Matéo 8 - Biblia en Guaraní - ?anderuete ?e’? Por? 2015

Hesu omonguera hasývape

1Hesu oguejývo cérrogui, heta hetãyguakuéra omoirũ ichupe,

2ha oñemboja hendápe peteĩ iléprava, ha oñesũvo henondépe he’i ichupe: Che Jára, nde reipota ramo, chemopotĩmína.

3Ha Hesu ipojái ha opokóvo hese he’i: Aipota, tanepotĩ. Ha upevovete ipotĩmba ilépragui.

4Ha Hesu he’i ichupe: Ema’ẽ, aníke remombe’u avavépe, terehónte ha ejehechauka pa’ípe, ha eme’ẽ pe kuave’ẽmby Moises he’iva’ekue oñeme’ẽva’erãha, ojekuaa hag̃ua rekueramaha.

5Ha Hesu oikévo Capernaúmpe, oja hendápe peteĩ soldádo ruvicha, peteĩ capitan oisãmbyhýva 100 soldádope ha ojerure asy ichupe, he’ívo:

6Che Jára, che rembiguái ningo oime che rógape hasyetehína ha oime tupápe iñakuruchĩmbágui (ijapágui).

7Hesu he’i ichupe: Che aháta amonguera hag̃ua ichupe.

8Ha pe soldádo ruvicha katu he’i ichupe: Che Jára, ndaijái chéve nde reike hag̃ua che róga guýpe, erénte peteĩ ñe’ẽ ha che rembiguái okueráta katuete.

9Che ningo kuimba’e aikóva mburuvicha poguýpe, ha aguereko avei umi soldádo che poguýpe; ha ha’e ramo peteĩme: Tereho, ha’e ohóta; ha ha’e ramo ambuépe: Eju, ha’e oúta; ha che ha’e ramo che rembiguáipe ejapo kóva, ha’e ojapóta.

10Ha Hesu ohendúvo ko’ã ñe’ẽ ohecharamoite ha he’i umi hendive oúvape: Añetehápe Che ha’e peẽme, koichagua jerovia ndajohúi gueteri Israelguakuéra apytépe.

11Ha Che ha’e avei peẽme: Heta ouva’erãha kuarahyresẽguio ha kuarahyreikéguio okaru hag̃ua Abraham, Isaac ha Jacóbo ndive Ñanderuete retãguasúpe.

12Ha heta Israelgua katu oñemombova’erã pytũ oka peguápe, ha upépe oikóta tasẽ ha tãi pururũme.

13Ha Hesu he’i pe soldádo ruvichápe: Tereho ha toiko rejerovia hagueichaite. Ha upevovete hembiguái okuera.

14Uperire Hesu oike Pédro rógape, ha ohecha hembireko sýpe oñenoha tupápe iñakãnundu vaígui.

15Ha Hesu opoko ipo rehe ha pe akãnundu opi; ha ha’e opu’ã ha oservi ichupe.

16Ha ka’aru pytũvo ogueru hikuái ichupe heta kuimba’e oĩva mba’epochy poguýpe, ha Ha’e omosẽmba umi mba’epochýpe, ha omonguerapa ambue hasývape iñe’ẽ rupínte.

17Oiko hag̃ua pe proféta Isaías he’imava’ekue: Ha’e oguerahapa ijehe ñande reko vai ha ñane mba’asy, (Isaías 53,4).

Umi omoirũseva’ekue Hesúpe

18Ha Hesu ohechávo heta tetãygua ojerepáva hese, oñembohasauka yguasu mboypýri.

19Ha hendápe oñemboja peteĩ kuatia haihára ha he’i ichupe: Mbo’ehára, che romoirũta mamo rehohápe.

20Hesu katu he’i ichupe: Pe aguara ningo oguereko ijyvykua okañy hag̃ua, ha guyra ára rupigua oguereko haity; pe yvyarigua Ra’y katu ndoguerekói tenda omombytu’u hag̃ua iñakã jepe.

21Ha ambue hemimbo’e katu he’i ichupe: Che Jára, ehejánte taha tañotỹ raẽ che rúpe,

22Hesu katu he’i ichupe: Eju che rapykuéri, eheja umi omanóva toñotỹ umi omanova’ekuépe.

Hesu omombi pe yvytu

23Ha ojupi ha’e peteĩ canóape, hemimbo’ekuéra ndive.

24Ha upe yguasu mbyte rupi oho jave oñepyrũ peteĩ yvytu neratãva oipeju ha pe y pochy opu’ã ojaho’i hag̃uáicha pe canóape; Hesu katu okehína.

25Ha hemimbo’ekuéra ou omombáy ichupe he’ívo: Ore Jára oresalvána, ñañehundipapotaitéko ñaína,

26ha Hesu he’i ichupekuéra: Mba’érehe piko pekyhyje, peẽ ningo pejerovia’iete Ñanderuete rehe. Upévo Ha’e opu’ã ha oñe’ẽ pohýi pe yvytu ha pe yguasúpe, ha opi pe yvytu ha pe y pochy oguapypa.

27Ha umi kuimba’e ohecharamo joa, he’ívo: Máva piko kóva, pe yvytu ha pe yguasu jepe iñe’ẽrendu ichupe.

Hesu omonguera mokõi kuimba’épe oikóva mba’epochy poguýpe

28Og̃uahẽvo yguasu mboypýri, Gadaraygua yvýpe, ohuvaitĩ ichupe mokõi kuimba’e oikóva mba’epochy poguýpe, osẽva umi omanóva oñeñotỹha rendágui, ha ipochy raságui ndaikatuvéi avave ohasa upe tape upévarupi.

29Ha mokõivéva osapukái ha he’i: Mba’épa roguereko nendive, Nde Ñanderuete Ra’y. Rejúpa oremyangekõi hag̃ua og̃uahẽ mboyve ore ára.

30Ha namombyrýi upégui, okaruhína peteĩ kure atyguasu.

31Ha umi mba’epochy ojerure asy ichupe, ha he’i: Oremosẽ ramo, eheja oréve toroike umi kurepýpe.

32Ha Hesu he’i ichupekuéra: Tapeho. Ha upévo osẽmba, ha oike umi kure retepýpe; ha pe kure aty sarambikuépe ojepoipa cérro árigui yguasúpe, ha ho’yguypa.

33Ha umi kure rerekua okañymba pe távape ha omombe’u opaite mba’e ojehuva’ekue kurekuérape ha umi mokõi kuimba’épe oĩva’ekue mba’epochy poguýpe katu okuera.

34Ha upévo umi tavaygua osẽmba Hesu rendápe, ha ohechávo ichupe ojerure hikuái ichupe oho hag̃ua hekohagui.