1Ha Hesu he’ive ichupekuéra: Añetehápe ha’e peẽme pende apytégui, ha oñembo’ýva che renondépe, oĩ umi nomanoiva’erãva ohecha mboyve Ñanderuete retãguasu pu’aka outavahína.
Ñanderuete ohechauka Hesu Crísto reko jajaipa2Ha 6 ára rire, Hesu ogueraha hendive Pédro, Jacóbo ha Juan ha’eñoháme, peteĩ cérro yvate ári ha hete oñemoambue hesakuéra renondépe.
3Ha ijao omimbipa opytávo ha imorotĩeterei, avave aojoheihára yvy ariguakuéra apytégui ndaikatúi omomorotĩ péicha.
4Ha ohecha hikuái Elías ha Moiséspe oñemongeta ramo Hesu ndive.
5Ha Pédro he’i Hesúpe: Mbo’ehára, iporã ningo japyta ápe ha romopu’ãta mbohapy tapỹi, peteĩ ndéve g̃uarã, ambue Moiséspe g̃uarã, ha ambueve Elíaspe g̃uarã,
6ndoikuaái he’ivarã hikuái, oñemondyietereígui hikuái.
7Ha ou peteĩ arai omo’ãva ichupekuéra, ha osẽ ñe’ẽpu pe araígui he’íva: Kóva ningo che Ra’y ahayhúva, pehendúke ichupe.
8Ha oma’ẽvo hikuái ijerekuévo ndohechavéi avavépe, Hesupe añómante.
9Ha oguejývo hikuái pe cérrogui, Hesu he’i ichupekuéra ani hag̃ua omombe’u avavépe pe ohechamava’ekue, yvyarigua Ra’y oikove jevyha ára peve, ou jevývo omanómava apytégui.
10Upévare ha’ekuéra oñongatu iñe’ẽ (ipy’apýpe), oporandúnte ojupe mba’épa he’iséne: Oikove jevy omanómava apytégui.
11Oporandu ichupe hikuái ha he’i: Mba’érehe piko umi kuatia haihára he’i Elías ouraẽva’erãha.
12Ha Hesu he’i ichupekuéra: Añete ha’e peẽme Elías ouraẽva’erã omoĩmba hag̃ua opaite mba’e oĩ haguéicha. Kuatiañe’ẽme ojehai voi pe yvyarigua Ra’y ohasa asyetereitaha ha omboyketaha ichupe hikuái.
13Che katu ha’e peẽme Elías oúma hague ha ojapo hikuái hese opaite mba’e ojaposéva ha ojehai háicha hese Ñanderuete kuatiañe’ẽme.
Hesu omosẽ peteĩ mba’epochýpe14Ha og̃uahẽmbotávo hikuái ambue temimbo’ekuéra rendápe, ohecha heta hetãyguakuéra oñembyatýva, ha kuatia haihára oñoñe’ẽ’apíva hendivekuéra.
15Ha hetãyguakuéra ohechávo Hesúpe ohecharamoite ha oñani hendápe omomaitei hag̃ua ichupe.
16Ha Hesu oporandu ichupekuéra: Mba’érehe piko peñoñe’ẽ’apipeína hendivekuéra.
17Ha peteĩ kuimba’e, pe atýgui, he’i: Mbo’ehára, aru ningo ndéve che ra’y oikóva mba’epochy ñe’ẽngu poguýpe.
18Ha mamo ojapyhyhápente oity ichupe yvýre, ijuru ryjuipa, omopururũ hãinguéra, ha hete hatãmba opytávo. Ajerure asy ne remimbo’ekuérape omosẽ hag̃ua pe mba’epochýpe che ra’ýgui, ha’ekuéra katu ndaikatúi omosẽ.
19Ha Hesu oñe’ẽ ichupekuéra ha he’i: Peẽ ningo tetãyguakuéra ojerovia’ỹva. Araka’e peve piko aĩta penendive. Araka’e peve piko pogueropu’akáta, pegueru ichupe ko’ápe.
20Ha ogueru hikuái ichupe. Ha pe mitãkuimba’e ohechávo Hesúpe, pe mba’epochy oityvyro vai ichupe, ha ho’ávo yvýre ojapajeréi ha ijuru ryjuipa.
21Upérõ Hesu oporandu itúvape: Araka’e guive piko péva ojehu ichupe, ha itúva ombohovái: Imitãite guive.
22Ha heta jevy oity ichupe tata ha ýpe ojuka hag̃uáicha ichupe; oimérõ ikatúta Nde reipohãno, oreporiahuverekomína ha orepytyvõ.
23Hesu ombohovái ichupe: Ikatu, rejerovia ramo, opaite mba’e ikatu upe ojeroviávape.
24Upevovete pe mitã ru osapukái: Che arovia, chepytyvõna che ajeroviave hag̃ua.
25Hesu ohechávo umi yvyariguakuéra ijatyha, oja’o pe mba’epochýpe ha he’i ichupe: Nde, mba’epochy ñe’ẽngu, Che ha’e ndéve: Esẽ ichugui, ha máramo anive reike jevy ipype.
26Ha osẽvo, sapukaihápe, oityvyro hatã pe mitãme, ha opoi ichugui ha opyta omanómavaicha; upévare heta oĩ he’íva: Omanóma ha’e.
27Hesu katu oja hendápe ha oipopyhy pe mitãkuimba’épe ha omopu’ã ichupe.
28Ha Hesu oikévo peteĩ ógape, hemimbo’ekuéra oporandu ichupe ha’eñoháme: Mba’érehe piko ore ndaikatúi romosẽkuri mba’epochýpe pe mitãkuimba’égui.
29Ha Hesu he’i: Koichagua mba’epochy ikatu oñemosẽ ñembo’e ha ajúno rupímante voi.
Hesu he’i jevy omanotaha30Ha osẽ upégui, ohasa ohóvo Galiléa rupi ha ndoipotái avave oikuaa ohasaha upérupi.
31Ombo’e haguére hikóni hemimbo’ekuérape he’ívo ichupekuéra: Ñanderuete Ra’y ningo ho’áta kuimba’ekuéra pópe ha ojukáta hikuái ichupe; mbohapy ára omano rire katu oikove jevýta.
32Ha’ekuéra opáichavo ndoikuaái pe he’iséva ha okyhyje oporandu hag̃ua ichupe.
Hesu Crísto rehegua añeteguáva oservise33Oho hikuái Capernaúmpe, ha og̃uahẽ rire peteĩ ógape, Hesu oporandu hemimbo’ekuérape: Mba’érehe piko peñemongeta pejúvo tape rupi.
34Ha’ekuéra okirirĩnte, tape rupi ningo oñoñe’ẽ’apíra’e mávapa pe tuichavéva ijapytepekuéra.
35Ha Hesu oguapývo ohenói umi 12 hemimbo’ekuérape ha he’i ichupekuéra: Upe oikoséva pe ituichavéva ramo, oikova’erã pe ipahaguéva ramo ha opavave rembiguái ramo.
36Ha oguerúvo peteĩ mitã omoĩ imbytepekuéra, ohupi hapypa’ũme, ha he’i ichupekuéra:
37Oimeraẽ omog̃uahẽva koichagua mitãme che rérape, chéve chemog̃uahẽ ha pe chéve chemog̃uahẽva, nachemog̃uahẽi chéve año, pe chembouva’ekuépe avei.
38Upérõ Juan he’i ichupe: Mbo’ehára, rohecha ningo kuri peteĩ kuimba’e nañanemoirũivape omosẽva mba’epochýpe nde rérape, ha ore ro’e ichupe anive hag̃ua ojapo upéva, nañanemoirũigui.
39Ha Hesu he’i ichupe: Ani pejoko ichupe ndaipóri avave, ojapóva milágro che rérape, ikatúva upéi oñe’ẽvai cherehe.
40Upe oñemoĩ’ỹva ñanderehe, ñande reheguáva avei.
41Upe penemboy’úva che rérape jepe, peẽ Ñanderuete ra’yháre, añetehápe ha’e peẽme, ndopytamo’ãiha oñemyengovia’ỹre ichupe.
Ani remoñepysãnga nde rapichápe42Ha máva omoñepysãngáva peteĩ ko’ã michĩmívape cherehe ojeroviávape, iporãveva’erã omosãingo ramo ijajúra rehe ita tuicha ha ojeity ichupe yguasúpe.
43Ha nde po nemoñepysãngárõ, eikytĩ, iporãve ndéve reike tekovetépe (yvágape) nde po’ỹre, ani nde po mokõi reheve reho aña retãme, tata ndopaveihápe araka’eve,
44mamo ijyso nomanoiháme, ha tata máramo ndogueihápe.
45Ha nde py nemoñepysãngárõ, eikytĩ, iporãve reike tekovetépe (yvágape) nde py’ỹre, ani hag̃ua nde py mokõi reheve reho aña rétame,
46mamo ijyso nomanoiháme, ha tata máramo ndogueihápe.
47Ha nde resa nemoñepysangárõ, enohẽ, iporãve ndéve reike Ñanderuete retãguasúpe peteĩ nde resa rehevénte, ani hag̃ua nde resa mokõi reheve reho aña retãme,
48mamo ijyso nomanoiháme, ha tata máramo ndogueihápe.
49Opavave voi oñembojuky’arã tatápe, (oñembojuky háicha opaite kuave’ẽmby jukapyréva).
50Iporã ningo pe juky, ág̃a pe juky oñembyaírõ (nahe’ẽvéirõ), mba’épepa oñemohe’ẽ jevýne. Pendejuky pendepype voi, ha peiko porãke oñondive.
Who We AreWhat We EelieveWhat We Do
2025 by iamachristian.org,Inc All rights reserved.
