Ezequiel 25 - Biblia en Guaraní - ?anderuete ?e’? Por? 2015

Marandu Amónpe g̃uarã

1Ñanderuete ñe’ẽ ou chéve ha he’i:

2Kuimba’e ra’y, emoĩ nde rova umi Amon ñemoñare gotýo, ha eprofetiza ichupekuéra.

3Ha eréta Amon ñemoñarenguérape: Pehendúke pende Ruete ñe’ẽ, péicha he’i pende Ruete: Peñembohory haguére, oñemongy’águi che rogaguasu ha oñembotaperégui Israel yvy ha ojeguerahágui Israelguakuérape jepokuapyhápe,

4upévare, peikuaa porãke, Che pomoĩ umi kuarahyresẽha gotyogua rembiguái ramo, omopu’ãta hikuái ne mbytépe ikorapy ha hogarãnguéra; ha’ekuéra ho’upáta pene ñemitỹngue ha pende vaka kamby.

5Rabágui ajapóta icamellokuéra kapi’ity, ha Amon ñu opytáta ijovecha atýpe g̃uarã ha peikuaáta Che ha’eha Yvága Atykuéra Jára.

6Péicha he’i Ñanderuete: Peẽ Amongua pejepopetégui ha pembota mbotágui pende py, ha pene ánga mbytete guive pevy’a Israel retã ohasa asy eterei haguére,

7upévare, peikuaa porãke, Che chepojái penderehe ha pomoĩta tetãnguéra poguýpe penemondapa hag̃ua; poikytĩta ha pohundíta tetãnguéra apytégui; pohundietéta, peikuaa hag̃ua Chénteha pe Oikovéva tapia g̃uarã.

Marandu Moábpe g̃uarã

8Péicha he’i pende Ruete: Moab ha Seir he’i haguére: Juda retã oikóma avei ambue tetãnguéraicha;

9upévagui Che ambokuáta Moab táva rembe’ykuéra, oñehundipa hag̃ua itavakuéra ojeguerohoryetéva: Bet-jesimot, Baal-meon ha Quiriatáim,

10ha ijyvy Amon yvy reheve ahejáta ho’a umi kuarahyresẽ gotyogua pópe, anivéma hag̃ua oiko mandu’a Amon ñemoñarenguéra rehe ambue tetãnguéra apytépe.

11Che voi ambojovakéta Moábpe ha’ekuéra oikuaa hag̃ua Che ha’eha pe Oikovéva tapia g̃uarã.

Marandu Edómpe g̃uarã

12Péicha he’i pende Ruete: Edom ojapo vai haguére Juda retã rehe ha ojeity hi’arikuéra oiporiahuvereko’ỹre,

13upévare péicha he’i pende Ruete: Che avei aipysóta che po Edom rehe, ahundi hag̃ua hetãygua ha hymbakuérape, ha ambotaperéta ijyvy, Teman guive Dedan peve ho’áta kyse puku rupi.

14Che retã Israel po rupi ahaviráta Edómpe, ha ojapóta hikuái Edom rehe che pochy oipota háicha; ha oikuaáta hikuái Che voi ahaviraha ichupekuéra, he’i pende Ruete.

Marandu Filistéape g̃uarã.

15Péicha he’i pende Ruete: Umi Filisteaygua ojeity tapiágui Israelguakuéra ári oiporiahuvereko’ỹre, ipy’aro reheve, ha ohundise Israelguakuérape ñembohorypópe,

16upévagui péicha he’i pende Ruete: Pema’ẽ porãke, Che aipysóta che po umi Filisteaygua rehe, ha ahundíta umi Cretayguápe nahembyvéi peve ko’ã tetãygua oikóva yguasu rembe’ýpe.

17Ha amyengovia rire hembiapo vaieta oikuaáta hikuái Che ha’eha pe Oikovéva tapia g̃uarã ha omyengoviáva yvyarigua rembiapokuerakue.