Josue 13 - Biblia en Guaraní - ?anderuete ?e’? Por? 2015

Tetãnguéra ho’a’ỹva gueteri Israel poguýpe

1Josue itujáma ramo, Ñanderuete he’i ichupe: Ndetujáma, ha heta áñoma reikove, hemby heta yvy peñemomba’eva’erãva gueteri.

2Ko’ã yvy hemby gueteri: Umi Filisteaygua yvy tuichakue ha umi Gesurgua yvy tuichakue,

3Sihor guive, opytáva Egíptogui, kuarahyresẽ gotýo, Ecron retã rembe’y yvatevogua peve, upéva ojererekóva Canaanguakuéra mba’e ramo, umi 5 mburuvicha Filisteaygua táva, Gáza, Asdod, Ascalon, Gat ha Ecron, avei umi Avgua yvy;

4yvy gotýo umi Canaangua yvy tuichakue javeve ha Mehara, umi Sidongua mba’e, Afec peve ha umi Amorgua retã rembe’y peve;

5Giblayguakuéra yvy ha pe Líbano yvy tuichakue kuarahyresẽ gotýo Baalgad Hermon cérro ñepyrũha guive Hamat jaikeha peve;

6mayma umi oikóva umi cérro rehe, Líbano guive Misrefotmaim peve, mayma Sidonguakuéra; Che ahundipáta Israel ñemoñarenguéra renodépe. Emboja’ónteke ko’ã tetã yvy Israelguakuérape g̃uarã po’a jeporavo (sortéo) rupi imba’erã ramo, Che ha’e haguéicha ndéve.

7Emboja’o katu ko yvy kóva umi 9 tríbu ha Manases tríbu mbytere apytépe imba’etee ramo.

8Umi Rubengua, Gadguakuéra ha Manases tríbu mbytere oguerekóma imba’eteéva, Moises ome’ẽmava’ekue ichupekuéra Jordan mboypýri, kuarahy resẽ gotýo.

9Aroer guive, opytáva Arnon ysyry rembe’ýpe, ha umi táva opytáva pe ñu mbyte guive ha pe yvype Medéba guive Dibon peve.

10Mayma Sehon tavakuéra, Amorgua ruvicha oikova’ekue Hesbónpe, Amon ñemoñarenguéra retã rembe’y peve;

11ha Galaad ha umi Gesurgua ha Maacatguakuéra retã, ha pe Hermon cérro pukukue ha Basan yvy tuichakue Salca peve.

12Ha Og retã tuichakue opytáva Basánpe, oisãmbyhyva’ekue Astarot ha Edreípe, umía opytava’ekue Refaitguakuéra rembyrégui; Moises ombopoguyva’ekue, ha omosẽva’ekue ichupekuéra ijyvýgui.

13Umi Gesurgua ha Maacatguakuérape katu Israel ñemoñarenguéra nomosẽi, oiko gueteri hikuái Israelguakuéra apytépe ko ára peve.

Pe yvy Moises omboja’ova’ekue

14Moises nome’ẽiva’ekue Levi tríbupe ijyvy teerã, Ñanderuete, Israel Jára kuave’ẽmbynguéra imba’erã, ha’e he’i haguéicha ichupekuéra.

15Moises ome’ẽ Ruben tríbu ñemoñarenguérape hogaguasu hetaháicha:

16Ijyvy Aroer guive opytáva Arnon yakã rembe’ýpe ha umi táva opytáva pe ñu mbytépe, ha pe yvype Medéba peve.

17Hesbon itava’ikuéra reheve, opytáva pe ñuguasúpe: Dibon, Bamotbaal, Betbaalmeon,

18Jahaz, Cademot, Mefaat,

19Quiriataim, Sibma, Zaretsahar opu’ãva cérro ru’ãme, pe ñuguasúpe,

20Bet-peor, Pisga ykére, Betjesimot,

21ha opaite ambue táva ñuguasu pegua, ha Sehon, Amorguakuéra retã ruvicha yvy tuichakue, péva ha’e oisãmbyhyva’ekue, Hesbon guive, Moises ojukava’ekue ichupe, ha umi Madian ruvichakuéra Evi, Requem, Zur, Hur ha Rebápe, ko’ãva oĩva’ekue Sehon poguýpe.

22Israel ñemoñarenguéra ojuka avei kyse pukúpe Balaam, Beor ra’ýpe, upe imba’ekuaava’ekue, ha hendive heta ambuekuérape.

23Ha pe ysyry Jordan opytáva Ruben ñemoñare yvy rembe’y kuarahyreike gotýo, kóa ningo Ruben mba’etee hogaguasu heta háicha, opaite táva ha tava’ikuéra reheve.

24Upéicha Moises ome’ẽ avei Gad tríbupe, hogaguasu heta háicha.

25Ijyvy ningo Jazer ha opaite Galaad tavakuéra, ha umi Amon ñemoñare yvy mbytere Aroer peve, opytáva Raba rovái.

26Ha Hesbon guive Ramat-mizpa ha Betonim peve; ha Mahanaim guive Debir rembe’y peve.

27Ha pe yvype oĩva, Betaram, Betnim-ra, Sucot ha Zafon, ko’ãva hemby Sehon, Hesbon retã ruvicha yvýgui; Jordan rembe’y ha Cinerot Yguasu (Mar Galiléa) rembe’y peve, Jordan mboypýri, kuarahyresẽ gotýo.

28Ko yvy opyta Gad ñemoñarenguérape g̃uarã imba’etee ramo hogaguasukuérape g̃uarã, opaite táva ha itava’ikuéra reheve.

29Moises ome’ẽ avei Manases tríbu mbyterépe imba’etee ramo; hogaguasukuéra heta háicha.

30Ijyvýpe opyta Mahanaim, Basan tuichakue, ha Og, Basan ruvicha, yvy tuichakue, ha Jair tava’ikuéra Basan pegua, 60 táva,

31ha Galaad yvy mbytere, Astarot ha Edrei, ko’ã táva opyta Basánpe, Og oisãmbyhy haguépe ko yvy opyta Maquir ñemoñare mbyterépe g̃uarã, hogaguasu heta háicha.

32Ko yvy Moises omboja’ova’ekue Moab ñúme, Jordan mboypýri, Jerico rovái, kuarahyresẽ gotýo.

33Levi tríbupe katu Moises nome’ẽi ijyvyrã; Ñanderuete, Israel Jára ningo, oñangarekova’erã hesekuéra, ha’e he’i haguéicha ichupekuéra.