Juéces 4 - Biblia en Guaraní - ?anderuete ?e’? Por? 2015

Débora ha Barac ombopoguy Sísarape

1Eud omano rire, Israel ñemoñarenguéra ojapo jevy ivaíva Ñanderuete resa renondépe.

2Ha Ñanderuete ome’ẽ ichupekuéra Jabin, Canaan retã ruvicha pópe, ha péva oiko tetã ruvicha ramo Hazórpe; ha isoldádo aty ruvicha héra Sísara, ha péva oiko Haroset-goímpe.

3Ha umi Israel ñemoñare omba’ejerure asy Ñanderuetépe, Sísara oguereko 900 cárro hierroguiguáva ha ojopy asýgui Israel ñemoñarenguérape 20 áño pukukue.

4Umi árape peteĩ kuñakarai, Débora, peteĩ profetísa, Lapidot rembireko; oisãmbyhy Israélpe mbojovakehára ramo;

5ha Débora oguapými jepokuaase háicha karanda’y rakã guýpe, Rama ha Betel pa’ũme, Efrain cérrope; ha Israel ñemoñarenguéra ou hendápe ñembojovake rekávo.

6Ha Débora ohenoiuka Barac, Abinoam ra’ýpe, oikóva Cedéspe, ha’e Neftali tríbu rehegua, ha he’i ichupe: Ñanderuete he’iuka ndéve rembyaty hag̃ua nde poguýpe tapichakuérape Tabor cérrope, upévare eraha nendive 10.000 kuimba’e Neftali ha Zabulon tríbugui;

7ha Che aguerúta nde reimeháme Cison yakãme, Sísarape, Jabin soldádo ruvicha, icárro ha isoldadokuéra ndive, ha amoĩta ichupekuéra nde pópe.

8Ha Barac he’i ichupe: Nde reho ramo chendive, che aháta; ha nderehói ramo chendive, ndahamo’ãi avei.

9Ha Débora he’i ichupe: Aháta nendive, pe tembiapoguasu rerakuã katu nanderupitymo’ãi, Ñanderuete omoĩtagui Sísarape peteĩ kuña pópe. Ha Débora opu’ã ha oho Barac ndive Cedéspe.

10Ha Barac ombyatyuka Zabulon ha Neftaligui 10.000 kuimba’ekuérape Cedéspe, ha Débora oho hendivekuéra Tabor cérrope.

11Ha Héber peteĩ Cengua, Hobab, Moises rovaja ñemoñare, ojeiva’ekue ambue Cenguakuéra apytégui, ha Heber ohova’ekue omohenda hóga hymba pirekueguigua Zaanaim ñúme, opytáva Cedes ypýpe.

12Ha og̃uahẽ Sísara apysápe Barac, Abi-noam ra’y, ojupi hague Tabor cérrope.

13Upéramo Sísara, ombyaty opaite 900 cárro hierroguiguáva ha isoldadokuérape oho hag̃ua Haroset-goim guive Cison yakã meve.

14Upéi Débora he’i Barácpe: Epu’ã, ko ára kóvape Ñanderuete omoĩma Sísarape nde pópe. Ñanderuete ohóta ne renonderãme. Ha Barac oguejy Tabor cérrogui, ha umi 10.000 kuimba’e oho hapykuéri.

15Ha Ñanderuete ojapo sarambiguasu Sísara rehe, mayma icárro rehe ha isoldádo aty rehe, Barac kyse puku renondépe; ha Sísara ojepoi icárrogui okañy hag̃ua yvy rupi.

16Ha Barac omuña Sísara soldádo ha carrokuérape Haroset-goim peve, ha opaite Sísara soldadokuéra ho’a kyse puku hãimbekuépe, avave nahembýi.

17Ha Sísara okañy yvy rupi og̃uahẽ meve Jael, pe Cengua, Heber rembireko róga hymba pirekueguiguápe, oĩgui jekupytýpe Jabin, Hazor retã ruvicha ha Heber, Cengua ndive.

18Ha osẽvo Jael omomaitei Sísarape, he’ívo ichupe: Eju, nde, che jára, eju che rendápe, ani rekyhyjétei. Ha ha’e ou hendápe hóga hymba pirekueguiguápe, ha Jael oñu’ã ichupe peteĩ ahojápe.

19Ha Sísara he’i ichupe: Ajerure ndéve chemboy’umi, chey’uheietereíko. Ha Jael oipe’a peteĩ kamby ryru mbotyha ha ho’uka ichupe, ha upéi oñu’ã jevy ichupe.

20Ha Sísara he’i ichupe: Eñemoĩ nde róga hymba pireguigua rokẽme; ha oĩ ramo oúva, ha oporandu ramo ndéve, he’ívo: Oime piko ko’ápe peteĩ kuimba’e okañýva, nde eréta ichupe nahániri.

21Ha Jael, Heber rembireko katu ogueru peteĩ yvyra akua mbyky (poste’i) pe óga hymba pirekueguiguágui ha omoĩvo peteĩ martíllo ipópe, oñemboja kirirĩhaitépe Sísara rehe ha’e opytu’u jave, hopehyiete ha ikane’õitereígui, ha ombyasuru pe yvyra akua isyva yke rehe, ojakutu peve yvy rehe, péicha Sísara omano.

22Ha Barac ohóvo Sísara rapykuéri, Jael osẽ omomaitei hag̃ua ichupe, ha he’i: Eju, ahechaukáta ndéve pe kuimba’e nde rehekávape. Ha ha’e oike Jael oĩháme, ha péina ápe Sísara re’õngue ojepyso upépe, ha pe yvyra akua mbyky oĩ isyva yke rehe.

23Péicha Ñanderuete oity Jabin, Canaan retã ruvichápe, Israel ñemoñarenguéra pópe.

24Ha Israel ñemoñarenguéra oñembopohýi pohyive Jabin Canaan retã ruvicha ári, ombopoguypa peve ichupekuéra.