Deuteronómio 30 - Biblia en Guaraní - ?anderuete ?e’? Por? 2015

Israelguakuéra oñembyasyete ramo ojapo vai haguére ojesalva

jevyva’erã

1Ojehuva’erã ou ramo pendeári mayma ko’ã ñe’ẽ porã (jehovasa) térã maldicion amoĩmava’ekue ko’ág̃a pene renondépe, ha peñembyasy jevy ramo pejapo vai haguére tetãnguéra apytépe, Ñanderuete penemosarambitahápe,

2ha pejevy ramo Ñanderuete, pende Jára rendápe, ha pejapo jevy ramo hekoitépe opaite iñe’ẽ, Ha’e he’iuka háicha peẽme ko ára kóvape, peẽ ha pende ra’ykuéra, pende py’aite guive ha pene ánga mbytete guive,

3upéicharamo Ñanderuete ogueru jevýta umi ojeguerahava’ekue pokuapýpe ha Ha’e pendeporiahuvereko, ha penembyatypa jevýta umi tetã penemosarambi haguégui.

4Ha jepémo umi ojererahava’ekue ne retãgui opyta tetã mombyryetevehápe, upégui Ñanderuete pendegueru ha penembyatypa jevýta,

5peiko jevy hag̃ua pende rukuéra yvy teépe; ko yvy opyta jevýta pene mba’erã ramo; ha Ha’e ojapóta mba’eporã penderehe, ha penembohetaitevéta pende rukuéragui.

6Ñanderuete, Ñandejára, omopotĩta pende py’apy ha pene ñemoñarenguéra py’apy pehayhu hag̃ua añetehápe Jahve, pende Járape, pende py’aite ha pene ánga mbytete guive, peikove hag̃ua añetehápe.

7Ha Ñanderuete, Ñandejára, omoĩmbava’erã ko’ã maldicion penderehe ija’e’ỹva ári, ha umi pendejopýva ári.

8Ha peẽ pejevýta ha pehendúta ramo Ñanderuete ñe’ẽ ha pejapóta hekoitépe mayma hembiapoukapy, che ha’éva guive peẽme ko ára kóvape.

9Ñanderuete, Ñandejára, penderovasáta omoingo porãvo pene rembiapo, ha pende ra’ykuéra, pene rymba ha pende koga’a, ha Ñanderuete hory jevýta pendereheve ku hory haguéicha pende rukuéra ndive,

10peneñe’ẽrendu ramo Ñanderuete, Ñandejára ñe’ẽme, ha pejapo ramo iñe’ẽ ha hembiapoukapykuéra ojehaíva ko tembiapoukapy kuatiañe’ẽme, ha pejevy ramo Ñanderuete, Ñandejára rendápe pende py’aite ha pene ánga mbytete guive.

11Ko tembiapoukapy kóva ha’e peẽme ko árape pejapo hag̃ua, ndahasýi pejapo hag̃ua ha naimombyrýi pehupity hag̃ua.

12Ndopytái yvágape, peje hag̃ua: Máva piko ojupíta orerehehápe yvágape, ogueru ha ohenduka hag̃ua oréve ko’ã tembiapoukapy rojapo hag̃ua.

13Ha ndopytái yguasu mboypýri, peje hag̃ua: Máva piko ohasáta orerehehápe pe yguasu mboypýri ogueru hag̃ua ha ohendukáva oréve rojapo hag̃ua.

14Ko ñe’ẽ kóva oĩ ag̃uiete pendehegui ha pende py’apýpe oĩ voi, upévare pejapontemava’erã.

15Pema’ẽ porãke, che amoĩ pene renondépe ko ára kóvape jeikove ha mba’e porã, térã mano ha mba’evai;

16peẽ peiporavo hag̃ua pe jeikove ha mba’eporã, Ñanderuete, Ñandejára ome’ẽséva peẽme, peguata ramo hapekuéra rehe ha pejapo ramo hekoitépe iñe’ẽ, imbo’epy ha hembiapoukapykuéra, upéichamante peiko porãta ha peñembohetáta pe yvy Ha’e ome’ẽtavape peẽme.

17Ha pende py’apýpe peñemboyke ramo ichugui, napeneñe’ẽrendúi ha pepoi ramo Ñanderuetégui pemomba’eguasu hag̃ua ambue járape,

18upéicharamo che ha’e peẽme ko ára kóvape: Añetetehápe peñehundiva’erã ha ndapeikove pukumo’ãi pe yvy pehotahápe, peñemomba’e hag̃ua hese, ha oĩva Jordan mboypýri.

19Yvagakuéra ha yvy ahenói techahare ramo pende rovake, amoĩ haguére pene renondépe pe jeikove térã pe ñemano, pe jehovasa porã térã pe maldicion, peiporavo hag̃ua pe jeikove, peẽ ha pene ñemoñarenguéra peikove hag̃ua.

20Pehayhu Ñanderuete, Ñandejárape, pejapysaka iñe’ẽ rehe, peiko hapykuéri; Ha’e ningo peẽme g̃uarã pe jeikove, Ha’e ombopukuse pende rekove arakuéra; ikatu hag̃uáicha peiko ko yvy Ñanderuete ome’ẽva’ekuépe pende rukuérape: Abraham, Isaac ha Jacóbope iñe’ẽ rupi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help