1Ha Israelguakuéra ohasapa rire pe Jordan, Ñanderuete oñe’ẽ Josuépe, ha he’i:
2Eiporavo Israel apytégui 12 kuimba’e, peteĩteĩ itribukuéragui,
3ha ere ichupekuéra: Pejapyhy, Jordan mbytégui, umi pa’i oñembo’y hágui, 12 itaguasu, ha pegueru penendive ha pemopu’ã pende tekoha pyhare pegua.
4Upéramo Josue ohenói 12 kuimba’e, ha’e oiporavova’ekue Israel ñemoñarenguéra apytégui, peteĩteĩ itribukuéragui,
5ha he’i ichupekuéra: Peju Ñanderuete karameg̃ua renondépe pe ysyry Jordan mbytépe, ha peteĩteĩva pejapyhy peteĩ itaguasu ha pehupi pende ati’y ári, Israel tríbu heta háicha.
6Ko’ãva pejapo oiko hag̃ua pende apytépe peteĩ techaukaha ramo; ha pene ñemoñarenguéra oporandu ramo ituvakuérape ambue ára, ha he’írõ: Mba’éiko he’ise ko ita atýra,
7pejeva’erã ichupekuéra: Pe Jordan y oñemboja’ova’ekue Ñanderuete karameg̃ua renondépe; ore rohasa ramoguare Jordan rupi, hi’y oñemboja’ova’ekue; ha pe ita atýra oikóta mandu’aha ramo Israel ñemoñarenguérape g̃uarã opaite árape.
8Ha Israelguakuéra ojapopa Josue he’i haguéicha ichupekuéra: Ojapyhy 12 ita Jordan ysyry mbytégui, Ñanderuete he’i haguéicha Josuépe, Israel tríbu heta háicha, ha ogueru pe tekohápe, ha upépe omopu’ã hikuái peteĩ ita atýra.
9Josue omopu’ãuka ambue 12 itaguasu Jordan mbytépe, umi pa’i oguerahava’ekue Ñanderuete karameg̃ua oñembo’y haguépe; ha upépe oĩ gueteri ko ára kóva peve.
10Ha umi pa’i ogueraháva pe karameg̃ua oñembo’y Jordan mbytépe ojejapo peve opaite mba’e Ñanderuete he’iva’ekue Josuépe ha ha’e ojapouka Israelguakuérape, Moises he’i haguéicha Josuépe; ha Israelguakuéra oñembopya’epya’e ohasa hag̃ua Jordan mboypýri.
11Pa’ikuéra oha’ãrõ Ñanderuete karamegũa reheve, Jordan ysyry rupa mbytépe, Ñanderuete renondépe, hetãyguakuéra ohasapa peve y mboypýri.
12Ruben kuimba’ekuéra, Gad kuimba’ekuéra ha Manases tríbu mbytere kuimba’ekuéra oho iñorãirõ rembiporu reheve Israelguakuéra renonderãme, Moises he’i haguéicha ichupekuéra.
13Oiméne 40.000 kuimba’e oñembosako’i porãmbáma, iñorãirõ rembiporu reheve, oñorãirõ hag̃uáicha Ñanderuete poguýpe Jerico ñuguasúpe.
14Pe ára pévape Ñanderuete ombotuicha Josuépe hetãyguakuéra resápe; ha’ekuéra okyhyje ha iñe’ẽrendu hag̃ua Josuépe, iñe’ẽrendu ha okyhyje haguéicha Moisésgui.
15Upéramo Ñanderuete oñe’ẽ Josuépe, ha he’i ichupe:
16Ere pa’ikuérape, ogueraháva pe karameg̃ua techaukaha reheguáva tosẽ hag̃ua hikuái Jordángui.
17Ha Josue he’i umi pa’ípe: Pesẽ Jordángui.
18Ha ojehu ningo umi pa’i ogueraháva Ñanderuete karameg̃ua techaukaha reheguáva osẽvo Jordan rupa mbytetégui ha ipypyte opokóvo pe yvy ikãháme, pe Jordan y oupa jevy hendaguépe, osyry jevy hag̃ua jepiguáicha hembe’y pukukue javeve.
19Ha pe ára 10-hápe, pe jasy peteĩháme, Israelguakuéra osẽ Jordángui ha opyta hikuái Gilgálpe, Jericógui opytávo kuarahyresẽha gotýo.
20Ha Josue omopu’ã Gilgálpe umi 12 ita ogueruva’ekue hikuái Jordángui.
21Ha he’i Israelguakuérape: Ko’ẽ ramo ára pene ñemoñarenguéra oporandu ramo ituvakuérape he’ívo: Mba’éiko he’ise ko’ã ita.
22Pemombe’uva’erã pende ra’ykuérape ha peje: Israel ohaságui ysyry Jordan rupi omyakỹ’ỹre jepe ipykuéra.
23Ñanderuete, Ñandejára, ombohypa Jordan y Israel renonderãme ohasapa peve, ojapo haguéicha Yguasu Pytãre (Mar Rójo), ohasapa ramoguare avei hikuái.
24Mayma tetãygua yvyarigua oikuaa hag̃ua Ñanderuete ipu’akapaha; ha pekyhyje hag̃ua Ñanderuete, Ñandejáragui opaite árape.
Who We AreWhat We EelieveWhat We Do
2025 by iamachristian.org,Inc All rights reserved.
