Salmokuéra 25 - Biblia en Guaraní - ?anderuete ?e’? Por? 2015

David ojerure oñeñangareko hag̃ua hese ohasa asy aja

1Ne rendápe, che Ruete, amog̃uahẽ che ánga.

2Che Jaratee, nderehe ajerovia, anítei chemotĩ umi cherehe ija’e’ỹva térã umi cherehe oñembohorýva renondépe.

3Añetehápe umi nderehe ojeroviáva noñemotĩmo’ãi, toñemotĩ uvei umi oñemoĩva nderehe.

4Che Ruete, ehechaukamína chéve nde rapekuéra, chembo’emína nde rapekuéra rehe aikuaa porãve hag̃ua.

5Chemboguatamína nde justícia rupive, ha chembo’emína, Nde ha’égui ore Ruete, che salvador, nderehe che ajerovia opaite árape.

6Nemandu’amína, Nde, che Ruete, nde py’aporã ha nde poriahuvereko rehe, oikómava yvy ñepyrũ guive.

7Ani nemandu’átei che rembiapo vai ha che jejavy rehe che mitãrusu ára peguare, nemandu’a uvei nde poriahuvereko ha ne mborayhu rehe, Nde, che Ruete.

8Ñanderuete ipy’aporã ha ñanderayhúgui, upévare ohechauka avei umi ojavývape hape porã.

9Upévagui Nde voi ehekombo’e ichupekuéra oguata hag̃ua hekoitépe nde rape rupi, Nde voi rehechaukamava’ekue ichupekuéra.

10Opaite Ñanderuete rapekuéra ohechauka iporiahuvereko ha imborayhu, umi oñongatúva ha ojapóvape g̃uarã iñe’ẽ.

11Nde réra rehehápe, Nde, che Ruete, eperdona che rembiapo vai, heta ramo jepe.

12Mba’épa ojehúta upe kuimba’e okyhyjéva Ñanderuetégui, Ha’e ohekombo’éta ichupe oiporavokuaa hag̃ua haperã.

13Ha’e oiko porãitéta ha iñemoñarenguérape g̃uarã opytáta ko yvy kóva imba’etee ramo.

14Ñanderuete ohayhuhína umi okyhyjévape ichugui ha umi mba’e ha’ekuéra oikuaa’ỹva Ha’e omoarandúta ichupekuéra omoirũ porã guive ichupe.

15Ajesareko Ñanderuete rehénte, Ha’émante oguenohẽta che pykuéra che ñuhãgui.

16Ema’ẽmína cherehe ha cheporiahuverekomína, aimégui che año ha jejopy vaípe.

17Ajepy’apyeterei ningo, cheguenohẽmína che jehasa asýgui.

18Ema’ẽmína che jepy’apy asy ha che jehasa asy rehe, ha cheperdonami opaite che rembiapo vaíre.

19Ema’ẽmína umi cherehe ija’e’ỹvare, mba’eichaitépa oñemboheta hetave hikuái ha pochy vaipópe chejukase.

20Eñangarekomína che ánga rehe, chepytyvõmína, Nde nachembotavymo’ãi, che ajeroviágui nderehe.

21Pe teko añetegua ha teko potĩ toñangareko cherehe, ajeroviágui nderehe.

22Nde, che Ruete, eguenohẽmína opaite Israelguakuérape ijehasa asýgui.