Isaías 65 - Biblia en Guaraní - ?anderuete ?e’? Por? 2015

Ñanderuete ohavira hetãme opáy hag̃ua

1Chereka ningo umi oporandu’ỹva’ekue cherehe ha chejohu umi chereka’ỹva’ekue, Che ha’ékuri: Péina ápe aĩ, péina ápe aĩ. Péva Che ha’e peteĩ tetãme ndogueraháiva che réra.

2Opaite ára Che aipyso che pokuéra peteĩ tetã oñemoĩva cherehe ha oguatáva peteĩ tape naiporãiva rehe ha oikónteva iñakãre ha oimo’ã háichante.

3Ko tetã kóva tapia chembopochy oikuave’ẽvo hemitỹnguégui, ha ohapýva mba’e ryakuã porã ita atýra ári;

4ha’ekuéra oguapy umi sepultúra oĩha rupi ha ohasa pyharekuépe iñypytũha rupi; ha ho’u kure ro’o, ha ijapepokuérape (hi’óllape) ombopupu tymba ro’o ipotĩ’ỹva.

5Ha he’i hikuái: Epytáke reimeháme, ani reñembojátei cherehe, che ningo añembohekopotĩ’aína. Ko’ã mba’e oiko tatatĩ ha tata hendýva ramo ára pukukuépe che tĩme.

6Pema’ẽ porãke, ko’ã mba’e ahaipa peteĩ kuatiañe’ẽme ha péva oĩ che renondépe ha namboje’omo’ãi, ahepyme’ẽ ha amyengovia peve hekoitépe.

7Peẽ ha pende rukuéra peñemoangaipa pehapy haguére mba’e ryakuã porã cérro ha cerrorusu ári pende jára gua’úpe g̃uarã ha péicha peñembohory cherehe; upévare Che aha’ãta hembiapo vaikuéra ha hekoitépe amyengoviáta ichupekuéra, he’i pende Ruete.

8Péicha pende Ruete he’i: Parral’a hykue guive, oje’e, naiporãi ojeheja oñehundi rei, oĩgui pende Ruete jehovasa ipype, péicha Che ajapóta avei che retã rehe, nahundipamo’ãi katu.

9Upévare ahejáta hemby hag̃ua Jacóbo ñemoñarenguéra apytégui ha Judágui osẽta che cérro jararã, ha umi Che aiporavova’ekuépe oñeme’ẽ jevýta ijyvytee ha che rembiguaikuéra oikóta ipype.

10Ha ovecha atykuéra oikóta Saron yvypépe, ha Acor ñúme oĩta vaka atykuéra, ko’ã mba’e oikóta che retãyguakuérape, umi cherekávape g̃uarã.

11Peẽ katu pepoi pende Ruetégui ha penderesarái che cérro che aiporavova’ekuégui, peikuave’ẽ hag̃ua ambue jarakuérape ha peñohẽ ichupekuéra pene víno porãvéva kuave’ẽmby ramo.

12Che ame’ẽta pende rekove kyse pukúpe g̃uarã ha peñesũva’erã Che pojukauka hag̃ua. Che voi pohenói, ha peẽ napepenái, ha añe’ẽ ramo ndapejapysakái, pejaposeve uvei mba’evai che resa renondépe ha peiporavo umi mba’e che ndaipotáiva.

13Upévare pende Ruete pendejára he’i: Pema’ẽ porãke, che rembiguaikuéra rehe okaru joáta, ha peẽ peneñembyahýita; che rembiguaikuéra hoy’u joáta, ha peẽ pendey’uhéita; che rembiguaikuéra ovy’a joáta, peẽ katu petĩ joáta.

14Pema’ẽ porãke, che rembiguaikuéra opurahéi joáta ipy’a ovy’aitereígui, peẽ katu pejahe’óta peñembyasýgui, ha pene ánga ojepy’apyetereígui pejahe’o joáta.

15Ha pehejáta pende réra maldicion ramo che rembiporavokuérape g̃uarã, ha upévare Ñanderuete, Ñandejára pendejukáta; hembiguaikuérape katu oñeme’ẽta ambue téra.

16Upe ojerureséva jehovasa ko yvy ape ári, tojerure pende Ruetépe, pe Añeteguávape; ha pe ome’ẽva iñe’ẽ ko yvy apére toñe’ẽme’ẽ yvága Jára Añeteguáva réra rehe, umi jehasa asy ymaveguarégui cheresaraipáma, umía oje’óma che resa renondégui.

Yvagakuéra ha yvy pyahu.

17Pema’ẽ porãke, Che ajapo jevýta yvagakuéra ha yvy pyahu; ha umi tenondeveguare rehe ndaiporimo’ãvéima mandu’a, ha’ekuéra hesaraipáta umíagui.

18Upévare peikóta tory ha vy’apópe opaite árape, umi mba’e ningo Che ajapóta, ha peikuaa porãke, Che voi aguerúta Jerusalénpe vy’a, ha ambohorýta che retãme.

19Ha chepy’aroryetéta Jerusalen reheve, ha avy’áta che retã ndive; ha araka’evéma noñehenduveimava’erã ipype hasẽva ni ipyahẽ asýva.

20Umi mitã okambúva nomanomo’ãvéima ha itujáva nomanomo’ãi avei og̃uahẽ mboyve hi’ára. Peteĩ omano ramo 100 áñope oje’éta hese ha’e omano hague ikaria’y árape ha upe tekove vai ohupity’ỹva 100 áñope oje’éta hese imalditoha.

21Ha’ekuéra omopu’ãta hogarã ha ipype oikóta avei, oñotỹta hikuái iparralty ha ho’úta avei hi’akue.

22Nomopu’ãmo’ãi hogarã ambuekuéra oiko hag̃uánte ipype, ha noñemitỹmo’ãi ambuekuéra ho’u hag̃uánte; ku yvyra oikove puku háicha, upeichaite avei che retãyguakuéra oikove pukúta, ha umi che rembiporavo ipy’a rory asýta hembiapokuerakue reheve.

23Nomba’apo reimo’ãi hikuái, ha ndoguerumo’ãi mitã yvy apére omano hag̃ua pya’e, Che ahovasa jevýta che retãyguakuéra ha iñemoñarenguérape.

24Ha omba’ejerure mboyve hikuái, Che ambohováitama, ha oñe’ẽmba mboyve Che ajapótama (imba’ejerure).

25Pe aguaraguasu ha pe ovechara’y okarúta oñondive, ha pe leõ ho’úta kapi’i guéicha; mbói rembi’urã ningo yvy timbo. Pe cérro Che aiporavo haguépe avave ndoporopy’apymo’ãi ha ndojapomo’ãi ivaíva, he’i pende Ruete.