1Remondoro nga’úra’e umi yvága, ha reguejy nga’úra’e okañy hag̃ua ne renonderãgui umi cérro,
2ku tatarendy ohapy háicha pe jepe’a térã ombopupu háicha pe y; péicha toñemombe’u nde réra umi nderehe ija’e’ỹva apytépe, ha umi tetã toryrýi ne renondépe.
3Nde rejapóra’e mba’e techapyrãva roha’ãrõ’ỹva ha reguejy jave umi cérro oryryipáva ne renondépe.
4Koichagua mba’e Nde rejapo nderehe ojeroviáva rayhupápe, ko’ã mba’e ko’ãva noñehendúi araka’eve ha ndaipóri voi ohechámava koichagua mba’e.
5Nde resẽ rejojohu hag̃ua umi ojaposéva mba’e hekoite peguáva ndive, térã imandu’áva nderehe hekovépe; péina ningo ndepochy orendive ropoi haguére ndehegui, heta añokuéra roiko angaipápe, ha upeichavéramo jepe nde oresalvareína gueteri.
6Ore ningo rojogua mba’e ky’ápe, ha opaite ore rembiapo porã ojogua avei ao ky’akuépe; ha ore ro’apa ku yvyra roguekuéicha, ha ore ñaña reko oregueraha yvytúicha.
7Ndaipóri avave ohenóiva nde réra térã oñeha’ãva ojejoko hag̃ua nderehe; upévare Nde reñomi orehegui nde rova, ha reheja ore roñehundi ore rembiapo vaikuérakue rupi.
8Upeichavéramo jepe Nde, ore Ruete, ore ningo ñay’ũ nde pópe, Jahve, Nde ore apohare; ore voi ningo nde po rembiapokue.
9Anína ndepochyeterei, ore Ruete, ha anítei tapiaite nemandu’a ore aña reko rehe; péina, ema’ẽ ko’ág̃a ne retã rehe, ore voi ningo ne retãygua.
10Nde táva poravopyre oñehundi, Sióngui oiko yvy perõ, Jerusalen oñembotaperepa.
11Nde rogaguasúpe, ore rukuéra nemomba’eguasúmi, péva pe tata ohundíma; ha opaite ore mba’erepy porãita ipype oĩva guive oñembyaipa.
12Ko’ã mba’e rupi Nde, ore Ruete, rejejoko ha rekirirĩta piko ore roñehundiete peve.
Who We AreWhat We EelieveWhat We Do
2025 by iamachristian.org,Inc All rights reserved.
