Ezequiel 30 - Biblia en Guaraní - ?anderuete ?e’? Por? 2015

1Ou chéve Ñanderuete ñe’ẽ, ha he’i:

2Kuimba’e ra’y, eprofetiza ha ere: Péicha he’i pende Ruete, pejahe’óta, angái, angái, upe ára upévare.

3Hi’ag̃uietéma upe ára, hi’ag̃uíma pende Ruete ára, ha upe ára Ha’e ohavirataha tetãnguérape, pévata peteĩ ára ijaraipáva.

4Ha oúta kyse puku Egíptope, ha ojekyhyjéta Etiopiayguakuéra ho’a vove Egíptoyguakuéra kyse pukúpe ha omondáta hikuái ichuguikuéra imba’erepyeta, ha oitýta hikuái itáva korakuéra.

5Umi Etiopiaygua, Libiaygua, Lidiaygua, Arabiaygua, Cubgua ha umi Judaygua, ohóva oipytyvõ hag̃ua ho’apáta Egiptoyguakuéra ndive kyse puku rãimbépe.

6Péicha he’i pende Ruete: Upépe ho’áta kyse puku rãimbépe umi Egípto pytyvõharakuéra, Egípto oñembotuicha haguére ha péva ojehúta Migdol guive Sevene peve, he’i pende Ruete.

7Ha Egípto itaperepáta ambue tetãnguéra ijerekuévo itapere háicha, ha itavakuéra oñembyaipáta ambue táva ijerekuévo oñembyaipa háicha.

8Ha oikuaáta hikuái Che ha’eha pe Oikovéva tapia g̃uarã amboja vove tata Egípto rehe ha oñehundipávo ipytyvõharakuéra.

9Upe ára upévape osẽva’erã che renondégui umi ñe’ẽ rerahahára barcoguasúpe omyangekõi hag̃ua Etiopíape, oikóva py’aguapýpe, ha oñemondýita ku Egípto ára peguáicha, cháke og̃uahẽmbotamahína.

10Péicha he’i pende Ruete, Jahve: Nabucodonosor, Babilónia retã ruvicha po rupi ahundíta Egiptoyguakuérape.

11Ha’e ha hetãyguakuéra, umi iñarõvéva tetãnguéra apytégui, oúta ohundi hag̃ua Egípto retãme ha oguenohẽta hikuái ikyse puku hyrúgui omyenyhẽ hag̃ua pe tetã te’õnguégui.

12Che ambohypáta ijysyrykuéra, ha amoĩta ijyvy tekove iñañáva poguýpe, ha tetã ambueygua po rupi ahundíta ijyvy ha opaite mba’e oĩva guive ipype. Che, pe Oikovéva tapia g̃uarã, añe’ẽma.

13Péicha he’i pende Ruete, pe Ha’etéva, Jahve: Ahundíta ijára ra’ãngakuéra, ha umi jára gua’u Ménfis pegua. Egípto oñehundíta, imburuvicha ha hetãyguakuéra okyhyjepáta.

14Patros ambotaperéta, Zoan rehe amyendýta tata ha Tébas ambojovakéta.

15Ha che pochy añohẽta Sin ári, pe Egípto táva omongora mbaretéva rehe, ha ahundíta umi Tebasguápe.

16Ha amyendýta tata Egípto rehe, Sin ohasa asyetereíta, Tébas oñemboja’opáta, ha Ménfis ojepy’apy asýta.

17Umi Aven ha Pibesetgua ñorãirõhára pyahu ho’apáta kyse puku rãimbépe, ha hembirekokuéra ohopáta tembiguái ramo ambue tetãme.

18Upe ára upévape Tafnéspe iñypytũta, ahundi jave Egípto pu’aka, opa hag̃ua iñembotuicha; pytũ oñu’ãta ichupe, ha itajýra ojegueraháta tembiguái ramo.

19Ha péicha ambojovakéta Egíptope, ha oikuaáta hikuái Che Yvága Atykuéra Jarateeha.

20Ojehu pe áño 11-hápe, jasy peteĩháme ha pe ára 7-hápe, ou chéve Ñanderuete ñe’ẽ ha he’i:

21Kuimba’e ra’y, Che amopẽva’ekue faraon, Egípto retã ruvicha jyva; ha péina noñepohãnói ha ndojejokuái ojoapy jevy hag̃uáicha, ikatu hag̃uáicha imbarete jevy ha oiporu jevykuaa ikyse puku,

22upévare, péicha he’i pende Ruete: Ema’ẽ porãke, Che apu’ãta faraon rehe, Egípto retã ruvicha, ha amopẽta ijyvakuéra, hesãiva ha hasýva, ha aitýta pe kyse puku ipógui.

23Ha amosẽta Egiptoyguakuérape hetãgui ha amosarambíta ichupekuéra ambue tetãnguéra apytépe.

24Ha amombaretéta Babilónia retã pyapy, ha ipópe amoĩta che kyse puku; Che amopẽta faraon jyva ha ipyahẽ asýta ha’e ku omanombotáva ipyahẽ háicha, hese ija’e’ỹva renondépe.

25Che katu amombaretéta Babilónia retã ruvicha jyva, faraon jyva katu ho’áta; oikuaa hag̃ua hikuái Che Yvága Atykuéra Jarateeha ág̃a amoĩ vove che kyse puku Babilónia retã ruvicha pópe, ha’e oñemoĩ hag̃ua Egípto retã rehe.

26Ha amosẽta umi Egiptoyguápe hetãgui, amosarambi hag̃ua ambue tetãnguéra apytépe; ha oikuaáta hikuái Che Yvága Atykuéra Jarateeha.