1Pe áño 480-hápe Israel ñemoñarenguéra osẽ rire Egíptogui, ha Salomón oisãmbyhy aja irundy áñoma Israel retãme, Zif jasy (máyo) jave, péva hína pe jasy mokõiha, ha’e oñepyrũ omopu’ã Ñanderuete rogaguasu.
2Pe óga tetã ruvicha omopu’ãva’ekue Ñanderuetépe g̃uarã, ipuku 26,25 métro ha ipy 8,75 métro ha ijyvatekue katu 13,12 métro.
3Ha oĩ avei Ñanderuete rogaguy ipukúva 8,75 métro pe ogaguasu pykue javeve, ha pe óga rovái ipy 4,37 métro.
4Ha Salomón ojapouka hovetãnguéra réha (réja) reheve,
5ha omopu’ã avei kotykuéra Ñanderuete rogaguasu ykére, ipukukuévo ha ipykuévo hapykue gotýo. Ha kotykuéra omopu’ãuka ojo’ári (3 píso).
6Iguy pegua kotykuéra ipy 2,18 métro, umi mbyte pegua ipy 2,65 métro ha umi yvate pegua ipy 3,06 métro. Okáguio ijerekuévo omopu’ãuka umi kotykuéra rendag̃ua oguapy hag̃ua hi’ári ani hag̃ua omoinge ivigakuéra Ñanderuete rogaguasu tápiape.
7Salomón omopu’ã pe óga ita oñemba’apopapyréva reheve, upévagui noñehendúiri martíllo ha córta hiérro ryapu pe óga rembiapópe, ha mba’eveichagua herramiénta hierroguigua ryapu.
8Pe koty mbyte pegua rokẽ opyta sur gotýo pe ogaguasúgui, ha ojejupi hag̃ua rupi oĩ peteĩ escaléra jere pe píso mbyte peguápe, ha pe píso mbyte peguágui ojejupi jevy pe píso mbohapyhápe ambue escaléra jere rupi.
9Ojejapopa rire umi tápia ojapouka pe ogaguasu ape (técho) cédrogui.
10Umi koty Ñanderuete rogaguasu jerére ijyvate 2,18 métro, ha ombojáva pe ogaguasu tápia cédro vígare.
11Ha Ñanderuete oñe’ẽ Salomónpe, he’ívo:
12Ko óga kóva nde remopu’ãva rehe ha’ese ndéve: Nde reiko ramo che ñe’ẽme he’i háicha ha rejapo ramo che rembiapoukapy, ha reiko ramo che aipota háicha, Che ajapóta nendive opaite mba’e Che ha’eva’ekue nde ru Davídpe.
13Upéicha Che aikóta Israel ñemoñarenguéra apytépe, ha ndapoimo’ãi che retã Israélgui.
14Péicha Salomón omopu’ã ha ojapopa Ñanderuete rogaguasu.
15Ha hyepýguio oñu’ãmba pe tápia cédrope, yvy guive pe ogahoja (técho) peve, ha pe píso oñu’ã cipres yvyrápe.
16Upéicha omboape hyepýguio Ñanderuete rogaguasu cédrope, yvy guive ijyvateveha peve, ha omboja’o pe ogaguasu oĩ hag̃ua peteĩ kotyguasu oñemboykéva Ñanderuetépe ha ipa’iguasúpe g̃uarãnte, 8,75 métro ipukukue.
17Ha pe ambue kotyguasu oñemboykéva heko potĩvape g̃uarã ha pa’ikuérape g̃uarã, opytáva henonde gotýo ipuku 17,50 métro.
18Ha pe óga ryepy omoñuãmba hikuái cédrope, ha ijeguaka hy’a ka’aguy ha yvoty ra’ãngápe. Cédrope ojejapopa Ñanderuete rogaguasu hyepýguio, ndojehechái peteĩ ita jepe itápia rehe.
19Ha pe kotyguasu oñemboykéva Ñanderuete ha pa’iguasúpe g̃uarãnte ombojeguaka hyepýguio, omoĩvo upépe Ñanderuete karameg̃ua omomandu’a hag̃ua Ñanderuete oñembopy’apeteĩ hague Israel ndive.
20Ko Ñanderuete kotyguasu ipuku 8,75 métro, ipy 8,75 métro ha ijyvate 8,75 métro, ha itapiakuéra oñuãmbaite oroteépe, ha ikuave’ẽmby renda cédro guiguáva oñu’ãmba avei órope.
21Péicha Salomon oñuãmbaite Ñanderuete rogaguasu kotykuéra ryepy órope, ha pe kotyguasu oñemboykéva Ñanderuetépe g̃uarã oñemboty cadéna oroguiguápe.
22Oñuãmbaite rire pe óga ryepy, yvate guive yvy peve, omohenda pe kuave’ẽmby renda cedroguiguáva Ñanderuete kotyguasu oñemboykéva pa’ikuérape g̃uarã ha oñuãmba avei oroteépe.
23Ojapo avei Ñanderuete kotyguasúpe g̃uarã mokõi querubin (ángel ruvicha) olívo yvyrágui, ha mokõivéva ijyvate 4,37 métro, (ha omohenda umíape Ñanderuete karameg̃ua ykére).
24Umi querubin pepo ipuku 2,18 métro, péicha peteĩ pepo apýra guive ambue pepo apýra peve ohupity 4,37 métro.
25Pe ambue querubin oguereko avei 4,37 métro, mokõivéva tuichakue peteĩcha, ha peteĩchaite ojejapo avei.
26Mokõivéva ijyvate 4,37 métro.
27Ko’ã querubin oñemoĩ Ñanderuete kotyguasu ryepýpe, ha ipepokuéra ojepyso peteĩ tápiagui ambue tápia rovái peve, ha pe koty mbytetépe ipepokuéra oja avei ojuehe.
28Ha Salomón oñuãmba avei ko’ã querubin órope.
29Ha Ñanderuete rogaguasu kotykuéra tápia rehe, hyepýguio ha okáguio ojapouka opaichagua ta’ãnga: Querubin, karanda’y ha yvotykuéra.
30Ha oñuã Ñanderuete rogaguasu píso órope, mokõivéva kotyguasúpe.
31Ñande Ruete kotyguasu rokẽ ojejapo olívo yvyrágui, ha umi horcon ojokóva pe okẽguasu oguereko 5 yke (5 cánto) ha pe okẽguasu oguereko mokõi hogue jováiva ha ojeréva.
32Mokõivéva okẽ rogue ojejapo olívo yvyrágui, ha ojapo hese: Querubin, karanda’y ha yvoty ra’ãngakuéra, ha oñu’ãmba avei órope, ko óro oñenupãmba martíllope ombyapepa hag̃ua umía.
33Ha umi horcon ojokóva Ñanderuete róga rokẽguasu ojeikehápe oguereko 4 yke (4 cánto).
34Ha mokõive okẽ ojejapo yvyra ciprésgui, ha mokõive okẽ rogue ojerekuaa.
35Ha ojapo hese querubin, karanda’y ha yvoty ra’ãngakuéra, ha oñu’ã joja óro ñenupãmbyre martíllope.
36Ha omopu’ã peteĩ korapy, hyepy pegua omoĩvo mbohapy ita rysýi oñemba’apopapyréva hese ha peteĩ yvyra rysýi cedroguiguáva.
37Ha pe áño irundyhápe, máyo jave, oñepyrũ Ñanderuete rogaguasu rembiapo (ñemomba’eguasu, cúlto).
38Ha pe áño 11-hápe, noviémbre jave, ojejapopa Ñanderuete rogaguasu rembiapo, 7 áño pukukue oñemba’apo oñemopu’ãmba hag̃ua Ñanderuete rogaguasu.
Who We AreWhat We EelieveWhat We Do
2025 by iamachristian.org,Inc All rights reserved.
