Provérbios 7 - Biblia en Guaraní - ?anderuete ?e’? Por? 2015

Pe kuña heko vaíva ñuhã

1Che ra’y, ejapókena che ñe’ẽ, ha eñongatu porã che rembiapoukapykuéra nde py’apýpe.

2Ejapóke che rembiapoukapy ha reikoveva’erã, eñangareko hese nde resa’ỹicha.

3Ejokuákena ne kuãnguéra rehe; ehaíkena umía nde py’apýpe (korasõme).

4Ere arandúpe: Nde ningo che reindy, ha akãporãme eguereko ne irũ porãite ramo.

5Eñemomombyry nde rapicha rembirekógui, ijuru he’ẽme ndereitységui.

6Peteĩ ára ama’ẽ jave che róga rovetã rupi,

7ahecha umi mitãrusu iñarandu katupyry’ỹva apytépe peteĩ karia’y ivýrõ reíva,

8ohasárõ ohóvo pe tape rehe, oñemoag̃uive pe kuña vai rógare.

9Ka’aruete, iñypytũmba rire, pyhare ho’áma jave,

10péina ápe, peteĩ kuña osẽ ohuvaitĩvo ichupe, kuña reko vai ijeguakapa reheve ha oikuaáva mba’éichapa oporombotavyva’erã,

11iñakã rakúva ha ndaipy’aguapýi, ipy ndaikatúiva opyta hógape.

12Ha osẽ guive hógagui oma’ẽ ma’ẽ opa rupi ohecha hag̃ua mávapepa ombotavýta.

13Ojejapyhy hese, ha ohetũ ichupe, ha tova’atãme he’i ichupe:

14Kuave’ẽmby agradecimiénto reheguáva so’o ambosako’íma, ko ára kóvape ame’ẽse che promésa,

15upévare asẽkuri rohekávo, kyre’ỹme aheka aikóvo nde rova, ha péina rojohúma,

16ambosako’íma che rupa, tupa ahoja iporãitéva ojegueruva’ekue Egíptogui.

17Che koty amohyakuãmbáma mírra, áloe ha canélape (mbohapyvéva plánta hyakuã porãva).

18Ejúna mborayhúpe ñañomokunu’ũ ko’ẽmba peve, javy’a mborayhu pa’ũme.

19Che ména ningo ndaipóri che rógape, mombyry ohókuri.

20Pe pirapire ryru oguerahákuri ipópe, ha he’i: Jasy mbaretépemante aju jeyva’erã ñande rógape.

21Iñe’ẽ vevúi asy rupi omoĩ ichupe ipoguýpe, ijuru he’ẽ rupi omosã ichupe.

22Upéicha oho hapykuéri, ku guéi oho háicha ijukahára rendag̃uáme, ha tekove vai oho háicha cárcelpe ojehavira hag̃ua;

23ku guyra oho háicha pya’e pya’e ho’a peve ñuhãme, ha ndoikuaái hekove ojepe’ataha ichugui, pe hu’y ojekutu peve ipy’a rehe.

24Ko’ág̃akena nde, che ra’y, cherendumíkena, ha ejapysaka porãkena umi ñe’ẽ rehe che juru he’íva guive.

25Ani remboyke nde py’apy hapére; aníke rejejavýtei hape karẽ rehe.

26Ha’érupi ningo heta oñehundíma, oity rire hetápe ojuka ichupekuéra.

27Hógape oñepyrũ aña retã rape, hóga rokẽ rupi oñeg̃uahẽta omanómava retãme.