1Upérõ Bildad, pe Suah pegua, ombohovái Jóbpe, ha he’i:
2Araka’e pevépa reñe’ẽ reíta, reiporu porãkena ne akã ha upéi ñañemongetakuaa.
3Mba’érehe piko nde oreguereko mymba iñakã porã’ỹva ramo, nde resápe oretavypa.
4Nde, ndepochýgui reñepehẽ’amba rei, nderehehápe piko ko yvy inandíta ha umi itaguasu ojeguerovapáta hendágui.
5Añetehápe heko vaíva resape ogueva’erã, ha ndohesapemo’ãi hata rendy.
6Hesape oñemoypytũ ohóvo hógape ha ipahápe oguepáta avei.
7Iguata mbarete ikangyve ohóvo ha umi mba’evai ojaposéva oitýta ichupekuéra.
8Ñuhã oñemoĩma ipy renonderãme, ha ñuhã iñasãivape ha’e ho’ava’erã;
9pe ñuhã ojoko ipy, ha isã ojokua ichupe.
10Isã oñemokañy yvy guýpe, ohasa vove ha’e, ho’a hag̃ua ipype.
11Opárupi oiko umi omondýiva ichupe, ha ijerekuévo oĩ umi omuñáva ichupe.
12Ijehasa asyrã oha’ãroma ichupe ha iñehundirã oñembosako’íma ichupe g̃uarã.
13Mba’asy okaru ipire rehe ha pe mano omokõse hetépe.
14Oñeguenohẽ ichupe hógagui, oiko haguépe py’aguapýpe, ha pe ñemano ruvicha omuña ichupe.
15Hogateépe oikóta imba’e’ỹrõ guáicha ha azúfre akytã oñemyasãita ha’e oiko haguépe.
16Yvy guýpe hapokuéra, ha yvate hakãnguéra ipirupáta.
17Yvy apére tesaráipe opytáta, ha itáva ryepýpe héra ndopytamo’ãi.
18Ñanderuete tesakã rendágui omombóma ichupe iñypytũháme, ha oñemosẽ ichupe yvy apégui.
19Ndaita’ýrai ha naiñemoñaremo’ãi hetãme, ha hógape avave ndoikomo’ãi hendaguépe.
20Umi kuarahyresẽ gotyogua oikuaávo umi mba’e ojehúva ichupe oñemondyietéta, ha umi oikóva kuarahyreike gotýo okyhyjepáta.
21Añetehápe upéicha ohasahína umi heko vaíva ha ko’ã mba’e ojehúta umi oñemoĩvare Ñanderuete rehe.
Who We AreWhat We EelieveWhat We Do
2025 by iamachristian.org,Inc All rights reserved.
