Salmokuéra 141 - Biblia en Guaraní - ?anderuete ?e’? Por? 2015

David ojerure Ñanderuetépe oguenohẽ hag̃ua ichupe hese ija’e’ỹva pógui

1Ñanderuete, ndéve añembo’e, pya’e che’andumi, ejapysakamína che ñe’ẽ rehe rohenói jave.

2Che ñembo’e tojupi ne renondépe ku tatatĩ hyakuã porãvaicha ha che po ahupívo ndéve g̃uarã ku kuave’ẽmby ka’aru peguáicha.

3Nde, che Ruete, emoĩ peteĩ oñangarekóva che juru rehe ha che rembe rokẽ rehe.

4Anítei che ñe’ã oñemboyke mba’e ivaíva gotýo, anítei ajapo mba’evai iñañáva ndive, nda’uséi hembi’u iporã ramojepe.

5Peteĩ heko potĩva chehavira ramo, cherayhúgui, ha cheavisa ramo péva ningo mba’e ryakuã porãva che akãme g̃uarã, tamokõ porã che umi mba’e ha tañembo’e ani hag̃ua che amyengovia mba’evai rehe.

6Ojeity rire imbojovakehára cérrogui, ojekuaáta che ñe’ẽ hi’añeteha.

7Ku yvy oñembovo ha ojejoka ramoguáicha, péicha ñane kanguekue oñemosarambíta pe omanóva retã jurúpe.

8Che resakuéra oma’ẽ nderehe, che Ruete ajerovia nderehe, upévare ani remotyre’ỹ che ánga.

9Chemo’ã iñuhãgui oñemyasãiva’ekue chéve g̃uarã, ha umi iñañáva ñuhãgui.

10Umi heko vaíva voi to’a iñuhãme; eñangarekomína Nde cherehe ahasapa peve oĩháme iñuhãnguéra.