Provérbios 17 - Biblia en Guaraní - ?anderuete ?e’? Por? 2015

1Iporãve peteĩ mandi’o pehẽngue nandi py’aguapy reheve, peteĩ óga henyhẽva so’ógui ñorãirõ reheve.

2Pe tembiguái iñakãguapýva oisãmbyhy ijára ra’y iñañávape, ha omboja’óta ityvyrakuéra apytépe ijára mba’erepykue.

3Pe tata omopotĩ háicha pe óro morotĩ ha pe tatakua’i pe óro; upéicha Ñanderuete oha’ã ha omopotĩ avei ñande py’apy.

4Pe iñañáva ojapysaka juru tie’ỹ rehe, ha pe oporombotavýva ojapysaka pe iñañáva juru he’íva rehe.

5Pe oñembohorýva mboriahu rehe omotĩ Ijapoharépe; ha upe ovy’áva hapicha ho’yguývare ojehavirava’erã katuete.

6Temimenonguéra (inietokuéra) ningo taitaguasu rerakuã porã, ku akã jeguaka porãváicha, ha ta’yrakuéra rerakuã porã ningo ituvakuéra.

7Naiporãi pe itavýva ojehechauka iñarandúvarõ, ko’yteve pe mburuvicha ijapúva.

8Upe oporombopopegua ñemíva oimo’ã ipirapire ojogua pajépe, ohupity hag̃ua opaite mba’e oipotáva guive.

9Upe oporohayhúva omo’ã hapicha jejavy, ha upe omombe’úva hapicha jejavy omboja’o iñirũnguérape.

10Pe jeja’o ou porãve pe iñakã porãvape, 100 teju ruguáigui pe itavýva atukupére (ilómore).

11Pe heko ñepu’ãva ohekánte mba’evai, ha oñemondóta hendápe peteĩ oiporiahuverekose’ỹva.

12Iporãve peteĩ kuimba’e oñohug̃uaitĩ ramo peteĩ óso (jaguarete), ita’yrakuéra oñemondava’ekue ndive, oñohug̃uaitĩ rãngue peteĩ ivýrova ndive.

13Upe omyengoviáva mba’evai iporãva rehe, pe mba’evai noñemboykeiva’erã araka’eve hógagui.

14Pe omoñepyrũva pe ñorãirõ ojoguaite umi yetágui ojepoívape; ejeíke pe ñorãirõgui, rejasuru mboyve ipype.

15Pe opoíva mba’evai apoháragui, omoinge hag̃ua pe mba’eporã apohárape cárcelpe ojahéi Ñanderuete rehe.

16Ma’erãpa iporã pirapire výro reíva pópe, ojoguakuaánepa arandu, ha’e ningo naiñakã porãi.

17Pe angirũ (amígo) opaite araitépe oporohayhu, ityke’yraichaite oipytyvõse iñirũme pe angekõi vaiha árape.

18Ivýro ningo pe kuimba’e oipytyvõse ramo hapicha odevévape opárupi.

19Upe ohayhúva ñorãirõ, ohayhu pe teko vai ha upe ombo’yvateitereíva hóga rokẽ oityukáta hogaguasu.

20Pe itie’ỹ ñañáva araka’eve ndojohuiva’erã mba’eporã, ha upe ohayhúva japu ojeityva’erã.

21Upe omoheñóiva peteĩ ta’ýra ivýrova oñembyasyva’erã; ha pe ivýrova ru ndovy’aiva’erã.

22Pe py’a rory ningo omomimbi ñande rova; pe py’angekõi katu ñanemokangy.

23Pe iñañáva oñembopopegua ñemiháme omokarẽ hag̃ua ñembojovake heko peguáva.

24Pe iñakãguapy porãva resa renondépe oĩ arandu, umi ivýrova resa katu oho rei pe yvy apýra paha peve, (ha ndojohúi arandu).

25Pe ta’ýra ivýrova ombopochy itúvape ha omomba’embyasy isýpe.

26Naiporãi peteĩ mburuvicha ojopy ramo peteĩ kuimba’e heko peguávape ojerure rei haguére ipirapire, ivaieteve katu pe mburuvicha oinupã rei ramo ichupe.

27Pe ojokóva ijuru iñarandu, ha pe ipy’aguapýva ohechauka iñakãguapy iporãha.

28Peteĩ ivýrova okirirĩ rire, ojeguerekova’erãmo’ã ichupe iñarandúva ramo; ha upe ojejuru mbotýva ojeguereko iñakãguapýva ramo.