Levítico 24 - Biblia en Guaraní - ?anderuete ?e’? Por? 2015

Acéite tataindyendápe g̃uarã

1Ñanderuete oñe’ẽ Moiséspe, ha he’i:

2Ere Israel ñemoñarenguérape togueru ndéve acéite olívo jejosopyrégui, oñemyendy hag̃ua tataindyenda tapiaite.

3Aaron tomyendy pe tataindyenda oĩva pe kotyguasu peteĩháme, pe óga jojohuha kotyguasu mokõiha renondépe oñemboykéva pende Ruetépe ha pa’iguasúpe g̃uarã; péva ningo tembiapoukapy opaite árape pene ñemoñarenguérape g̃uarã.

4Ñanderuete renondépe Aaron omopotĩ porã pe tataindyenda oĩva pe óga jojohuha kotyguasúpe, oñemboykéva pa’ikuérape g̃uarã.

Pepan

Ñanderuete mesápe

g̃uarã

5Ejapyhy trígo ku’i iporãva, ha embojy ichugui 12 pan he’ẽva, peteĩteĩva umi pan ojejapova’erã 4,4 lítro trígo ku’i porãgui.

6Ha remohendáta mokõi tysýipe, (líñope) mokõive tysýipe oĩva’erã 6 pan pe mesa potĩ ári pende Ruete renondépe.

7Ha remoĩta avei umi mokõi hysýipe ári mba’e ryakuã porãva, omohyakuã porã hag̃ua umi pan, kuave’ẽmby hendýva pende Ruetépe g̃uarã.

8Akói (cáda) pytu’uha árape Israelguakuéra ogueruva’erã pe trígo ku’i, pa’ikuéra ombojy hag̃ua ha omoĩ pyahu jevy hag̃ua hendaguépe pende Ruete renondépe; ko tembiapoukapy opytava’erã opaite árape g̃uarã.

9Ha umi pan tuja opytáta Aaron ha ita’yrakuéra rembi’urã, ha’ekuéra ho’uva’erã pe tenda oñemboykévape pende Ruetépe g̃uarã; kóva ningo pende Ruete jopói ichupekuéra g̃uarã, Ñanderuete kuave’ẽmby hendypávagui.

Pe omaldecíva

jehavira

10Umi árape peteĩ kuña Israelgua memby okakuaáva, ha Egiptoygua ra’y okakuaáva, oiko vai oñondive hekohápe.

11Ha pe kuña Israelgua memby oñe’ẽvaiete Ñanderuete réra rehe, ha omaldeci Ñanderuete rérape, upémaramo ojegueraha ichupe Moises rendápe. Ha isy hérakuri Selomit, Dibri rajy, Dan tríbu reheguáva.

12Ha omoinge ichupe hikuái cárcelpe oikuaa peve Ñanderuete he’íta hese.

13Ha Jahve oñe’ẽ Moiséspe, ha he’i:

14Eguenohẽ pe oñe’ẽvaiva’ekue pe tekoha oka gotýo, ha umi ohenduva’ekue ichupe omaldeci hague tomoĩ ipokuéra iñakã ári, ha opaite ijatýva guive tojapi ichupe itápe, omano meve.

15Ha eñe’ẽ Israel ñemoñarenguérape péicha: Oimeraevã omaldecíva pende Ruetépe opagava’erã iñemano rupi.

16Ha upe omaldecíva Jahve (pende Ruete) réra ojejukava’erã; mayma ijatýva guive ojapiva’erã ichupe itápe, omano meve; péicha opaite tetã ambueygua térã Israelgua, oñe’ẽvai ramo pende Ruete réra rehe, katuete omanova’erã.

17Upéicha avei pe kuimba’e ojukáva hapichápe, ojejukava’erã avei.

18Pe ojukáva oimeraẽ tymba, omyengoviava’erã tymba tymba rehe.

19Pe ombyaíva hapichápe, tojejapo hese ha’e ojapo haguéicha avei;

20Jeka jeka rehe, tesa tesa rehe, tãi tãi rehe, ha’e ojapo haguéicha hapichápe ojejapo jevyva’erã hese.

21Pe ojukáva oime haichagua tymba omyengoviava’erã; ha upe ojukáva hapichápe, ojejukava’erã avei ichupe.

22Peteĩnte tembiapoukapy peguerekóta tetã ambueygua ha Israelguápe g̃uarã, Che ningo Jahve, pende Jára.

23Ha Moises oñe’ẽ Israel ñemoñarenguérape, ha ha’ekuéra oguenohẽ pe oñe’ẽ vaiva’ekuépe hekoha oka gotýo ha ojapi ichupe itápe omano meve. Ha Israel ñemoñarenguéra ojapopa Jahve he’i haguéicha Moiséspe.