Jeremías 33 - Biblia en Guaraní - ?anderuete ?e’? Por? 2015

Jehovasa pyahu Jerusalénpe g̃uarã

1Ou jevy Ñanderuete ñe’ẽ Jeremíaspe ha’e oiko jave gueteri cárcelpe, ha he’i:

2Péicha he’i pende Ruete: Ajaposéva guive ajapopáta katuete avei, amohenda porãmbáta hendag̃uáme, che réra Yvága Atykuéra Jára.

3Nde cherenói ramo Che ambohováita ndéve ha rombo’éta mba’e ndetuichapa jepévare, iñemimby ha reikuaa’ỹvare.

4Péicha he’i Ñanderuete, Israel Jára, umi óga ko távape oĩva rehe ha umi Juda retã ruvicha róga rehe, ojeitýta ha hesekuéra ija’e’ỹva oiporúta.

5Ha oñorãirõ jave umi Caldeaygua ndive, oñemyenyhẽta umi óga hembýva guive kuimba’e re’õnguégui. Che voi ahaviráta umíape che pochy rupi, ha añomi che rova ko táva kóvagui oñemohembiapo vai haguére hikuái.

6Pema’ẽ porãke, upéi katu Che aguerúta ichupekuéra ipohã, aipohãno ha amonguera jevy hag̃ua ichupekuéra, ha amyenyhẽta ichupekuéra py’aguapýgui ha amokyre’ỹ jevýta ichupekuéra.

7Ha agueruka jevýta umi ojeguerahava’ekue jepokuapýpe Juda ha Israélgui, ha amohenda jevýta ichupekuéra ku iñepyrũmby ramoguaréicha.

8Amopotĩta hembiapo ky’a ojapova’ekuégui hikuái che renondépe; ha aperdonáta hembiapo vai, oñemoĩ haguére cherehe.

9Upérõ Jerusalen chemomba’eguasúta ha omyasãita che réra opaite tetãnguéra yvy apére oĩva guivépe ha ohendupáta hikuái mba’eporãita Che ajapótava hesekuéra; ha okyhyjéta ha oryrýita hikuái ohendúvo opaite mba’e iporãva ha pe py’aguapy ame’ẽ jevýtava ichupekuéra.

10Péicha he’i pende Ruete: Ko táva kóvare, peje itapereha ha ipype ndoikovéima yvyarigua ni tymbakuéra, añetehápe ko’ág̃a umi Juda táva ha Jerusalen rapekuéra itaperepa ha ndaipóri yvyarigua ni tymbakuéra oguatáva upérupi.

11Og̃uahẽta katuete pe ára oñehendu jevývo vy’a ha toryguasu purahéi, kuimba’e ha kuña omendáva purahéi, ha oĩ jevýta umi he’íva: Pepurahéi Ñanderuete, Yvága Atykuéra Járape, Ha’e ipy’a porãgui, ha iporiahuvereko oĩ opaite ára ha vy’apópe opurahéita avei umi oguerúva kuave’ẽmby omomba’eguasu hag̃ua Ñanderuete rogaguasúpe. Aguerupa jevýta che retãyguakuéra ojeguerahava’ekue jepokuapyhápe oiko porã jevy hag̃ua ymaguaréicha, he’i pende Ruete.

12Péicha he’i pende Ruete, Yvága Atykuéra Jára: Ko táva kóva itaperéva, opytáva hetãygua’ỹre ha tymba’ỹre, opaite itavakuérape oĩ jevýta tymba rerekua oñangarekóva hymba aty rehe umi ñu oĩva itavakuéra jerekuévo.

13Umi táva oĩva cérrope ha yvypépe, umi táva oĩva Négevpe ha Benjamin yvýpe, Jerusalen jerekuévo, ha ambue táva oĩva guive Juda yvýpe, opárupi ojehecha jevýta umi tymba rerekua oipapáva hymbakuérape, he’i pende Ruete.

14Peikuaa porãke outahahína pe ára, he’i pende Ruete, Che amoañetetaha pe ñe’ẽ porãite ha’emava’ekue guive Israel ha Judayguakuérape.

15Umi ára umívape amoheñói jevýta Davídpe g̃uarã peteĩ iñemoñare heko porãva, ha oisãmbyhýtava hekoitépe ha justícia reheve ko yvy kóvape.

16Umi ára umívape Juda ojesalváta, ha Jerusalen oikóta py’aguapýpe, ha herarã: “Ñanderuete, ñandejustícia”.

17Péicha he’i pende Ruete: Katuete oĩ jevýta David ñemoñare oguapýtava opaite árape Israel róga mburuvicha guapyhaguasúpe.

18Ha umi pa’i Levi ñemoñare apytépe tapia oĩta avei peteĩ kuimba’e oikuave’ẽva kuave’ẽmby ojehapypáva, ohapýva tembi’u ha oikuave’ẽva ambue tymbakuérape.

19Upéi Ñanderuete oñe’ẽve Jeremíaspe, ha he’i:

20Péicha he’i pende Ruete: Peẽ ndaikatúi pembyai pe ñe’ẽme’ẽ arekóva pe ára ha pe pyhare ndive, ohesape hag̃ua hi’óra ha hi’árape,

21péicha avei peẽ ndaikatúi pembyai pe ñe’ẽme’ẽ arekóva che rembiguái David ndive. Ha’e tapia oguereko hag̃ua peteĩ ta’ýra oguapýva hetã ruvicha guapyhápe, ha avei pe ñe’ẽme’ẽ arekóva che rembiguaikuéra, umi pa’i Levigua ndive.

22Ha ndaikatúi háicha ojepapa mbyjaita ára pegua ni yvyku’i ra’ỹi yguasu rembe’ýpe oĩva, péicha ambohetáta che rembiguái David ñemoñarenguéra ha avei Levi ñemoñarenguéra, ko’ãva oiko hag̃ua che rembiguái ramo.

23Ou Ñanderuete ñe’ẽ Jeremíaspe, ha he’i:

24Nderehechakuaáipa ko tetã rehe oje’éva: Ko’ã mokõi tetã, Juda ha Israel, Ñanderuete oiporavomava’ekue, ha ko’ág̃a Ha’e omboykéma. Péicha ojapo’i hikuái che retãme, ndoguerekovéi peve ichupe tetã ramo.

25Upévare he’i pende Ruete: Areko háicha che ñe’ẽme’ẽmby pe ára ha pe pyhare ndive, ha ame’ẽ háicha che rembiapoukapy yvagakuéra ha yvýpe,

26péicha che namboykemo’ãi avei pe ñe’ẽme’ẽ Jacóbo ñemoñarenguéra ha che rembiguái David ñemoñarenguéra ndive, upéicha avei Abraham, Isaac ha Jacóbo ñemoñarenguéra apytégui oĩta katuete peteĩ oguapýva David guapyhaguasúpe. Agueru jevýta umi ojeguerahamava’ekue jepokuapyhápe, ha aiporiahuvereko jevýta ichupekuéra.