1Upe ára upévape Ñanderuete ohaviráta ikyse puku hãimbépe pe leviatan tuicha (tejujaguaguasuete nunga) ha imbaretévape, pe mbói ipya’etévape (Asíriape); ha leviatan, pe mboiguasuete okañývape (Babilóniape); Ha’e ojukáta pe tejujaguápe oikóva yguasúpe (Egíptope).
2Upe ára upévape nde Israel, epurahéi pe parralty porãva rehe.
3Che, nde Jára, añangareko’aína nderehe, py’ỹinte rohypýi ha rombohykuéta; añangarekóta nderehe ára ha pyhare, ani hag̃ua avave nembyai.
4Pe pochy oĩmava’ekue chepype ojeíma. Ha hembymi ramo ñana ha ñuatĩndy, umía ndive añorãirõta. Che apyrũmbáta hesekuéra ha ahapypáta.
5Térã oĩnepa ipu’akáva cherehe. Upe oñembopy’apeteĩva chendive, upéva oikóta avei py’aguapýpe.
6Og̃uahẽta pe ára Jacóbo oñembohapo jevýta, Israel hoky pyahu ha ipotýta, ha hi’akuégui omyenyhẽta ko yvy ape ári.
7Térãpa oinupãra’e Israélpe, oinupã haguéicha inupãharépe, térãpa ojuka ichupekuéra ojuka haguéicha ijukaharépe.
8Ñanderuete ohaviráta ichupekuéra, ha’ekuéra oñemboyke haguére Ijáragui. Ha’e oguerova ichupekuéra ijyvytu’atã rupi oúva kuarahyresẽguio.
9Ko jehaviraguasu rupi ojepe’áma iñaña reko ha péva rupi Israel hi’a porã ha oñemomombyry hembiapo vaikuégui ha omongu’i ikuave’ẽmby renda itakuéra ku ita cálicha ha oity ambue jára ra’ãnga, umi Asera ha kuarahy ra’ãngakuérape avei.
10Pe táva imbarete porãva oñembotaperéta, ha pe táva ojehejapa reíta, opytáta ku yvy perõváicha, upépe oñembyaty umi vaka ho’u hag̃ua yvyra rakã roguekuéra.
11Ha ijyvyra rakãnguéra ipirúma ramo, opẽmbáta; ha kuñakuéra oúta ogueraha hag̃ua ijepe’a ramo; kóva ndaha’éi peteĩ tetã iñakã porãva; upévare Ijapohare noñembyasymo’ãi ha ndoiporiahuverekomo’ãi ichupe.
12Ojehuva’erã upe ára upévape, Ñanderuete omono’õta pe trígo ra’ỹi ysyry Éufrates guive Egípto yakã meve, ha Ñanderuete ombyaty jevýta opaite hetãyguakuéra Israel retã yvyteépe.
13Ojehuva’erã avei upe ára upévape, oñembopuva’erã pe turuguasu oupa jevy hag̃ua umi oñemosarambiva’ekue Asíria retãme ha umi oñemondova’ekue Egíptope, ha oñesũta omomba’eguasu hag̃ua Ijarateépe Jerusalen cérrope, oĩ hag̃uáme Ñanderuete rogaguasu.
Who We AreWhat We EelieveWhat We Do
2025 by iamachristian.org,Inc All rights reserved.
