépe g̃uarã.
27Peẽ nacherendúi ramo ha pembyai pe jepytu’uha ára ha pegueru ramo umi mba’e pohýi (cárga) ha pemoinge Jerusalen rokẽnguéra rupi jepytu’uha árape, Che ajatapýta hokẽnguéra rehe ha ambokusuguepáta umi ogaguasu Jerusalen pegua ha avave nomboguemo’ãvéima.
Who We AreWhat We EelieveWhat We Do
2025 by iamachristian.org,Inc All rights reserved.
