Apocalípsis 3 - Biblia en Guaraní - ?anderuete ?e’? Por? 2015

Pe ñe’ẽ Sárdespe g̃uarã

1Ehai Sárdes iglésia rembijokuáipe g̃uarã: Péicha he’i pe oguerekóva umi 7 Ñanderuete Pytu Porãite ha umi 7 jasytata ipópe: Aikuaa porã ne rembiapokue, oje’e ningo nde reikoveha, remanóma ramojepe.

2Epáy katu ha emombarete umi omanombotávape; ndajohúiko ne rembiapo porãmbaha Ñanderuete renondépe.

3Nemandu’ákena pe mba’e rehupityva’ekue ha rehenduva’ekue rehe, upévare eñembyasyete ha ejevy Ñanderuete rendápe, nderepaýri ramo ajúta ne rendápe mondaháicha ha ndereikuaamo’ãi araka’etépa ajúta ne rendápe.

4Rereko jepe Sárdespe mbovymi nomongy’aiva’ekue ijao, ha umía oikova’erã chendive ao morotĩ reheve, hembiapo porã ojerurégui péicha.

5Upe ombopoguýva mba’evai oñemondéta ao morotĩme; ha ndaipe’amo’ãi héra pe tekovete rehegua kuatiañe’ẽgui, amombe’uva’erã uvei héra che Ruete ha ijyvága rembiguaikuéra renondépe.

6Pe ijapysáva tohendu pe Pytu Porãmbáva he’íva ijiglesiakuérape.

Pe ñe’ẽ Filadélfiape g̃uarã

7Ehai pe Filadélfia iglésia rembijokuáipe g̃uarã: Péicha he’i pe Heko Porãitéva, pe Añeteguáva, pe oguerekóva tetã ruvicha guasu David lláve, oipe’áva pe okẽ ha avave ndaikatúiva omboty, Ha’e omboty rire avave ndaikatúi oipe’a jey.

8Aikuaa porã ne rembiapokue. Eikuaa porãke, Che voi aipe’a peteĩ okẽ ne renondépe ha avave ndaikatúi omboty; ha nde nekangy ramojepe rejapo Che rembipota ha nerembotovéi Che réra.

9Ema’ẽ porã, Che amondóta ne rendápe Satana iglésia pegua, he’íva ijehe Israel ra’yha, ndaha’éi katu, ijapu uvei. Eikuaa porãke, Che voi amog̃uahẽta avei ichupekuéra ne rendápe ojeity hag̃ua ovapývo nde py renondépe, ha’ekuéra oikuaa hag̃ua Che rohayhu hague.

10Nde rejapo haguére hekoitépe Che ñe’ẽ, Che añangareko porãta nderehe ou vove pe jehasa asyguasu ohupitýtava opaite tetãyguakuérape oikóva guive yvy ape ári, ojepy’ara’ã hag̃ua.

11Péinako Che aju pya’ete, upévare eñangareko porãke pe reguerekóva rehe, ani hag̃ua avave oipe’a ndehegui ne akã jeguaka.

12Upe ombopoguýva mba’evai Che ajapóta ichugui peteĩ horcon che Ruete iglésiaguasúpe, ha araka’eve ndojepe’amo’ãi hendágui ha Che ahaíta hese Che Ruete réra ha Che Ruete táva réra, ko táva kóva ningo Jerusalen, oguejýtava yvágagui, ha hese ahaíta avei Che réra pyahu.

13Pe ijapysáva tohendu pe Pytu Porãmbáva he’íva ijiglesiakuérape.

Pe ñe’ẽ Laodicéape g̃uarã

14Ehai Laodicéa iglésia rembijokuáipe g̃uarã: Péicha he’i pe Amen, pe Techahare heko peguáva ha añeteguáva, pe Ojapóva Ñanderuete rembiapo tenonde peguáva.

15Aikuaa porã ne rembiapokue, nanero’ysãi ni nanderakúiha; mba’eichatamora’e nero’ysã térã nderaku ra’e.

16Nderakuvevúi haguére katu, ha nanderakúi térã nanero’ysãigui Che rog̃ue’ẽta (rovomitáta) che jurúgui.

17Ere ningo: Chemba’eitáko, añemomba’éma heta mba’ére ha naikotevẽi mba’eve rehe, nderehechakuaái katu ndeporiahuha, nde revy’a’ỹha, nemboriahuha, neresatũha ha ndeopivoha.

18Upévare Che ha’e ndéve ejogua chehegui óro ñemopotĩmbyréva neñemotĩetéi hag̃ua, ejogua chehegui ao morotĩ reñemonde hag̃ua, ani hag̃ua ojehecha ndeopivoha ha reñemotĩete, ejogua avei chehegui tesa pohã reñepohãno hag̃ua ha rehecha porã jey hag̃ua.

19Che ningo ahekombo’e ha ahavira opaite ahayhúvape, upévare eñeha’ãmba reñembyasy hag̃ua rejapo vai haguére.

20Ema’ẽ porãke, Che añembo’yha’aína ne rokẽme ha ambota’aína (aikeségui). Oimeraẽ ohendúva Che ñe’ẽ ha oipe’áva hokẽ, aikéta hendápe akaru hag̃ua hendive, ha ha’e chendive.

21Upe ombopoguýva mba’evai Che amboguapýta ichupe chendive che guapyhaguasúpe, Che ambopoguy haguéicha mba’evai ha ko’ág̃a aguapy’aína avei Ñanderuete ndive iguapyhaguasúpe.

22Pe ijapysáva tohendu pe Pytu Porãmbáva he’íva ijiglesiakuérape.