Nahum 1 - Biblia en Guaraní - ?anderuete ?e’? Por? 2015

Ñanderuete ipochy Nínive ndive

1Ko’ã ñe’ẽ Ñanderuete he’iuka Nínive rehe. Ha’e ojehechauka payetépe (visiónpe) Nahum, peteĩ Elcosguápe.

2Ñanderuete ningo peteĩ Jára hakate’ỹva ha omyengoviáva kuimba’e ha kuña rembiapokue ha ipochýpe ohepyme’ẽ umi oñemoĩvape hese, Ha’e ipochy umi hese ija’e’ỹva rehe.

3Ñanderuete hasy ipochy hag̃ua ha ipu’aka tuichaiterei, henonderãme ndaipóri ánga ipotĩva, Ha’e ndohejái ohavira’ỹre iñañávape. Ñanderuete og̃uahẽ pe ára vai ha pe yvytu jepoka rupi, ha umi arai ipykuéra yvy timbokuénte.

4Ha’e omongyhyje pe yguasu, Ha’e omokã ha ombohypa opaite ysyrykuéra, upéicha ombopirupa Basan, Carmel ha Líbano potykue.

5Umi cerro tuicháva oryryipa henondépe ha pe yvy aty hykupa, pe yvy ha opaite oikóva guive ijape ári osusũmba.

6Mávapa opytáne ndepy’aro ramo, ha mávapa oñembo’ýne gueteri ne renondépe nde pochy ramo. Ipochy oñeñohẽ tatáicha ha ojoka itaguasu jepe.

7Ñanderuete oikuaa porã umi ojeroviáva hese, Ha’e ipy’aporã hendivekuéra; ichupekuéra g̃uarã Ha’e peteĩ táva oñemombaretéva, oiko hag̃ua ipype og̃uahẽ ramo pe jehasa asy.

8Ysyry oñu’ãmbávape Ha’e ombokusuguepáta umi hese oñemoĩvape, ha ypytũ ohóta umi hese ija’e’ỹva rapykuéri.

9Mba’épa pejepy’amongeta pende py’apýpe pende Ruete rehe. Ha’e ohundipáta, natekotevẽi ohavira mokõi jevy umi hese oñemoĩvape.

10Taha’e jepe ku ñuatĩ iñapajuãimbávaicha, hykuepa ramojepe, okaiva’erã ku yvyra rogue pirukuéicha.

11Nínivegui osẽkuri upe omoheñoiva’ekue iñapytu’ũkuápe mba’evai Ñanderuete rehe, pe ohundiséva hapichakuérape.

12Upévare Ñanderuete he’i Nínive rehe: Jepevémo oiko gueteri py’aguapýpe, ha hetaite kuimba’e ha kuñakuéra oiko ramojepe ndepype, omanombáta ha oñehundipáta. Ambohasa asyva’ekue ramojepe che retãme, ko’águi rire nahanirivéima.

13Ko’ág̃a amopẽtama ne cangálla nde ári oĩva, ha amondohóta ne sãnguéra.

14Ha Asíria rehe katu Ñanderuete he’i, ne ñemoñarenguéra ha nde réra opa reiva’erã, ahundíta umi ta’ãnga oñembohykupyréva oĩva nde jára rógape ha upépe amoĩta nde sepulturarã, nde rekove iñañaiterei haguére.

Pe táva Nínive ho’áta

15Pema’ẽ porãke umi cérro rehe ouhína pe oguerúva peteĩ marandu porã ha omoherakuãva py’aguapy. Nde, Juda emboarete nde aretekuéra, ha ejapóke umi mba’e nde ereva’ekue rejapotaha Ñanderuetépe g̃uarã, araka’evéma ndoikemo’ãvéigui ndepype pe iñaña rekóva, omanombaitétagui.